“BAYROGʻIMIZ-FAXRIMIZ, GʻURURIMIZ”

1992-yil 14-dekabr Qoraqalpogʻiston Respublikasi tarixiga zarhal harflar bilan bitilgan muhim sanalarning biridir.

Shu kuni Qoraqalpogʻiston Respublikasining Davlat bayrogʻi toʻgʻrisida”gi Qonunga asosan Qoraqalpogʻiston Respublikasi Joʻqorgʻi Kengesining XI sessiyasida Qoraqalpogʻiston Respublikasi davlat ramzlaridan biri – bayrogʻi qabul qilindi.

Bayroq oʻzida qoraqalpogʻistonliklarning asriy orzu-istaklarini, gʻayrat-shijoatini, tinchliksevarligini va oʻziga xos mehmondoʻstligini mujassam etgani bilan ham juda aziz va qadrlidir. Shuning uchun ham 14-dekabr sanasi butun respublika boʻylab Qoraqalpogʻiston Respublikasi davlat bayrogʻi qabul qilingan kun sifatida keng nishonlanadi.

Shu yilning 13-dekabrida tumanimizdagi 82-sonli maktabda ham sana munosabati bilan “Bayrogʻimiz – faxrimiz, gʻururimiz” deb nomlangan maʼnaviy-maʼrifiy tadbir boʻlib oʻtdi.

Tadbirga maktabning yuqori sinflari oʻquvchilari, shuningdek, Iqtsodiyot kolleji oʻquvchilari ishtirok etdilar. Unda dastlab 82-sonli maktab direktorining maʼnaviyat va maʼrifat ishlari boʻyicha oʻrinbosari Mohira Yusupova Qoraqalpogʻiston Respublikasi Davlat bayrogʻi va unda aks etgan maʼno-mazmun haqida maʼruza qildi. Qoraqalpogʻiston Respublikasining davlat bayrogʻi milliy-madaniy anʼanalarimizni, qoraqalpoq xalqining tarixi va kelajagini razmiy timsollar vositasida aks ettirgani, respublika timsoli boʻlgani bilan Qoraqalpogʻiston Respublikasida yashovchi har bir fuqaro uchun qadrli va aziz ekanligi taʼkidlandi.

Davlat bayrogʻi Qoraqalpogʻiston Respublikasi hududida Oʻzbekiston Respublikasi Davlat bayrogʻi bilan bir qatorda davlat idoralari, muassasalari, oʻquv yurtlari peshtoqida hilpirab turishi, respublika aholisining yuksak orzu-niyatlarini yorqin ifoda etishi barchagamizga faxr-iftixor baxsh etadi. Bayroq qoraqalpogʻistonliklarning shon-sharafi, tarixiy xotirasi va intilishlarini oʻzida ifoda etib, tinch va osoyishta, farovon hayotga boʻlgan ishonchi ramzidir.

Tadbirda oʻquvchi-yoshlar Qoraqalpogʻiston Respublikasi Davlat bayrogʻini, ozod yurtimizni, yorqin kelajakka boʻlgan ishonchni ifodalovchi sheʼrlar ijro etdilar.

Tadbir oʻquvchi yoshlar qalbida Qoraqalpogʻiston Respublikasi Davlat bayrogʻiga hurmat hissini yanada yuksaltirgani bilan ahamiyatli boʻldi.

Oygul RAJABOVA.