Siyosat 14.01.2016 👁 3,426

VATAN HIMOYaChILARI KUNI KENG NIShONLANDI

Har qanday davlatning kuch-qudrati, xalqining erkin va ozod, tinch va osoyishta umrguzaronlik qilishi uning oʻz armiyasi, Qurolli Kuchlariga bogʻliq. Mamlakatimizda istiqlol yillarida Prezidentimiz Islom Karimov rahnamoligida milliy armiyamiz tubdan isloh qilinib, harbiy xizmat yigitlar uchun chinakam sharaf ishiga aylandi.

Avvalo, harbiy sohani isloh qilish yoʻlida mustahkam huquqiy poydevor yaratildi. Eng avvalo, Bosh Qomusimiz — Oʻzbekiston Respublikasi Konstitutsiyasida mamlakatimiz Qurolli Kuchlari Oʻzbekiston Respublikasining davlat suverenitetini va hududiy yaxlitligini, xalqimizning tinch hayoti va xavfsizligini himoya qilish uchun tashkil etilishi belgilab qoʻyildi. Oʻzbekiston Respublikasini himoya qilish — Oʻzbekiston Respublikasi har bir fuqarosining burchi ekanligi alohida qayd etildi.

Bu meʼyor milliy qonunchiligimizda ham oʻz aksini topdi – "Oʻzbekiston Respublikasining Davlat chegarasi toʻgʻrisida”gi (1999-yil), "Fuqaro muhofazasi toʻgʻrisida”gi (2000-yil), "Terrorizmga qarshi kurash toʻgʻrisida”gi (2000-yil), "Mudofaa toʻgʻrisida”gi (2001-yil), "Umumiy harbiy majburiyat va harbiy xizmat toʻgʻrisida”gi (2002-yil), "Oʻzbekiston Respublikasi Qurolli Kuchlari rezervidagi xizmat toʻgʻrisida”gi (2003-yil), "Oʻzbekiston Respublikasining tashqi siyosiy faoliyati Kontseptsiyasini tasdiqlash toʻgʻrisida”gi (2012-yil) Qonunlar shular jumlasidandir.

2016-yil 14 yanvar kuni Mangʻit shahridagi 1-sonli bolalar musiqa va sanʼat maktabida 14 yanvar – Vatan himoyachilari kuniga bagʻishlangan bayram tadbiri boʻlib oʻtdi.

Tadbirni tuman hokimi oʻrinbosari, Xotin-qizlar qoʻmitasi raisi M.Ahmedova ochdi va olib bordi.

Tuman hokimining birinchi oʻrinbosari B.Ernazarov, "Mangʻit” chegara posti boshligʻi A.Aytugʻdiyev, 64-sonli maktab oʻqituvchisi O.Xolimbetova, harbiy xizmatdagi oddiy askar J.Ergashev va boshqalar harbiylarni va Vatan himoyachilarini bayram bilan qutlar ekan, ularning sarhadlarimiz daxlsizligi va osmonimiz musaffoligi yoʻlidagi fidokorona xizmatlari uchun minnatdorchilik bildirdi. Prezidentimiz rahnamoligida muddatli harbiy xizmatning bir yil etib belgilangani, Qurolli Kuchlar safiga chaqiruv yiliga bir marta tashkil qilinishi, shartnoma boʻyicha hamda safarbarlik chaqiruvi rezervidagi harbiy xizmatning joriy etilgani mamlakatimiz mudofaa salohiyatini oshirishda muhim omil boʻlayotgani taʼkidlandi.

Tadbir davomida "Tayanchim va suyanchim, faxru iftixorimsan, muqaddas Vatan!” shiori ostida Vatan himoyachilari kuniga bagʻishlab oʻtkazilgan sport musobaqalari gʻoliblariga tuman hokimligi va xomiylar tomonidan esdalik sovgʻalari topshirildi. "Mangʻit” va "Ayoqchi” chegara postlarida xizmat burchini namunali oʻtayotgan askarlarga mudofaaga koʻmaklashuvchi "Vatanparvar” tashkiloti tuman Kengashi tomonidan esdalik sovgʻalari topshirildi.