Kam taʼminlangan, oʻzgalar parvarishiga muhtoj, nogironligi boʻlgan fuqarolarga kompleks ijtimoiy xizmatlar koʻrsatilmoqda

Mangʻit shahridagi Boy ovul mahallasida 605 ta xonadon tarkibidagi 917 ta oilada 4 ming 117 nafar aholi istiqomat qiladi. “Mahalla yettiligi” bilan Amudaryo tumani “Inson” ijtimoiy xizmatlar boʻlimining mahalladagi kompleks xizmat koʻrsatuvchi ijtimoiy xodimi hamkorligida uyma-uy kirib borib oʻtkazilgan xatlov natijalariga koʻra, 312 ta oila kam taʼminlangan, ijtimoiy himoyaga muhtoj oilalar roʻyxatiga kiritildi. Mazkur oilalarning turmush sharoitlari, iqtisodiy taʼminlanganlik darajasi oʻrganilib, ularga rejaviy jadval asosida zarur ijtimoiy xizmatlar koʻrsatish choralari koʻrildi.

“Inson” ijtimoiy xizmatlar markazi va uning hududiy boʻlimlari tashkil etilib, kam taʼminlangan, oʻzgalar parvarishiga, yordamiga muhtoj, nogironligi boʻlgan fuqarolarni har tomonlama qoʻllab-quvvatlash boʻyicha xizmatlarning yangi tizimi yoʻlga qoʻyilgani mahalladagi kompleks ijtimoiy xizmat koʻrsatish xodimi Iroda Sultonovaning oʻz faoliyatini samarali olib borishida ijobiy samara bermoqda.

Boy ovul mahallasida ham uyma-uy yurib xatlov oʻtkazilganda aniqlangan, ogʻir ahvolga tushib qolgan va shunday holatga tushish ehtimoli yuqori boʻlgan 16 ta oila keys menejment asosida baholandi. Ularning barchasiga belgilangan rejaviy jadval asosida ijtimoiy xizmatlar koʻrsatildi hamda zarur yordamlar berilib, ijtimoiylashuviga koʻmaklashildi. Oʻzgalar parvarishiga muhtoj boʻlgan bir nafar yolgʻiz yashovchi keksa fuqaro aniqlanib, uning ijtimoiylashuvini taʼminlash maqsadida uyida maishiy-ijtimoiy xizmat koʻrsatuvchi ijtimoiy xodim assistenti biriktirildi.

Mahallada “Kambagʻallikdan farovonlik sari” dasturini amalga oshirish boʻyicha ham samarali ishlar amalga oshirilmoqda. Xususan, uyma-uy kirib oʻrganishlar va “Kambagʻallik reyestri” soʻrovnomasini oʻtkazish natijasida kambagʻallikka tushib qolish ehtimoli boʻlgan 151 xonadon aniqlandi. Shundan 74 ta oila “Kambagʻallik reyestri”ga kiritildi hamda individual xizmat koʻrsatish boʻyicha rejalar tuzilib, barcha xizmatlar reja asosida amalga oshirilmoqda.

Mazkur reyestrga kiritilgan kambagʻal oilalar aʼzolarining dunyoqarashini shakllantirish, moliyaviy savodxonligini oshirish maqsadida “Inson” ijtimoiy xizmatlar markazi psixologlari tomonidan muntazam ravishda kognitiv terapiya trening mashgʻulotlari oʻtkazilmoqda.

Shuningdek, nogironligi boʻlgan yoki yoshi katta, oʻzgalar parvarishiga muhtoj aʼzosi boʻlgan “Kambagʻallik reyestri”dagi oilalarning mehnatga layoqatli aʼzolari bandligini taʼminlash maqsadida “Faol hayotga qadam” dasturi yoʻlga qoʻyildi. Unga koʻra, uy sharoitida qarab turish xizmati, tibbiy-ijtimoiy reabilitatsiya xizmati, kunduzgi qatnov asosida qarab turish, shaxsiy yordamchi xizmatlari joriy etildi. “Kambagʻallik reyestri” roʻyxatida turuvchi 2 ta oilaga ijtimoiy xodim assistenti biriktirildi va ayni paytda ularga uyida maishiy-ijtimoiy xizmat koʻrsatilib kelinmoqda.

Hozirgi kunda dolzarb masalalardan biri boʻlgan zoʻravonlikka uchragan xotin-qizlar va ularning voyaga yetmagan farzandlarining tinchligi, osoyishtaligini taʼminlashga ham alohida eʼtibor qaratilmoqda. Uyma-uy kirib borib, aniqlangan ana shunday oilalarga “Inson” ijtimoiy xizmat koʻrsatish markazining tuman boʻlimi huquqshunosi va psixologlari biriktirilib, zarur xizmat va yordamlar koʻrsatilmoqda.

Shuningdek, nogironligi boʻlgan shaxslarning salomatligi va yashash sharoitini yaxshilash maqsadida reabilitatsiya qilishning texnik vositalariga muhtojligi yuzasidan soʻrovnomalar ham oʻtkazildi. Soʻrovnoma jarayonida aniqlangan ana shu toifadagi fuqarolar vaucher asosida 2 ta xonaga moʻljallangan oʻrindiqli aravacha, 3 ta hassa, 3 ta tirsakli qoʻltiqtayoq, 3 ta sayr qilishga moʻljallangan oʻrindiqli aravacha, 2 ta raqamli eshitish moslamasi, 2 juft qoʻltiqtayoq, 2 ta koʻzi ojizlar hassasi bilan taʼminlandi.

Taʼkidlash joizki, Prezidentimiz tashabbusi va Farmonlari bilan kam taʼminlangan fuqarolarni ijtimoiy himoyalash mahalla darajasida tashkil etilib, ijtimoiy xizmatlar sifati tobora oshib borayotgani koʻplab oilalarga nur, farovonlik va xotirjamlik olib kirdi. Katta umid bilan mahalla ostonasiga qadam qoʻygan insonlarning ogʻiri yengil, mushkullari oson boʻlayotgani bois, ularning hayotdan rozi boʻlib, zavq olib yashashlari uchun imkon yaratildi, kelajakka ishonchi oshdi. Zero, ishonch tuygʻusi – jamiki ezgu ishlarga qanotdir.

Robiya YOʻLDOShEVA