40-sonli maktabda “Doʻstlik maktablari” nomli festival oʻtkazildi

Yaqinda taʼlim sohasidagi muhim tashabbus – “Doʻstlik maktablari” loyihasi doirasidagi “Doʻstlik avtobusi” Amudaryo tumaniga tashrif buyurdi. Tadbir doirasida Qoraqalpogʻiston Respublikasi Maktabgacha va maktab taʼlimi vazirligi masʼullari, shuningdek, Nukus shahridagi 8-sonli, Kegeyli tumanidagi 14-sonli va Ellikqalʼa tumanidagi 25-sonli umumtaʼlim maktablaridan kelgan ustoz va oʻquvchilar Amudaryo tumani Maktabgacha va maktab taʼlimi boʻlimi tasarrufidagi 40-sonli umumtaʼlim maktabida yaratilgan shart-sharoitlar, oʻquv jarayoni va erishilgan yutuqlar bilan yaqindan tanishdilar.

Mehmonlar tuman Maktabgacha va maktab taʼlimi boʻlimi boshligʻi Yalgʻash Shomuratov hamda maktab direktori Sanobar Xoʻjamurodova boshchiligida soha xodimlari va faol oʻquvchilar tomonidan maktab hovlisida tantanali ravishda kutib olindi. Qadimiy qadriyatimiz ifodasi sifatida mehmonlarga non-tuz tutildi.

Tadbirda milliy liboslarda namoyon boʻlgan oʻquvchi-yoshlar mehmonlarni iliq va doʻstona ruhda qarshi olishdi. Ularning rang-barang milliy kiyimlari nafaqat xalqimizning boy madaniy merosini, balki xalqlar oʻrtasidagi doʻstlik va birdamlikni ham ifodaladi. Bu orqali yoshlar oʻrtasida umuminsoniy qadriyatlarga hurmat tuygʻusi yuksak saviyada namoyon boʻldi. Ayniqsa, tabiat bagʻrida rasm chizish bilan mashgʻul boʻlgan oʻquvchilar mehmonlar eʼtiborini tortdi. Festivalda tumanimizning 19-, 25-, 26-, 30- va 54-sonli umumtaʼlim maktablari oʻquvchilari va pedagoglari faol ishtirok etib, tadbirga yanada koʻtarinki kayfiyat bagʻishladilar.

Tadbir avvalida masʼullar tomonidan bunday madaniy-maʼrifiy uchrashuvlarning ahamiyati, yoshlar oʻrtasida doʻstlik, bagʻrikenglik, oʻzaro hamkorlikni mustahkamlashdagi oʻrni hamda uning tarbiyaviy jihatdan mazmun-mohiyati alohida taʼkidlab oʻtildi. Chunki yurt tinchligi — eng ulugʻ neʼmat. Yagona xalq sifatida yelkadosh boʻlib yashash — biz uchun nafaqat hayot tarzi, balki maʼnaviy yuksaklik mezonidir.

Bugungi murakkab global jarayonlar davrida ana shunday ahil va totuv jamiyatni barpo etish, yoshlarimizni doʻstlik va bagʻrikenglik ruhida tarbiyalash taʼlim muassasalari va ota-onalar bilan bir qatorda jamiyatning barcha qatlamlari uchun ham muhim vazifa hisoblanadi. Shu maʼnoda, “Doʻstlik maktablari” loyihasi doirasida amalga oshirilayotgan har bir tadbir oʻquvchi-yoshlar qalbida millatlararo totuvlik, oʻzaro hurmat va hamjihatlik tuygʻusini mustahkamlashga qaratilgani bilan eʼtiborga molikdir.

Qolaversa, yosh avlodni milliy qadriyatlar, urf-odatlar va anʼanalar bilan yaqindan tanishtirish, ularning ijodiy salohiyatini rivojlantirish, jamoaviy ruhini shakllantirish ham ushbu loyihaning asosiy maqsadlaridan sanaladi.

Qoraqalpogʻiston Respublikasi Joʻqorgʻi Kengesi tashabbusi bilan Qoraqalpogʻiston Respublikasi Maktabgacha va maktab taʼlimi vazirligi faoliyatini 2025-yilda rivojlantirish boʻyicha ishlab chiqilgan “Yoʻl xaritasi”da ham ana shunday tashabbuslar alohida oʻrin olgan. Unda belgilangan vazifalar ijrosini taʼminlash maqsadida hududlarda “Doʻstlik maktablari” loyihasi faol ravishda amalga oshirilmoqda.

Ayni paytda joylarda koʻplab madaniy-maʼrifiy tadbirlar, uchrashuvlar va festivallar tashkil etilmoqda. Bu tadbirlar orqali oʻquvchi va ustozlar oʻrtasida muloqot, oʻzaro hamkorlik va tajriba almashuv jarayoni yanada kengayib, taʼlim sifatini oshirishda muhim omilga aylanmoqda.

Tadbirning yana bir muhim qismi sifatida mehmonlarga maktab jamoasi tomonidan tayyorlangan qiziqarli dasturlar namoyish etildi. Ekskursiya davomida mehmonlar uchun maktab boʻylab tur tashkil etildi, unda maktab direktori Sanobar Xoʻjamurodova taʼlim maskanidagi oʻquv-tarbiya jarayonlari, fan xonalari, moddiy-texnik baza va oʻqituvchi hamda oʻquvchilarning ijodiy faoliyati haqida atroflicha maʼlumot berdi. Mehmonlar maktabning taʼlim jarayonlari bilan yaqindan tanishib, oʻquvchilarning bilim olishga boʻlgan qiziqishi va faolligiga yuqori baho berishdi.

