“Yuzda yurma – yuzga kir” shiori ostida “Targʻibot avtokarvoni” koʻrgazmali tadbiri tashkil etildi

Mamlakatimizda aholining turmush darajasi oshib borayotgani natijasida shaxsiy avtomashinaga ega fuqarolar soni ham kun sayin ortib bormoqda. Bu esa odamlar hayotida yangi imkoniyatlar va qulayliklar yaratib, uzoq masofalarning yaqinlashishiga, ogʻir ishlar osonlashishiga xizmat qilmoqda. Biroq transport vositalari oqimining koʻpayishi bilan birga yoʻllarda tirbandliklar va yoʻl-transport hodisalarining oldini olish masalasi dolzarb ahamiyat kasb etmoqda. Shu bois yoʻl harakati xavfsizligini taʼminlashda yoʻl-patrul xizmati xodimlari va harakat ishtirokchilarining masʼuliyatini yanada oshirish talab etilyapti.

Shu maqsadda Amudaryo tumanida “Xavfsiz va sogʻlom yurt” keng qamrovli tezkor profilaktik tadbiri doirasida “Targʻibot avtokarvoni” koʻrgazmali tadbiri tashkil etildi. Tuman hokimligi binosi oldida masʼul idoralar rahbarlari hamda hamkor tashkilotlar vakillari ishtirokida yigʻilish boʻlib oʻtdi. Unda yoʻl harakati qoidalariga rioya etish madaniyatini oshirish, yoʻl-transport hodisalarining oldini olishga qaratilgan chora-tadbirlar atroflicha muhokama qilindi.

Maʼlumotlarga koʻra, 2024-yilda yurtimizda 9364 ta yoʻl-transport hodisasi rasman qayd etilgan. Ulardan 3045 tasi yuk mashinalari va yoʻlovchi tashuvchi transport vositalari ishtirokida sodir boʻlgan. Achinarlisi 351 ta hodisa haydovchilar ish va dam olish tartibiga rioya qilmagani, aniqrogʻi, rulda uxlab qolgani sababli yuz bergan. Bunday holatlar 189 nafar insonning hayotiga zomin boʻlgan, 285 nafar fuqaro esa turli darajada tan jarohati olgan.

Haydovchilar tomonidan avtomobil boshqarayotgan paytda uxlab qolish holati nafaqat mamlakatimizda, balki jahon miqyosida ham keng tarqalgan fojiali omillardan biri hisoblanadi. Shu bois mutaxassislar uzoq safarlar oldidan majburiy dam olish va hushyorlikni taʼminlash tartibiga qatʼiy amal qilishni tavsiya etmoqda.

Yoʻl-transport hodisalarining ayanchli oqibatlarini keng jamoatchilikka yaqindan tushuntirish maqsadida “Targʻibot avtokarvoni” yoʻl-transport hodisalarida texnik shikastlangan avtomashinalar ortilgan maxsus evakuatorlar tarkibida tumanning markaziy koʻchalari boʻylab harakatlandi. Bu koʻrgazmali tadbir orqali fuqarolarni hushyorlikka chaqirish, qoidalarga rioya qilmaslik qanday oqibatlarga olib kelishi mumkinligini anglatish koʻzda tutildi.

Avtokarvon “Yuzda yurma – yuzga kir” shiori ostida tashkil etilib, tumanning aholi gavjum va serqatnov koʻchalaridan oʻtdi. Tadbir chogʻida aholiga piyoda sifatida harakatlanish qoidalari batafsil tushuntirildi. Shu bilan birga, fuqarolar tomonidan berilgan savollarga mutaxassislar tomonidan atroflicha javoblar berildi.

Qoraqalpogʻiston Respublikasi Ichki ishlar vazirligining Jamoat xavfsizligi xizmati Yoʻl harakati xavsizligi boshqarmasi masʼullari va tuman IIB Yoʻl patrul xizmati guruhi hamkorligida tashkil etilgan uchrashuvlarda haydovchilar bilan jamoat transport vositalarini boshqarishda xavfsizlik, harakat tezligi, piyodalar huquqlari xususida ochiq muloqotlar oʻtkazildi. Shuningdek, tajribali haydovchilar tomonidan yosh avlodga amaliy tavsiyalar berildi.

Soʻnggi yillarda aholi oʻrtasida skuter, moped va elektrosamokatlardan foydalanish keng tarqalmoqda. Ammo ayrim hollarda ushbu transport vositalarini yosh bolalar yoki tajribasiz ayollar boshqarayotgani natijasida yoʻl-transport hodisalari yuz bermoqda. Shu bois targʻibot tadbirlari doirasida aholiga bu vositalar ham toʻlaqonli transport ekani va ularda harakatlanishda ham yoʻl harakati qoidalariga amal qilish shart ekani tushuntirilmoqda.

Yoʻllarda harakatlanish vaqtida transport boshqaruvchilari va piyodalarning har bir harakati inson hayotiga daxldor. Shu sababli yoʻl qoidalariga amal qilish, diqqat va hushyorlik bilan harakatlanish barchamiz uchun masʼuliyatdir. “Targʻibot avtokarvoni” kabi tadbirlar aynan shu masʼuliyatni aholi, ayniqsa, bolalar va yoshlar ongiga singdirishda muhim oʻrin tutadi. Yoʻllarda xavfsizlikni taʼminlash faqatgina davlat idoralarining emas, balki har bir fuqaroning faol ishtiroki va harakatlanish madaniyatiga bogʻliqdir.

Shohzod Qurbonboyev tayyorladi.