Saylov adolat va ochiqlik tamoyillari asosida oʻtkazildi

Xalq deputatlari Amudaryo tuman Kengashiga saylov oʻtkazuvchi tuman saylov komissiyasi “Xalq deputatlari tuman va shahar Kengashlariga saylov toʻgʻrisida”gi Oʻzbekiston Respublikasi Qonunining 24- va 44-moddalariga asosan tuman Kengashining  boʻshab qolgan deputatlik oʻrinlariga saylov oʻtkazish toʻgʻrisida qaror qabul qilgan edi.
Mazkur qarorga muvofiq shu yilning 17-dekabrida 1-Navoiy va 10-Toshyop saylov okruglarida deputatlik boʻyicha saylovlari boʻlib oʻtdi. Saylovlardan oldin mazkur hududlarda deputatlikka nomzodlarning aholi bilan yaqindan tanishtirilib, fuqarolarning Konstitutsiyaviy huquqlaridan foydalanib, oʻzlari eng munosib deb bilgan nomzodlarga ovoz berishlariga qulay sharoitlar yaratilganligi saylovning ushqoqlik bilan oʻtkazilishiga zamin yaratdi.
“Toshyop” ovulidagi 5-sonli maktabda joylashgan 90-sonli saylov uchastkasi ertalabdan fuqarolar bilan  gavjum boʻldi. Uchastkada yaratilgan sharoitlar har kimning oʻzi tanlagan nomzodga ovoz berishini taʼminladi. Shuningdek, uchastkada tibbiyot xonasi, ona va bola xonasi ham tashkil etilib, yetarlicha jihozlangani saylov kunida saylovchilarga yana ham qulaylik yaratdi.
1-Navoiy saylov okrugidagi 78-sonli saylov uchastkasida ham saylovga puxta tayyorgarliklar koʻrildi. Aholi xalq deputatlari tuman Kengashiga saylovga doir amaldagi qonun-qoidalar bilan yaqindan tanishtirildi va saylov kunida fuqarolarning oʻzlari tanlagan nomzodlariga ovoz berishi uchun munosib sharoitlar yaratildi.
Xalq deputatlari Amudaryo tuman Kengashiga saylov oʻtkazuvchi boʻshab qolgan 1-Navoiy va 10-Toshyop okruglarida deputatlar saylovi oshkoralik, haqqoniylik tamoyillari asosida oʻtkazildi va saylovchilar eng munosib nomzodlarni deputat qilib sayladilar.