Konstitutsiya kuni keng nishonlandi

3-dekabr kuni Amudaryo akademik litseyida Oʻzbekiston Respublikasi Konstitutsiyasi qabul qilinganligining 23-yilligiga bagʻishlangan yigʻilish boʻlib oʻtdi.

Mazkur oʻquv muassasasi oʻqituvchilari, oʻquvchilari ishtirokida oʻtkazilgan yigʻilishda Oʻzbekiston Respublikasi milliy xavfsizlik xizmati chegara qoʻshinlariga qarashli tumanimizda joylashgan harbiy qism komandiri J.Esonov ham qatnashib, mamlakatimizda joriy etilgan harbiy xizmat turlari, harbiy xizmatchilarga yaratilayotgan sharoitlar va imkoniyatlar haqida maʼruza qildi.

* * *

7-dekabr kuni 16-sonli maktabda Asosiy qonunimiz qabul qilingan kunga 23-yil toʻlishi munosabati bilan "Konstitutsiyam – baxtim, iqbolim kafolati” deb nomlangan tadbir oʻtkazildi.

Tadbirni maktab direktori oʻrinbosari Baxtiyor Bobojonov ochdi va yigʻilgan barcha oʻqituvchilarni, oʻquvchilarni mamlakatimiz tarixida yorqin sahifa boʻlib qolgan Konstitutsiyamiz qabul qilingan kun bilan qizgʻin qutladi. Oʻqituvchilar Xosiyat Qutimova va Goʻzal Gaipovalar Konstitutsiyamizning mazmuni va ahamiyati toʻgʻrisida maʼruza qildilar.

Oʻz muxbirimizdan.

* * *

40-sonli maktabda Oʻzbekiston Respublikasi Konstitutsiyasining 23-yilligiga bagʻishlab turli tadbirlar oʻtkazildi. 7-sinf oʻquvchilari orasida oʻtkazilgan "Konstitutsiyam – faxrim mening” mavzusidagi bellashuv davomida oʻquvchilar oʻzlarining epchil, chaqqon, zukko va bilimdonligini koʻrsatdilar. Ayniqsa, sahna koʻrinishlarida bizning erkin, farovon,ozod hayotimizni koʻraolmayotgan vatan xoinlariga nafratini, obod Vatanimizga muhabbati cheksizligini namoyon qildilar. Bundan tashqari, 5-, 6-sinflarda "Keksalar – hayot ziynati”, 7-sinflarda "Konstitutsiyam – faxrim mening” 8-sinflarda "Mahallang tinch – oʻzing tinch”, 9-sinflarda "Jaholatga qarshi maʼrifat” mavzularida insholar tanlovi oʻtkazilib, gʻoliblar aniqlandi.

Maktabda oʻtkazilayotgan bunday tadbirlar oʻquvchilar huquqiy ongining oʻsishida, huquqiy savodxonligining oshishida, ularda oʻz huquqlarini bilish va oʻrganish koʻnikmalarining shakllanishida muhim ahamiyat kasb etadi.

Raʼno NURMATOVA,

40-sonli maktabning ona tili va adabiyot fani oʻqituvchisi.

(Foto - http://index.uz)