YuRTIM, ISTIQLOLING MANGUGA BOʻLSIN!

Tutqun qush yuksakka parvoz qila  olmaganidek, insonga oʻzligini namoyon qilishi, nimalarga qodirligini koʻrsata olishi uchun ham ozodlik, erk, imkoniyat kerak. Buni mamlakatimiz mustaqillikka erishganidan beri oʻtgan 25-yil davomida amalga oshirilgan ulugʻvor yuksalishlarda ham koʻrishimiz mumkin. Oʻtgan tarixan qisqa davrda Oʻzbekiston qoloq agrar oʻlkadan dunyodagi qudratli davlatlardan biriga aylandi. Eng muhimi, xalqimiz buyuk ajdodlarimizning boy ilmiy, milliy maʼnaviy merosidan kuch olib, oʻziga xos va mos taraqqiyot yoʻlidan dadil odimlamoqda, tinch-osoyishta, farovon turmush kechirmoqda.

Shu boisdan-da mustaqillikka erishilgan kun – 1-sentyabrni eng ulugʻ, eng aziz bayramimiz sifatida keng nishonlaymiz.

29-avgust kuni Bolalar-oʻsmirlar sport maktabining "Doʻstlik” mahallasi  hududida joylashgan oʻyingohida boʻlib oʻtgan "Goʻzal va betakrorimsan, muqaddas Vatanim, jonim senga fido, Oʻzbekistonim!” degan ezgu gʻoyani ifoda etuvchi ulkan teatrlashtirilgan bayram tomoshasi ham ushbu qutlugʻ sananing 25-yilligiga bagʻishlandi.

Sharlar, bayroqchalar, gullar bilan, xalqimiz asrlar davomida intilib, orzu qilib yashagan mustaqillik degan bebaho neʼmatning qadr-qimmatini ifodalovchi, xalqimizning 25-yil mobaynida erishgan yutuqlarini, avval kim edi-yu, bugun kim  boʻlganini koʻrsatuvchi shiorlar, bannerlar bilan bezatilgan ulkan tomoshagohda Mangʻit shahridagi umumtaʼlim, oʻrta maxsus, kasb-hunar taʼlimi muassasalari oʻquvchi-yoshlari milliy  kiyimlarda saf tortishgan.

Tomoshagoh tashqarisida tumanimizdagi  ovul va mahalla fuqarolar yigʻinlari, MMTPlar, fermer xoʻjaliklari tomonidan koʻrgazma tashkil etilgan. Koʻrgazmadan joy olgan turli mevalar, qovun, tarvuz, qovoq va boshqada mahsulotlar, turli pishiriqlar, non mahsulotlari bilan bezatilgan bayram dasturxoni ona zaminimizning  naqadar saxiyligidan, ayol-qizlarimizning ana shu mahsulotlardan naqadar nozik did va yuksak mahorat bilan turli totli yeguliklar tayyorlay olishidan darak berib turibdi.

Tadbir mehmonlari tuman rahbariyati vakillari boshchiligida avval koʻrgazmani maroq bilan koʻzdan kechirib chiqishdi. Ularga milliy liboslardagi ayol-qizlar odob bilan non tutishdi.

Xalqimizning urfiga koʻra, mehmonlar dasturxondagi nondan tatib, yurtimizga tinchlik-xotirjamlik, joriy yilgi paxta xirmonimizga baraka tilab, duoga qoʻl ochdilar.

"Turkmaniston” MMTP koʻrgazmasi oldida mehmonlarni faxriy oʻqituvchi Anorgul Kenjayeva doira chalib, oʻynoqi qoʻshiq aytib  kutib oldi.

Oʻtgan yigirma besh yil ichinda,

Yurtim, sarhadlaring tinch boʻldi.

Ona xalqim moʻʼjizalar yaratding,

Oʻgʻling yoqa, qizing esa yeng boʻldi.

Mustaqillik toʻyiga

Paxtalar ochilibdi.

Dehqonning mehnatidan

"Oq oltin” yaralibdi.

