“MATBUOTGA BAXShIDA UMR”

«Kunlardan bir kuni gazeta tahririyatiga Kuyukkoʻpir ovulidan xat keldi. Konvert ichiga bogʻda gʻarq pishgan mevalar tasvirlangan ajoyib fotosuratlar joylashtirilgan ekan. Bu fotosuratlar menga juda yoqib qoldi.

Qishloqlarga qiladigan ijodiy safarlarimdan birida men ushbu xat muallifini izlab topdim. U Kuyukkoʻpir ovulining Qizilcholi mahallasida yashaydigan Jumaniyozov Allambergan ismli oʻquvchi bola ekan...»

Safarboy ShOMURODOV, faxriy fotojurnalist.

"Matbuotga baxshida umr” kitobidan.

Dunyoda kasblar koʻp. Lekin har qanday kasbni egallashda ham bizga yoʻl-yoʻriq koʻrsatuvchi, kasb sir-asrorlarini oʻrgatuvchi kishilarning xizmatlari hurmat-ehtiromlarga loyiqdir. Yetmish yosh ostonasiga yetganida ham hamon shogirdlari bilan bir safda hormay-tolmay mehnat qilayotgan, oʻzining butun kuch-quvvatini soha rivojiga va shogirdlari kamoliga baxshida etayotgan tajribali jurnalist, «Shuhrat» medali sohibi, qariyb 17-yil «Amudaryo haqiqati»  («Taraqqiyot koʻzgusi») gazetasiga muharrirlik qilgan Allambergan Jumaniyozov ana shunday kishilar toifasidan. Yaqinda  bosilib chiqqan, Qoraqalpogʻistonda xizmat koʻrsatgan jurnalist va shoira Robiya Yoʻldosheva qalamiga mansub «Matbuotga baxshida umr» deb nomlangan badiiy-publitsistik kitob ana shu ustoz jurnalist  hayoti va mehnat faoliyatiga bagʻishlangan.

Ustozlarni qadrlash, oʻgitlariga amal qilib ishlash va ularni koʻpchilikka namuna qilib koʻrsatib, mehnatlarini eʼtirof etish xalqimizga xos anʼanadir. Shu maʼnoda iqtidorli ijodkor Robiya Yoʻldoshevani tajribali jurnalist, hokisor ustoz hayoti va mashaqqatli jurnalistlik faoliyati  haqida hikoya qiluvchi asar yaratishga bel bogʻlagani va buning uddasidan chiqqani bilan shu kasb mashaqqatlarini totib kelayotgan bir jurnalist sifatida chin koʻnglimdan qutlagim keladi. Axir, taniqli shoir, Oʻzbekiston qahramoni Abdulla Oripov aytganlariday:

Dedilar: dunyoda asli kim aziz, 

Aytdilar, ustozdir, ustoz begumon.

Tagʻin aytdilarki, aziz shubhasiz

Ustozin qadriga yetolgan inson.

Keng oʻquvchilar ommasiga moʻljallangan kitobni nafaqat mazkur soha xodimlari, balki barcha yurtdoshlarimiz  ham oʻqib, oʻziga xos hayotiy xulosalar olishiga ishonamiz.

Oygul RAJABOVA.