ЎРТАҚАЛЪА ОВУЛИДА 8 ТА ХОНАДОНГА ТОВУҚ ТАРҚАТИЛДИ

Ўзбекистон Республикаси Вазирлар Маҳкамасининг “Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги маҳаллабай ишлаш ва тадбиркорликни ривожлантириш агентлигининг аҳолини тадбиркорликка жалб қилиш жамғармаси маблағлари ҳисобидан субсидиялар ажратиш тартиби тўғрисидаги низомни тасдиқлаш ҳақида”ги Қарори юртимиз аҳолиси турмуши сифати ва фаровонлиги ошишига хизмат қилмоқда. Ушбу қарор билан тасдиқланган низомга мувофиқ ўн олти ёшдан то пенсия таъминоти ҳуқуқини олиш ёшигача бўлган, ҳақ тўланадиган ишга ёки иш ҳақи бериладиган машғулотга эга бўлмаган, иш қидираётган, ишга жойлашишга кўмак сўраб маҳаллий меҳнат органларига мурожаат қилган меҳнатга лаёқатли шахсларга улар қишлоқ хўжалиги кооперацияларга аъзо бўлишлари учун кооперация устав фондига улуш сифатида киритиши учун субсидиялар ажратилади.

Туманимизда ҳам қишлоқ ҳудудларда яшовчи ишсиз, бироқ меҳнат фаолияти билан шуғулланишга иштиёқи баланд, меҳнатга яроқли, уй шароитида даромад топишни истайдиган фуқароларга ҳам мазкур Низомга асосан уй шароитида меҳнат қилишлари учун имкониятлар яратилмоқда.

Ўртақалъа овули ҳоким ёрдамчиси Шаҳзодбек Каримов тавсиясига асосан овул ҳудудидаги 8 нафар фуқаро “Амударё Қиличбой парранда” ишлаб чиқариш кооперативига аъзо қилиниб, раҳбари Шамсиддин Сафарбоев томонидан уларнинг ҳар бирига тухум йўналишида боқилаётган 40 тадан товуқ, озуқаси, сув идишлари етказиб берилди ҳамда ушбу товуқларни қандай қилиб парваришлаш, даромад олиш хусусида тушунтиришлар берилди. Кооперацияга аъзо қилинганлардан бири Вахум аҳоли пунктида яшовчи Жабборберган Бойманов соғлиғида муаммолари борлиги учун оғир жисмоний меҳнат қилолмайди. Унинг уй шароитида меҳнат қилиб, даромад топишига кўмак берилгани – оила аъзолари учун ҳам қувончли воқеа бўлди.

Паррандачилик билан шуғулланишни истайдиган, бироқ фаолият бошлаши учун маблағи йўқлиги инобатга олиниб, Юсуфхўжа аҳоли пунктида яшовчи Меҳрибон Худойберганова ҳам ушбу кооперацияга аъзо қилинди ва товуқ берилди. Шу тариқа овулдаги 8 та хонадонида яшовчи аҳоли даромад манбаига эга бўлдилар.

Шу кунгача овулдаги ҳоким ёрдамчиси кўмаги билан 31 нафар фуқаролар доимий ишга жойлашди, 60 нафар фуқароларнинг ўзини ўзи банд қилишига эришилди, 7 нафар фуқаро ҳақ тўланадиган жамоат ишига жойлашди, 52 нафар фуқаро тадбиркорлик фаолиятини бошлашлари учун имтиёзли кредитлар ажратилди. Шунингдек, 13 нафар ишсиз фуқарога уй шароитида даромад топишлари учун 39,7 миллион сўм субсидия ажратилди. Қишлоқ хўжалиги йўналишида 42 нафар фуқарога 11,1 гектар ер майдони узоқ муддатга ижарага берилди.

Амалга оширилаётган бунингдек саъй-ҳаракатлар овулда аҳоли, шу жумладан, хотин-қизлар ва ёшларнинг ижтимоий ҳимояга муҳтож, турмуш шароити оғир, ишсиз ва касб-ҳунарга эга бўлмаган, қўллаб-қувватлашга зарурати бўлган фуқароларга манзилли кўмак берилиб, турмуш шароити яхшиланишига замин яратилмоқда.

Ҳар бир шахс билан индивидуал ва тизимли равишда мунтазам иш олиб бориш учун моддий ёрдам ва кўмакка муҳтож оилалар бўйича “Темир дафтар”, “Аёллар дафтари”, “Ёшлар дафтари” шакллантирилиб, ушбу дафтарларда рўйхатга олинган фуқароларга доимий ғамхўрлик кўрсатилмоқда. Албатта, бу борадаги ишлар овул аҳолиси турмуши фаровонлашувига таъсирини кўрсатади.

Ойгул РАЖАБОВА.