OʻRTAQALʼA OVULIDA 8 TA XONADONGA TOVUQ TARQATILDI

Oʻzbekiston Respublikasi Vazirlar Mahkamasining “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi mahallabay ishlash va tadbirkorlikni rivojlantirish agentligining aholini tadbirkorlikka jalb qilish jamgʻarmasi mablagʻlari hisobidan subsidiyalar ajratish tartibi toʻgʻrisidagi nizomni tasdiqlash haqida”gi Qarori yurtimiz aholisi turmushi sifati va farovonligi oshishiga xizmat qilmoqda. Ushbu qaror bilan tasdiqlangan nizomga muvofiq oʻn olti yoshdan to pensiya taʼminoti huquqini olish yoshigacha boʻlgan, haq toʻlanadigan ishga yoki ish haqi beriladigan mashgʻulotga ega boʻlmagan, ish qidirayotgan, ishga joylashishga koʻmak soʻrab mahalliy mehnat organlariga murojaat qilgan mehnatga layoqatli shaxslarga ular qishloq xoʻjaligi kooperatsiyalarga aʼzo boʻlishlari uchun kooperatsiya ustav fondiga ulush sifatida kiritishi uchun subsidiyalar ajratiladi.

Tumanimizda ham qishloq hududlarda yashovchi ishsiz, biroq mehnat faoliyati bilan shugʻullanishga ishtiyoqi baland, mehnatga yaroqli, uy sharoitida daromad topishni istaydigan fuqarolarga ham mazkur Nizomga asosan uy sharoitida mehnat qilishlari uchun imkoniyatlar yaratilmoqda.

Oʻrtaqalʼa ovuli hokim yordamchisi Shahzodbek Karimov tavsiyasiga asosan ovul hududidagi 8 nafar fuqaro “Amudaryo Qilichboy parranda” ishlab chiqarish kooperativiga aʼzo qilinib, rahbari Shamsiddin Safarboyev tomonidan ularning har biriga tuxum yoʻnalishida boqilayotgan 40 tadan tovuq, ozuqasi, suv idishlari yetkazib berildi hamda ushbu tovuqlarni qanday qilib parvarishlash, daromad olish xususida tushuntirishlar berildi. Kooperatsiyaga aʼzo qilinganlardan biri Vaxum aholi punktida yashovchi Jabborbergan Boymanov sogʻligʻida muammolari borligi uchun ogʻir jismoniy mehnat qilolmaydi. Uning uy sharoitida mehnat qilib, daromad topishiga koʻmak berilgani – oila aʼzolari uchun ham quvonchli voqea boʻldi.

Parrandachilik bilan shugʻullanishni istaydigan, biroq faoliyat boshlashi uchun mablagʻi yoʻqligi inobatga olinib, Yusufxoʻja aholi punktida yashovchi Mehribon Xudoyberganova ham ushbu kooperatsiyaga aʼzo qilindi va tovuq berildi. Shu tariqa ovuldagi 8 ta xonadonida yashovchi aholi daromad manbaiga ega boʻldilar.

Shu kungacha ovuldagi hokim yordamchisi koʻmagi bilan 31 nafar fuqarolar doimiy ishga joylashdi, 60 nafar fuqarolarning oʻzini oʻzi band qilishiga erishildi, 7 nafar fuqaro haq toʻlanadigan jamoat ishiga joylashdi, 52 nafar fuqaro tadbirkorlik faoliyatini boshlashlari uchun imtiyozli kreditlar ajratildi. Shuningdek, 13 nafar ishsiz fuqaroga uy sharoitida daromad topishlari uchun 39,7 million soʻm subsidiya ajratildi. Qishloq xoʻjaligi yoʻnalishida 42 nafar fuqaroga 11,1 gektar yer maydoni uzoq muddatga ijaraga berildi.

Amalga oshirilayotgan buningdek saʼy-harakatlar ovulda aholi, shu jumladan, xotin-qizlar va yoshlarning ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan, qoʻllab-quvvatlashga zarurati boʻlgan fuqarolarga manzilli koʻmak berilib, turmush sharoiti yaxshilanishiga zamin yaratilmoqda.

Har bir shaxs bilan individual va tizimli ravishda muntazam ish olib borish uchun moddiy yordam va koʻmakka muhtoj oilalar boʻyicha “Temir daftar”, “Ayollar daftari”, “Yoshlar daftari” shakllantirilib, ushbu daftarlarda roʻyxatga olingan fuqarolarga doimiy gʻamxoʻrlik koʻrsatilmoqda. Albatta, bu boradagi ishlar ovul aholisi turmushi farovonlashuviga taʼsirini koʻrsatadi.

Oygul RAJABOVA.