“TIL – MILLIY GʻURURIMIZ”

Yakunlanayotgan haftadan 21-oktyabr – Oʻzbek tili bayrami keni mamlakatimiz boʻylab keng nishonlandi.

Har bir millatning oʻz ona tili maʼnaviy boyligidir. Chunki til millat ruhi, madaniyati, turmush tarzini aks ettiradi.

1989-yilning 21-oktyabri mamlakatimiz tarixida unutilmas sana  boʻlib qoldi. Boisi shu kuni ona tilimizning huquqiy asoslarini belgilab beruvchi “Davlat tili toʻgʻrisida”gi Qonun qabul qilinib, unga koʻra oʻzbek tiliga Davlat tili maqomi berildi.

2020-yilning 10-aprelida esa 21-oktyabr sanasini oʻzbek tili bayrami sifatida belgilash toʻgʻrisida Oʻzbekiston Respublikasi Qonunining 1-moddasida belgilab qoʻyildi.

Ushbu sana har yili  mamlakatimizda keng nishonlanadi, oʻzbek tilining huquqiy maqolmini belgilashda bosib oʻtilgan qiyinchiliklar, oʻzbek tilining boy imkoniyatlaridan foydalanish uchun bugungi kunda yaratilgan sharoitlar, ona tilimizning jamiyatdagi mavqeini, maqomini yuksaltirish borasida, ona tilimizning sofligini saqlash, uni yosh avlodga chuqur oʻrgatish borasida amalga oshirilayotgan ishlar keng eʼtirof etiladi.

Oʻzbek tili bayrami munosabati bilan shu yilning 21-oktyabrida tumanimizdagi 38 umumiy oʻrta taʼlim maktabida maktab oʻqituvchilari, oʻquvchilari va tuman Madaniyat boʻlimi xodimlari hamkorligida tashkil etilgan “Til – milliy gʻururimiz” deb nomlangan maʼnaviy-maʼrifiy kechada ham ona tilimizning goʻzalligi, jozibasi va juda boy ekanligi, ona tilimizni asrash, rivojlantirishga hissa qoʻshish – millatimizning yuksalishiga zamin yaratishi xususida batafsil soʻz yuritildi.

Tadbirda maktab oʻqituvchilari, oʻquvchilari, tuman Madaniyat boʻlimi xodimlari, “Milliy tiklanish” partiyasi tuman Kengashidan vakillar qatnashdilar.

Tadbirni maktab direktorining maʼnaviy-maʼrifiy ishlar boʻyicha oʻrinbosari Nilufar Tojimurodova ochdi. Dastlab maktab ona tili va adabiyot fani oʻqituvchilari ona tilimizning har birimizning hayotimizdagi oʻrni, shuningdek, mustaqil davlatimizning bayrogʻi, gerbi, madhiyasi singari qonun yoʻli bilan himoya qilinadigan muqaddas davlat ramzi ekanligi, millat koʻzgusi ekanligi xususida maʼruzalar qildilar, oʻzbek tiliga davlat tili maqomining berilishi xalqimizning mustaqillikka erishish yoʻlida muhim qadam boʻlganligini taʼkidladilar.

Oʻzbek tiliga davlat tili maqomi berilgan til bayrami kuniga bagʻishlangan maʼnaviy-maʼrifiy kecha oʻquvchilar ijrosidagi ona tilimizni ulugʻlovchi sheʼrlar, sahna koʻrinishlari bilan davom etdi.

Shuningdek, taniqli xonandalar Anvar Xudoyberganov, Murodjon Ibragimov va Rashid Rahimov, Sevinchoy Mavlonberganovalar ijro etgan qoʻshiqlar, maktab badiiy havaskorlari ijro etgan raqslar barchaga yuqori kayfiyat baxsh etdi.

Tuman Madaniyat boʻlimi xodimi Nasiba Eshchanova stsenaiysi asosida oʻtkazilgan “Til – millat koʻzgusi” deb nomlangan tadbir barchada chuqur taassurotlar qoldirdi.

O.RAJABOVA.