Jasorat sinfi – Vatanga sadoqat maktabi

Amudaryo tumani Xotira maydonida yurtimiz kelajagi, ertangi kunimiz bunyodkorlari boʻlgan yoshlar uchun muhim va esda qolarli tadbir – 56-sonli umumtaʼlim maktabida tashkil etilgan jasorat sinfi oʻquvchilarining tantanali vaʼda berish marosimi boʻlib oʻtdi.

Mazkur tadbirda Amudaryo tumani hokimi Sobir Xoʻjametov boshchiligida masʼul rahbarlar, Qurolli Kuchlar tarkibiga kiruvchi vazirlik va idoralar hududiy rahbarlari, keng jamoatchilik vakillari hamda ommaviy axborot vositalari vakillari ishtirok etdilar. Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi. Shundan soʻng oʻquvchilar birin-ketin vaʼda berish maydoniga chaqirildi.

Jasorat sinfi tashkil etilishidan maqsad – yosh avlodni harbiy-vatanparvarlik milliy va umuminsoniy qadriyatlarga hurmat, Vatanga muhabbat va sadoqat ruhida tarbiyalash, taʼlim oluvchilarni “Temurbeklar maktabi” va “Jaloliddin Manguberdi” nomidagi harbiy akademik litseylar hamda Qurolli Kuchlar tarkibiga kiruvchi vazirlik va idoralarning oliy harbiy va harbiylashtirilgan taʼlim muassasalariga oʻqishga kirishlari uchun maqsadli tayyorlashdir. Bu sinfda tahsil olayotgan oʻquvchilar nafaqat nazariy bilim, balki dastlabki harbiy tayyorgarlik koʻnikmalarini ham egallab boradilar. Shuningdek, ularning ijodiy qobiliyatlari, jismoniy tayyorgarligi ham rivojlantiriladi.

Shu jihatdan qaraganda, jasorat sinfi yoshlarning nafaqat kelgusida harbiy xizmatga munosib boʻlishi, balki ularning mustahkam irodali, qatʼiyatli va intizomli inson boʻlib voyaga yetishida ham muhim oʻrin tutadi.

Tantanali marosimda soʻzga chiqqanlar oʻquvchilar va ularning ota-onalarini ushbu muhim voqea bilan samimiy tabrikladilar. Ular yoshlar zimmasiga yuklanayotgan masʼuliyatni yuksak qadrlab, Vatanga sadoqat bilan xizmat qilish har bir fuqaroning sharafli burchi ekanini taʼkidladilar.

Shuningdek, tadbir davomida tuman Sport maktabi shugʻullanuvchilari oʻz chiqishlari bilan ishtirokchilarda katta taassurot qoldirdilar. Yosh sportchilarning kuch-quvvat, epchillik va matonatni namoyish etgan chiqishlari tadbirga oʻzgacha ruh bagʻishladi.

Qayd etish joizki, ushbu jasorat sinflariga maktablarning 4-sinfini muvaffaqiyatli yakunlagan oʻquvchilar tanlov asosida qabul qilinadi. Jasorat sinflarida oʻqish muddati 7-yilni tashkil etadi. Ushbu sinflardagi oʻquvchilar soni 26 nafardan ortiq boʻlmasligi belgilangan.

Bugun yurtimizda yosh avlodni maʼnaviy barkamollik va vatanparvarlik ruhida tarbiyalashga alohida eʼtibor qaratilmoqda. Jasorat sinflarining tashkil etilishi ham ana shu ezgu tashabbuslarning amaliy ifodasi boʻlib, ertangi kun egalari boʻlgan oʻgʻil-qizlarimiz uchun mustahkam poydevor vazifasini oʻtamoqda.

Zero, Vatan taqdiri, uning kelajagi yoshlarning bilimdonligi, matonati va sadoqatiga chambarchas bogʻliqdir. Tumanimizda oʻtkazilgan ushbu marosim esa navqiron avlod qalbida yurtga mehr, sadoqat va fidoyilik tuygʻularini yanada kuchaytirishga xizmat qildi.

Charos Arslonova, tuman hokimligining Axborot xizmati rahbari.