Saylov qonunchiligi targʻibotiga bagʻishlangan tadbir oʻtkazildi

Joriy yilning 22-dekabr kuni boʻlib oʻtadigan saylovlar demokratik davlat va fuqarolik jamiyati tamoyillariga muvofiq yangi sharoitda oʻtkaziladi. Mamlakatimizda ushbu muhim jarayonga katta tayyorgarlik koʻrilmoqda. Barcha siyosiy partiyalar tomonidan saylovoldi dasturlari ishlab chiqilib, yurimizning barcha hududlarida targʻibot-tashviqot ishlari olib borilmoqda.

13-noyabr kuni “Adolat” sotsial-demokratik partiyasi Amudaryo tumani Kengashi va tuman Adliya boʻlimi tomonidan Davlat Soliq inspektsiyasida targʻibot tadbiri oʻtkazildi. Tadbir Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengashi hamda tuman kengashiga 2019-yil 22-dekabrʼ kuni boʻlib oʻtadigan saylovlarda aholining faol ishtirok etishi va Oʻzbekiston Respublikasining saylov kodeksini saylovchilar oʻrtasida keng targʻib qilishga bagʻishlandi.

Tadbirda tuman Adliya boʻlimi boshligʻi, Xalq deputatlari tuman Kengashiga saylov oʻtkazuvchi tuman saylov komissiyasi raisi Moʻminjon Matyusupov, “Adolat” sotsial-demokratik partiyasi Amudaryo tuman Kengashi raisi Mansur Oʻrazboyevlar saylov qonunchiligidagi oʻzgarishlar haqida maʼlumotlar berib oʻtdi.

Taʼkidlanganidek, 18 ta bob, 103 moddadan iborat boʻlgan Saylov kodeksi bilan saylov okruglari va uchastkalarini tuzish, saylov komissiyalari faoliyatini tashkil etish tartibi belgilandi. Unga muvofiq, Qonunchilik palatasi deputatlari saylovini oʻtkazish uchun 150 ta hududiy saylov okrugi tuziladi. Ilgari 135 ta okrug tuzilgan va 15 nafar deputat Oʻzbekiston ekologik harakatidan saylangan. Endilikda Oʻzbekiston ekologik partiyasi tashkil etilganligi bois, mazkur partiya deputatlikka oʻz nomzodlarini umumiy saylovlarga qoʻygan holda Qonunchilik palatasidan oʻrin egallashi mumkin. Shuningdek, saylovchilarning yagona elektron roʻyxati shakllantiriladi. Unga koʻra saylovchilar Markaziy saylov komissiyasining rasmiy veb-saytida saylovchilarning roʻyxati toʻgʻrisidagi oʻzi uchun kerakli maʼlumotlarni olish imkoniyatiga ega boʻladi.

Chindan ham, mamlakatimizda koʻppartiyaviylik tizimini rivojlantirish va mustahkamlashga qaratilayotgan eʼtibor samarasida davlat ahamiyatiga molik muhim masalalarni hal qilishda siyosiy partiyalarning roli va taʼsiri kuchayib bormoqda. Partiyalar Oʻzbekistonda yaratilgan qonunchilik bazasiga tayangan holda jamiyatdagi tub oʻzgarishlarning samarali kuchiga aylanib borayotir.

Tadbirda siyosiy partiyalar faoliyatining oʻziga xos xususiyatlari, ularning jamiyatni demokratlashtirish va yangilashdagi oʻrni va roli, siyosiy partiyalarning davlat hokimiyati vakillik organlariga saylovda ishtirokining umumeʼtirof etilgan printsip va normalari, rivojlangan demokratik davlatlarning bu boradagi tajribasi, saylovlarda partiyalar uchun teng sharoit yaratish boʻyicha amalga oshirilayotgan ishlar yuzasidan maʼlumotlar berildi. Tadbir qizgʻin va bahs munozaraga boy boʻldi.  

Charos Arslonova, tuman hokimligi axborot xizmati rahbari.