Endi navbat yigʻim-terimga doʻstlarim,

Oq bulutga qoʻying narvon doʻstlarim!

Nuroniy yoshga yetib qolgan onaxonning koʻngil izhorlarini oʻynoqi, shoʻx va koʻtarinki ruhda, yoqimli ohangda qoʻshiq qilib aytishi barcha ishtirokchilarning zavqini keltirdi. "Toʻlqin” MMTP koʻrgazmasi yonida koʻkragiga medal taqqan oʻn nafar 5-6 yoshlar chamasidagi bolakaylarning, "Toʻlqin” boks maktabi tarbiyalanuvchilari, qoʻsha-qoʻsha medallar sohibi Behzod Jumanazarov, Dilshod Quvvatboyevlarning viqor bilan saf tortib turgani yigʻilganlarning barchasining diqqatini oʻziga tortdi.

"Qilichboy” MMTP koʻrgazmasi oldida mehmonlar surnayning hayotbaxsh sadolari ostida non-tuz bilan qarshi olindi.

Tumanimizda oʻtkazilgan "Eng obod ovul, mahalla”, "Mahallaning  eng obod xonadoni” tanlovlari gʻoliblari taqdirlangach, bayram tomoshasi namoyishi boshlandi. Maydon uzra katta-yu kichik joʻrligida Vatanimiz madhiyasi yangradi.

Yigʻilganlarga tumanimiz hokimi Rajabboy Yoʻldoshevning bayram tabrigini hokim oʻrinbosari M.Temirboyev oʻqib eshittirdi.

Shundan soʻng tuman Madaniyat va sport ishlari boʻlimi tomonidan tayyorlangan ulkan teatrlashtirilgan bayram tomoshasi namoyishi boshlandi. Ona Vatanimizni, mustaqillikni, istiqlol bergan baxtning naqadar aziz va totli ekanligini ifoda etuvchi kuy, qoʻshiq, raqs va koʻrinishlarni tomoshagohga yigʻilgan aholi miriqib tomosha qilib, ulkan taassurotlar oldi.

Tomoshagoh peshtoqidagi oʻz uyasida bolalarini bagʻriga olganicha bexavotir orom olayotgan tinchlik ramzi – laylak timsoli yurtimizdagi barcha xalqlarning tinch-totuv, farovon turmushi ifodasidir. Onalik va bolalikning muhofaza qilinishi, oʻsib kelayotgan yosh avlodning  barkamolligiga erishish borasidagi gʻamxoʻrliklar natijasida barcha jabhalarda ham iqtidorli va yuksak salohiyatli yoshlar kamolga yetmoqda. Yoshlarimizga muhtaram Yurtboshimizning: "Oʻzbekiston bolalari – mening bolalarim, ular hech kimdan kam emas va kam boʻlmaydi ham”, deya yuksak ishonch bildirishlari yangi-yangi marralarni zabt etishga ruhlantirmoqda. Koʻksiga turli bellashuvlarda gʻolib boʻlib, qoʻsha-qoʻsha medallar taqib maydonga chiqqan tumanimiz sportchi yoshlarini butun yigʻilganlar olqishlar bilan kutib olishdi, ular ijrosidagi turli sport oʻyinlarini maroq bilan tomosha  qilishdi. Dastur soʻngida milliy sport bellashuvlariga navbat berildi.

Bayram tomoshasi barchaga cheksiz shodliklar hadya etish barobarida ona Vatanimizning betakror, yagona va muqaddas ekanligini qalblarimizga teranroq joyladi. Yosh-u qari, barcha ishtirokchilar koʻnglida shunday niyat joʻsh urdi: Yurtim, istiqloling mangu boʻlsin!

Mustaqilligimizning 25-yilligiga bagʻishlangan tantanali tadbirda Qoraqalpogʻiston  Respublikasi Vazirlar Kengashi Raisi Bahodir Yangiboyev, Oʻzbekistonda xizmat koʻrsatgan artist, xalq sevgan sanʼatkor Yodgor Saʼdiyevlar ishtirok etdilar.

Oygul RAJABOVA,

jurnalist.