Ekskursiya jarayonida variativ sinf oʻquvchilari tabiiy va aniq fanlar, shuningdek, xorijiy tillarga oid bilim va koʻnikmalarini amalda namoyon etishdi. Ular tayyorlagan qisqa chiqishlar, interaktiv mashgʻulotlar va koʻrgazmali materiallar orqali maktabdagi taʼlim sifati va oʻquv jarayonining samaradorligi yaqqol namoyon boʻldi.

Mehmonlarda, ayniqsa, "Shuhrat" medali sohibi, oliy toifali ingliz tili fani oʻqituvchisi Nurbek Jumaniyozov rahbarligida oʻtkazilgan mashgʻulotlar unutilmas taassurot qoldirdi. Mashgʻulotlar ishtirokchilarga oʻqituvchining mahorati, ilgʻor uslublar orqali taʼlim berishi, shuningdek, oʻquvchilarning faolligi bilan manzur boʻldi. Taʼkidlash joizki, maktabning variativ sinf oʻquvchilari 100 foizlik natija koʻrsatib, yurtimizdagi va xorijdagi nufuzli oliy taʼlim muassasalariga talabalikka qabul qilinyapti. Bu, oʻz navbatida, taʼlim muassasasining sifat darajasini koʻrsatadi.

Ekskursiya davomida mehmonlar “Mohir qoʻllar” va robototexnika toʻgaraklari faoliyati bilan yaqindan tanishish imkoniyatiga ega boʻlishdi. Ayniqsa, “Mohir qoʻllar” toʻgaragida chevar oʻquvchi-qizlar tomonidan tayyorlangan qoʻl mehnati mahsulotlari – milliy ruhda bezatilgan yumshoq oʻyinchoqlar, turli tikish-bichish ishlari va badiiy-amaliy namunalar mehmonlarda katta qiziqish uygʻotdi.

Shuningdek, yosh kitobxonlar bilan maktab kutubxonasida samimiy muloqot ham tashkil etildi. Suhbat davomida oʻquvchilarning kitoblarga boʻlgan muhabbati, badiiy adabiyotga boʻlgan munosabati va mutolaa madaniyati yuzasidan fikr almashildi. Maktab oʻquvchilari turli kitobxonlik tadbirlari, sheʼrxonlik kechalari, debatlar va adabiy tanlovlarda faol ishtirok etib kelmoqda. Kutubxona fondi nafaqat oʻzbek adabiyoti, balki jahon adabiyotining ham nodir namunalari, klassik hamda zamonaviy asarlar bilan boyitilgan boʻlib, yoshlar maʼnaviyatini yuksaltirishda muhim omil boʻlmoqda.

Ekskursiya maktabda tashkil etilgan “Turon teatri” jamoasining chiqishlari bilan yuqori ruhda davom etdi. Yosh ijodkorlar tomonidan sahnalashtirilgan badiiy chiqishlar, milliy va zamonaviy ohanglarning uygʻunligi, musiqa va raqsning jozibali tarzda namoyon etilishi tomoshabinlarda katta taassurot qoldirdi. Milliy va zamonaviy cholgʻu asboblari sadosi ostida jonli ijro etilgan, yoshlik tuygʻularini tarannum etuvchi kuy-qoʻshiqlar yuraklarga ilhom bagʻishladi. Yosh ijodkorlar qator chiqishlari bilan yigʻilganlar olqishiga sazovor boʻldi.

Tadbirning ikkinchi qismi maktabning faollar zalida davom etdi. Bu yerda “Barkamol avlod” bolalar markazi qoshidagi “Shoʻx bolalar” jamoasining chiqishlari hamda maktab oʻquvchilari tomonidan tayyorlangan rang-barang kontsert dasturlari namoyish etildi. Tomoshabinlarga oʻzbek, qoraqalpoq, turkman, qozoq va rus xalqlarining kuy-qoʻshiqlari, milliy raqslari va teatr sahna koʻrinishlari taqdim etildi. Har bir chiqish milliy ruh, milliy libos va oʻziga xos badiiy uslub bilan boyitilgan boʻlib, ishtirokchilar va mehmonlarda katta taassurot qoldirdi.

Ayniqsa, turli millatlar vakillari sifatida chiqish qilgan yoshlarning sahnada mushtarak gʻoya — doʻstlik va hamjihatlikni targʻib qilishi yuraklarga samimiy tuygʻular bagʻishladi. Bu chiqishlar millatlararo totuvlik va oʻzaro hurmatning amaliy ifodasi sifatida barchani ruhlantirdi. “Doʻstlik maktablari” loyihasi — bu faqatgina tashrif yoki kontsert emas, balki qalblar yaqinlashuvi, doʻstlik koʻpriklarining qurilishi, maʼnaviy birlik sari tashlangan muhim qadamdir. Amudaryo tumanida tashkil etilgan ushbu tadbir buning yorqin isboti boʻldi.

Bunday tashriflar oʻquvchi-yoshlarda Vatanga sadoqat, doʻstlik va oʻzaro hurmat tuygʻularini mustahkamlash, milliy qadriyatlarni ardoqlash, jamoada fikr yuritish va ijodiy salohiyatni namoyon etishda muhim ahamiyat kasb etadi. Yurtimizda tinchlik, barqarorlik va millatlararo hamjihatlikni taʼminlashga qaratilgan bu kabi saʼy-harakatlar yosh avlod qalbida ezgulik, bagʻrikenglik, hamkorlik va yurtparvarlik tuygʻularini mustahkamlab, ularni haqiqiy fuqarolik pozitsiyasiga ega shaxslar etib tarbiyalashda beqiyos ahamiyat kasb etadi.

Shohzod Qurbonboyev.