45-sonli umumtaʼlim maktabida “Kasbiy rivojlanish soati” mashgʻulotlari oʻtkazildi

Amudaryo tumani Maktabgacha va maktab taʼlimi boʻlimi tasarrufidagi 45-sonli umumtaʼlim maktabida “Kasbiy rivojlantirish soati” loyihasi doirasida oʻqituvchilar uchun amaliy mashgʻulot — ochiq dars tashkil etildi. Bunday tadbirlar oʻqituvchilarning kasbiy mahoratlarini oshirish, yangi innovatsion taʼlim usullari bilan tanishtirish va pedagogik faoliyatni takomillashtirishda muhim ahamiyatga ega. Ochiq darsda boshlangʻich sinf oʻqituvchilari faol ishtirok etdi.

Tadbirda metodik yondashuvlar va didaktik oʻyinlar orqali taʼlim jarayonining samaradorligini oshirishga eʼtibor qaratildi va zamonaviy taʼlim usullari va metodik yondashuvlar namoyish qilindi. Oʻqituvchilarga oʻz bilimlarini yangilash, innovatsion oʻquv vositalari bilan tanishish va ularni oʻz darslarida qoʻllashga ishtiyoqni oshirishga qaratilgan faoliyatlar olib borildi. Shu bilan birga, pedagogik faoliyatning samaradorligini oshirishga katta eʼtibor berildi, bu esa taʼlim jarayonida oʻquvchilarni faol va qiziqarli tarzda oʻqitish imkoniyatlarini yaratadi.

Tadbirda boshlangʻich sinf oʻqituvchisi, yetakchi pedagog Dilfuza Abdurahmonova oʻzining boy tajribasi va metodik yondashuvlari orqali hamkasblari bilan tajriba almashdi. Mashgʻulot davomida oʻqituvchilarga taʼlimga universal dizayn moduli asosida yondashuv namoyish etildi. Mazkur metod sinfdagi har bir oʻquvchining individual xususiyatlarini hisobga olishga qaratilgan boʻlib, nafaqat boshlangʻich sinfda, balki butun taʼlim tizimida tobora keng qoʻllanilmoqda.

Ochiq darsda, shuningdek, matematikani oʻqitishda yangi va innovatsion usullar namoyish qilindi. Dilfuza Abdurahmonova “Baliq ovi”, “Sehrli sandiq” va “Issiq choy” kabi taʼlim-tarbiya oʻyinlaridan foydalanib, taʼlim jarayonini qanday jonli va qiziqarli qilish mumkinligini koʻrsatdi. Ushbu metodlar oʻqituvchilarni oʻz darslarida didaktik oʻyinlarni qoʻllashga ilhomlantirdi. Didaktik oʻyinlar yordamida darsning samaradorligi va oʻquvchilarning mavzuga boʻlgan qiziqishi oshadi. Oʻqituvchilar shu orqali oʻquvchilarning taʼlimga boʻlgan qiziqishini qanday oshirish mumkinligini oʻrgandilar.

“Kasbiy rivojlanish soati” mashgʻulotlari pedagoglar oʻrtasidagi oʻzaro tajriba almashish, ilgʻor pedagogik usullar bilan tanishish va amaliy koʻnikmalarni mustahkamlashga xizmat qilyapti. Har haftaning shanba kuni bayramona ruhda oʻtkaziladigan ushbu tadbirlar oʻqituvchilarni yangi bilimlar bilan tanishtiradi va ularga innovatsion yondashuvlarni qoʻllash imkoniyatini yaratadi. Oʻqituvchilar oʻzaro tajriba almashib, oʻz ishlarida yangiliklardan boxabar boʻlishadi. Bu, oʻz navbatida, taʼlim tizimining rivojlanishiga, oʻquvchilar uchun sifatli taʼlimni taʼminlashga yordam beradi.

Dilfuza Abdurahmonovaning pedagogik malakasi va yangi metodlarni oʻrganishga undovchi yondashuvi, shuningdek, bolalar psixologiyasini chuqur anglashga asoslangan pedagogik yondashuvi hamkasblari uchun ibrat boʻlib xizmat qilyapti. Bu kabi tajriba almashish oʻqituvchilarning oʻz ishlariga yondashuvlarini yaxshilash, ularga metodik jihatdan yangiliklarni oʻzlashtirishga yordam beradi. Ochiq darslar pedagoglarning kasbiy rivojlanishiga va pedagogik faoliyatning samaradorligini oshirishga katta hissa qoʻshdi.

Boshlangʻich sinf oʻqituvchilari uchun tashkil etilgan bunday mashgʻulotlar oʻqituvchilarning kasbiy mahoratini yanada oshirishda muhim vosita boʻlishi shubhasiz.

Sevinch Oʻmirboyeva, Oʻzbekiston jahon tillari universiteti talabasi, tahririyat amaliyotchisi.