OILANING OBROʻSI
Oʻzbek oilalarida mehr-oqibat, keksalarga hurmat va eʼtibor yuksak insoniy fazilat sifatida qadrlanadi. Bobo bilan buvi oʻz farzandlarini qanotlari ostiga olib, nevara-chevaralari bilan ikki, hatto uch avlod boʻlib, katta xonadonga jamlanib yashashlari ham ana shu fazilatning ustunligidan.
- Oilaning mustahkamligi koʻp jihatdan keksa avlod vakillariga bogʻliq, - deydi Mangʻit shahrining «Doʻstlik» mahallasida yashovchi ibratli oila sohibasi Tursunoy Oʻtalova.
- Xalqimizda: «otning izini toy bosar» degan hikmat bekorga aytilmagan. Ortiqboy aka bilan oila qurib, besh nafar farzandli, 12 nafar nevarali boʻldik. Oʻzimiz katta xonadonning sohiblari boʻlsak-da hamon ilohim, umrlari uzoq boʻlsin, qaynona-qaynotamning maslahatisiz biron ishga qoʻl urmaymiz.
Keksalar duosini olish ham xalqimiz uchun bobomeros maʼnaviy qadriyatlardan. Oʻrozimbat bobo bilan Rahima momolarning katta farzandi Ortiqboy va uning rafiqasi Tursunoydagi feʼli kenglik, koʻngli va qoʻli ochiqlik xislatlari bobo bilan momodan oʻtgan boʻlsa, ne ajab. Oʻzlari yangi roʻzgʻor tutib, Oʻrozimbat bobo xonadonidan alohida yashayotganlariga koʻp yillar boʻlsa-da, hamon na Ortiqboy na Tursunoy keksalar bilan kengashmay biron ishni boshlagan emas.
Ortiqboy Oʻrozimbat bobo bilan Rahima momoning ilk quvonchi - katta farzandi. Sakkiz farzandining ikki nafaridan erta ayrilgan Oʻrozimbat bobo bilan Rahima momo oiladigi muammolarni hal etish borasida Ortiqboy oʻgʻliga koʻproq suyanadigan boʻlishdi. Boshqa oʻgʻil-qizlariga har ishda bir-birini qoʻllab-quvvatlab yashashni oʻrgatib borishdi. Oʻgʻil-qizlarini mehnatkash, mehr-oqibatli qilib tarbiyalashdi. Shundanmi, farzandlarining barchasi uyim-joyim, roʻzgʻorim, deydigan, oilasi tinchligi uchun qaygʻuradigan, obroʻ-eʼtiborli insonlar boʻlib voyaga yetishdi. Eng muhimi, oʻgʻil-qizlar inoq, ahil.
Ortiqboy oʻz oilasi biznesini tashkil etish niyatini amalga oshirishini ham eng avvalo ota-onasining maslahati bilan boshladi.
- Boshlanishida ancha qiyinchiliklar boʻldi, - deydi Ortiqboy tadbirkorlik faoliyatini boshlagan ilk yillarni eslab. - Har gal ota-onam oʻz maslahatlari bilan koʻnglimni koʻtarib turganidanmi, qiyinchiliklarni yengib, ishlarim yurishib ketdi. Avvalo, kichik makaron ishlab chiqarish tsexini ochdik. Farzandlarim ishli boʻlishdi. Oilamizga baraka kirdi.
«Mehnatdan kelsa boylik - turmush boʻlar chiroylik», - deganlari shu-da. Bobosi bilan buvisidan, ota-onalaridan mehnatkashlikni, tadbirkorlikni oʻrgangan egizak oʻgʻillari Ahmadjon bilan Abdullajon, egizak kelinlari Oysha-Fotima, kenja oʻgʻil Shuhratjon va Azizaxon kelinlari ham Ortiqboy bilan Tursunoyning qoʻl-qanotlari boʻlishdi. Oilaviy tadbirkorlik orqasidan bu oilaning barcha aʼzosi ish bilan taʼminlandi. Ahmadjon bilan Abdullajon uchun uylariga yaqin joydan yangi imoratlar qurib, hovli toʻylari oʻtkazishdi. Qizlari Nargiza hamda Dilafroʻzlarni oʻqitib, ilmli qilishdi. Shuhratjon esa «Behruz» MChJni tashkil etib, oʻz xususiy korxonasiga ega boʻldi. Toshket shahridagi mebelsozlik korxonalari bilan shartnoma asosida mebel mahsulotlari olib kelib sotishni yoʻlga qoʻydi. Unga bu ishda umr yoʻldoshi - oilaning kenja kelini Azizaxon eng yaqin yordamchi.
- Ortiqboy bilan Tursunoyning farzandlari ham xuddi oʻzlariga oʻxshab xayr-saxovatli, muruvvatli, - deydi «Doʻstlik» mahallasi raisining diniy maʼrifat va maʼnaviy-axloqiy tarbiya masalalari boʻyicha maslahatchisi Nina Xoʻjayeva - Mahallamizda oʻtkaziladigan har xil tadbirlarda bu oilaning tadbirkor farzandlari hamisha homiylik yordamini koʻrsatishadi. Kam taʼminlangan oilalarga bayram va hayitlarda sovgʻalar berishadi.
«Birning duosidan eʼtibor, mingning duosidan tuman boylik qaytadi» - deganlari naqadar haqiqat. Bugungi kunda Ortiqboy Oʻtalovning oilasini nainki «Doʻstlik» mahallasida, balki Mangʻit shahrida koʻpchilik yaxshi bilishadi. Yoshlari ulgʻayib, oʻzlari bobo-buvi boʻlib qolishgan, qoʻsha-qoʻsha kelin-u bir uy toʻla nevaralar qurshovidagi katta xonadon -baxtli oila sohiblari Ortiqboy bilan Tursunoyning har kuni tongda ado etadigan, oʻzlariga xush yoqadigan farzandlik burchlari bor. Bu - izzatli xonadonning izzatli, pir-u badavlat keksalari (Alloh umr bersin) - Oʻrozimbat bobo bilan Rahima momoning ahvolini soʻrab, duoi-fotihasini olish! Zero, bu katta xonadondagi qut-baraka, oilaviy baxtiyorlik, oʻzbekona intizom va ahillik ana shu ezgu qadriyat - oʻzaro mehr-oqibat, kattalarga hurmat va samimiy eʼtibor tufaylidir. Oilaning - xonadonning fayzi ham, obroʻ-eʼtibori ham shunda!
Keksalar qoʻl ochib tursa duoga,
Ezgulikdan gullab ketgusi jahon.
Farzandlar mardona boqib dunyoga,
Baxtga makon boʻlgay har bir XONADON!
Robiya YOʻLDOShEVA,
Allambergan JUMANIYoZOV,
"Amu news” ning maxsus muxbirlari.
Suratda: Ortiqboy Oʻtalov va Tursunoy Oʻtalovalar farzandlari davrasida
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
