Жасорат синфи – Ватанга садоқат мактаби

Амударё тумани Хотира майдонида юртимиз келажаги, эртанги кунимиз бунёдкорлари бўлган ёшлар учун муҳим ва эсда қоларли тадбир – 56-сонли умумтаълим мактабида ташкил этилган жасорат синфи ўқувчиларининг тантанали ваъда бериш маросими бўлиб ўтди.

Мазкур тадбирда Амударё тумани ҳокими Собир Хўжаметов бошчилигида масъул раҳбарлар, Қуролли Кучлар таркибига кирувчи вазирлик ва идоралар ҳудудий раҳбарлари, кенг жамоатчилик вакиллари ҳамда оммавий ахборот воситалари вакиллари иштирок этдилар. Тадбир аввалида Ўзбекистон ва Қорақалпоғистон Республикаларининг давлат мадҳиялари янгради. Шундан сўнг ўқувчилар бирин-кетин ваъда бериш майдонига чақирилди.

Жасорат синфи ташкил этилишидан мақсад – ёш авлодни ҳарбий-ватанпарварлик миллий ва умуминсоний қадриятларга ҳурмат, Ватанга муҳаббат ва садоқат руҳида тарбиялаш, таълим олувчиларни “Темурбеклар мактаби” ва “Жалолиддин Мангуберди” номидаги ҳарбий академик лицейлар ҳамда Қуролли Кучлар таркибига кирувчи вазирлик ва идораларнинг олий ҳарбий ва ҳарбийлаштирилган таълим муассасаларига ўқишга киришлари учун мақсадли тайёрлашдир. Бу синфда таҳсил олаётган ўқувчилар нафақат назарий билим, балки дастлабки ҳарбий тайёргарлик кўникмаларини ҳам эгаллаб борадилар. Шунингдек, уларнинг ижодий қобилиятлари, жисмоний тайёргарлиги ҳам ривожлантирилади.

Шу жиҳатдан қараганда, жасорат синфи ёшларнинг нафақат келгусида ҳарбий хизматга муносиб бўлиши, балки уларнинг мустаҳкам иродали, қатъиятли ва интизомли инсон бўлиб вояга етишида ҳам муҳим ўрин тутади.

Тантанали маросимда сўзга чиққанлар ўқувчилар ва уларнинг ота-оналарини ушбу муҳим воқеа билан самимий табрикладилар. Улар ёшлар зиммасига юкланаётган масъулиятни юксак қадрлаб, Ватанга садоқат билан хизмат қилиш ҳар бир фуқаронинг шарафли бурчи эканини таъкидладилар.

Шунингдек, тадбир давомида туман Спорт мактаби шуғулланувчилари ўз чиқишлари билан иштирокчиларда катта таассурот қолдирдилар. Ёш спортчиларнинг куч-қувват, эпчиллик ва матонатни намойиш этган чиқишлари тадбирга ўзгача руҳ бағишлади.

Қайд этиш жоизки, ушбу жасорат синфларига мактабларнинг 4-синфини муваффақиятли якунлаган ўқувчилар танлов асосида қабул қилинади. Жасорат синфларида ўқиш муддати 7 йилни ташкил этади. Ушбу синфлардаги ўқувчилар сони 26 нафардан ортиқ бўлмаслиги белгиланган.

Бугун юртимизда ёш авлодни маънавий баркамоллик ва ватанпарварлик руҳида тарбиялашга алоҳида эътибор қаратилмоқда. Жасорат синфларининг ташкил этилиши ҳам ана шу эзгу ташаббусларнинг амалий ифодаси бўлиб, эртанги кун эгалари бўлган ўғил-қизларимиз учун мустаҳкам пойдевор вазифасини ўтамоқда.

Зеро, Ватан тақдири, унинг келажаги ёшларнинг билимдонлиги, матонати ва садоқатига чамбарчас боғлиқдир. Туманимизда ўтказилган ушбу маросим эса навқирон авлод қалбида юртга меҳр, садоқат ва фидойилик туйғуларини янада кучайтиришга хизмат қилди.

Чарос Арслонова, туман ҳокимлигининг Ахборот хизмати раҳбари.