Deputat saylovchilarning dolzarb muammolariga eʼtibor qaratdi

Joriy yilning 28-iyul sanasida Amudaryo tumanidagi 31-sonli Oʻrta qalʼa saylov okrugidan Tadbirkorlar va ishbilarmonlar harakati — Oʻzbekiston liberal-demokratik partiyasidan Qoraqalpogʻiston Respublikasi Joʻqorgʻi Kengesi deputati Ilhom Polvonov oʻz saylovchilari bilan uchrashdi. Deputat bilan uchrashuv tadbirida OʻzLiDeP Amudaryo tuman Kengashi apparati rahbari Yaxshimurod Ahmedov, Xalq deputatlari  tuman Kengashi deputati Madamin Kazakov, Beruniy nomli, Doʻstlik, Durunki mahallalari masʼullari va saylovchilari ishtirok etishdi.

Uchrashuvda saylovchilar tomonidan mazkur mahallalar aholisi hayotiga doir infratuzilma bilan bogʻliq bir qator muammoli masalalar koʻtarildi. Xususan, Beruniy nomli mahallaning shahar markaziga yaqin qismidagi elektr energiyasi uzatish ustunlari 1964-yilda oʻrnatilgan boʻlib, ayni paytda yaroqlilik muddati oʻtib boʻlgan. Ustunlarning yer qismidagi beton tayanchlarda allaqachon yemirilish boshlangan. Ustunlar yaqin vaqt ichida almashtirilmasa, tashqi taʼsir natijasida qulab tushishi va bu hudud aholisi hayotiga xavf tugʻdirishi mumkin. Saylovchilar tomonidan koʻtarilgan ushbu masala yuzasidan deputat Ilxom Polvonov shu yerning oʻzida tuman elektr tarmoqlari korxonasi rahbari bilan telefon orqali bogʻlanib, muammoli masalani ijobiy hal etish choralarini koʻrdi va soha masʼullari tomonidan tayanch ustunlarini almashtirish boʻyicha ishlar olib boriladigan boʻldi.

Shu kuni deputat Ilxom Polvonov Arna boʻyi mahallasi hududidagi saylovchilari bilan ham uchrashib, mahalla aholisini qiynab kelayotgan muammoli masalalarni oʻrgandi. Uchrashuvda mahalla hududidan oqib oʻtuvchi 3,8 km. uzunlikdagi ariqni qazish, hududda aholiga tibbiy xizmat koʻrsatishni yaxshilash bilan bogʻliq masalalar qizgʻin muhokamalar markazida boʻldi.

Ayniqsa, mahallada dehqonchilik madaniyatini yuksaltirishda suv yoʻllarining oʻtkazuvchanlik holatini yaxshilash, yillar davomida tozalanmagan suv yoʻllarini maxsus texnika yordamida qazib, tozalash juda muhimligi taʼkidlandi. Bundan tashqari, soʻnggi yillarda aholi sonining ancha oʻsganini inobatga olib, ularning namunali tibbiy xizmatdan bahramand boʻlishi uchun hududda oilaviy shifokorlik punktini qurish masalasiga eʼtibor qaratildi.

Har ikki masala  yuzasidan bildirilgan fikrlar va takliflar deputat tomonidan alohida tizimga olinib, mahalla hududidan oqib oʻtuvchi 3,8 km. uzunlikdagi ariqni maxsus texnikalarni jalb qilgan holda  qazish  boʻyicha tegishli tashkilotlar bilan bogʻlanib, muammoning yechimi yuzasidan choralar koʻrildi. Shuningdek, mahalla hududida oilaviy shifokorlik punktini qurish boʻyicha Qoraqalpogʻiston Respublikasi Sogʻlikni saqlash vazirligiga deputat soʻrovi yuborish orqali muammoni ijobiy hal etish choralari koʻriladigan boʻldi. Bundan tashqari,  saylovchilar Oʻrta qalʼa ovuli hududida bolalar oʻyin maydonchasini qurish, Yangiobod mahallasi hududidan oqib oʻtuvchi zaxkash ustiga koʻprik qurish, mahalla koʻchalariga qum-shagʻal aralashmasi toʻshash zarurligi haqidagi muammolarni hal etishda deputatning ishtiroki, amaliy koʻmagi zarurligini taʼkidladilar. Ushbu masalalar ham deputat tomonidan alohida qayd etilib, tizimga olindi va tegishli tashkilotlar orqali  muammolarni ijobiy hal etish choralari koʻrildi.

Uchrashuv davomida deputat bilan saylovchilar oʻzaro dildan muloqot qildilar. Xususan, farzandlar taʼlim-tarbiyasi, oilalar mustahkamligini taʼminlashda, aholining ish bilan bandligi darajasini oshirishda yoshlar tadbirkorligining ahamiyati kabi masalalar boʻyicha fikr almashdilar hamda oʻzlarini qiziqtirgan savollar bilan murojaat qildilar, ularning barcha savollariga deputat Ilxom Polvonov oʻz vakolati doirasida batafsil javob berdi.

Boʻlib oʻtgan uchrashuv siyosiy partiyalarning aholi turmush farovonligini oshirish yoʻlidagi saylovoldi dasturiy-rejalarini amalga oshirish borasida xalq bilan yakdilligining yorqin ifodasi boʻldi.

ROBIYa YOʻLDOShEVA.