Parrandachilikka ixtisoslashgan agrofirma tovuq goʻshti savdosidan 10 oyda 100 million soʻmdan ortiq daromad oldi

Kichik biznes va xususiy tadbirkorlikni yanada rivojlantirish mamlakatimiz iqtisodiy salohiyatini oshirish, yangi ish oʻrinlari yaratishda muhim ahamiyatga ega. Shu maʼnoda parrandachilik sohasida amalga oshirilayotgan chora-tadbirlar bugun nafaqat oziq-ovqat xavfsizligini taʼminlash, balki respublika boʻylab yangi ishlab chiqarish obʼektlarining qad rostlab, koʻplab yangi ish oʻrinlari ochilishiga zamin yaratmoqda.

Oʻzbekiston Pespublikasi Prezidentining “Parrandachilikni yanada rivojlantirish boʻyicha qoʻshimcha chora-tadbirlar toʻgʻrisida”gi qaroriga muvofiq olib borilayotgan ishlar natijasida tumanimizda 11 ta parrandachilik subʼektlari tashkil etildi hamda ularga jami 223,6 gektar yer maydonlari ajratildi. Hozirda ushbu parrandachilik subʼektlarida jami 1 mln. 16 ming bosh parrandalar mavjud.

Yurtimizda bu sohada yaratilayotgan imkoniyatlardan oqilona foydalanib, oʻzining tadbirkorlik faoliyatini olib borayotgan hamda soha rivojiga salmoqli hissa qoʻshayotgan faol tadbirkorlik subʼektlaridan biri tumanimizdagi “Qilichboy parranda” agrofirmasidir. Agrofirma 2009-yildan buyon faoliyat olib boradi.

“Qilichboy parranda” agrofirmasi parranda goʻshti yetishtirishga yoʻnaltirilgan. Agrofirma 2016-yilda sobiq “44-Avtokorxona”ga qarashli bino va inshootlarining bir qismini yangi ishchi oʻrin yaratish va investitsiya kiritish sharti bilan tender savdosida yutib oldi. Natijada parranachilik asbob-uskunalari, jumladan, 2 turdagi don maydalagich asboblari, 10 ming dona tuxum sigʻimiga ega boʻlgan joʻja chiqarish inkubatori, 2 ming tovuqqa moslashgan tovuq katakchalari sotib olindi.

Hozirda agrofirmada jami 5 ta ishchi xodim mehnat qilmoqda. Ular agrafirmadagi jami 2 mingga yaqin tovuq va joʻjalarni parvarish qilishmoqda. Tovuq goʻshti mahsulotlari esa Mangʻit dehqon bozorida sotilmoqda. Joriy yilning oʻtgan 10 oyi davomida agrofirma 100 million soʻmdan ortiq daromad oldi.

Agrofirma rahbariyati kelgusida parrandalar bosh sonini yanada koʻpaytirib, xalqimiz dasturxonini sifatli tovuq goʻshti bilan taʼminlashga munosib hissa qoʻshishni rejalashtirmoqda.

Charos APSLONOVA, tuman hokimligi axborot xizmati rahbari.