Kelajak uchun muvaffaqiyatli kasb-hunarlarni egallash – davr talabi

Mamlakatimizda yoshlarning kasb-hunar oʻrganishi, amaliy koʻnikmaga ega boʻlishi va zamonaviy mutaxassis sifatida shakllanishiga alohida eʼtibor qaratilmoqda. Bu boradagi saʼy-harakatlar joylardagi kasb-hunar taʼlimi muassasalari faoliyatida ham yaqqol namoyon boʻlmoqda. Xususan, Amudaryo tumani 2-sonli politexnikumi nafaqat oʻquvchilarga kasb oʻrgatish, balki ularning hayotiy yoʻlini toʻgʻri tanlashlariga koʻmaklashishda ham faollik koʻrsatmoqda.

Politexnikumda oʻtkazilgan navbatdagi “Kasblar festivali” hamda “Ochiq eshiklar kuni” tadbirlari muassasaning taʼlim salohiyati va kasbiy yoʻnalishlardagi imkoniyatlarini keng jamoatchilikka namoyish qilishda muhim platforma vazifasini oʻtadi.

Tadbirda tuman prokuraturasi xodimlari, barcha umumtaʼlim maktablarining 9-11-sinf bitiruvchilari, Maktabgacha va maktab taʼlimi boʻlimi psixologlari, oʻqituvchilar, ota-onalar ishtirok etishdi.

Tadbirni politexnikum direktorining yoshlar bilan ishlash boʻyicha oʻrinbosari Jasurbek Atajonov kirish soʻzi ochib, mamlakatimizda kasb-hunar taʼlimiga berilayotgan eʼtibor, yoshlarni mutaxassis sifatida yetishtirishdagi davlat siyosati xususida toʻxtalib oʻtdi. Shuningdek, taʼlim muassasasida mavjud boʻlgan yoʻnalishlar haqida batafsil maʼlumot berildi.

Tadbir avvalida oʻtgan oʻquv yilida bilim va faoliyati bilan yuqori natijalarga erishgan oʻquvchilar tantanali ravishda taqdirlandi.

Ishtirokchilar maxsus bezatilgan hovlida tashkil etilgan koʻrgazmalar, toʻgaraklar va ishlab chiqarish ustaxonalari faoliyati bilan tanishdilar.

Politexnikumdagi zamonaviy oʻquv va amaliyot xonalari, laboratoriyalar, kompyuter va multimedia sinflari, maxsus kasb-hunar xonalari ishtirokchilarda katta taassurot qoldirdi. Oʻqituvchilar va amaliyot ustalari ishtirokchilarga taʼlim muassasasidagi imkoniyatlar haqida maʼlumot berib, kasb-hunar taʼlimi jarayonini namoyish etdi.

Festival doirasida politexnikumda tahsil olayotgan chevar qizlar tomonidan tayyorlangan milliy va zamonaviy liboslar koʻrgazmasi ham oʻtkazildi. Shuningdek, madaniy-maʼrifiy kontsert dasturi, raqslar va ijodiy chiqishlar tadbirga bayramona ruh bagʻishladi.

Maʼlumot oʻrnida taʼkidlash joizki, politexnikum Qoraqalpoq davlat universitetiga biriktirilgan boʻlib, oʻquv jarayoni milliy va xalqaro standartlarga mos ravishda olib boriladi.

Muassasada 37 nafar oliy maʼlumotli oʻqituvchi, shu jumladan, 2 nafar bosh oʻqituvchi, 11 nafar yetakchi oʻqituvchi va 10 nafar katta oʻqituvchi faoliyat olib boradi. Shu bilan birga, 30 nafar umumkasbiy amaliyot ustalari ham taʼlim jarayonida ishtirok etishadi.

Politexnikumda oʻquvchilar uchun barcha zarur shart-sharoitlar yaratilgan. Zamonaviy taʼlim infratuzilmasi, innovatsion yondashuv va yuqori malakali mutaxassislar ishtirokidagi oʻquv jarayoni bu yerda taʼlim olishni yanada samarali qiladi. Muassasa hududida 150-oʻrinli ishlab chiqarish ustaxonalari, faollar va sport zallari, ochiq sport maydonchalari, lingafon xonalari, maxsus kasb-hunar xonalari, zamonaviy laboratoriyalar mavjud boʻlib, ular oʻquvchilarning nazariy bilimlarini amaliy mashgʻulotlar bilan boyitish va tanlagan kasblariga boʻlgan qiziqishlarini rivojlantirish imkonini beradi.

Shuningdek, zamonaviy texnika va asbob-uskunalar bilan jihozlangan ustaxonalar, kompyuter va multimedia sinfxonalari orqali oʻquvchilar yangi texnologiyalar bilan ishlashni amalda oʻrganadilar. Har bir oʻquvchi uchun individual yondashuv, interfaol darslar va koʻrgazmali taʼlim usullari qoʻllaniladi.

Politexnikumning asosiy maqsadi – muhandislik va texnik sohalarda oʻrta boʻgʻin mutaxassislarini tayyorlashdan iborat. Bundan tashqari, oshpazlik va maktabgacha taʼlim tashkilotlarining maishiy masalalari menejeri kabi yoʻnalishlarda dual taʼlim shakli joriy qilingan boʻlib, ish beruvchilar bilan hamkorlik asosida oʻquvchilar ishlab chiqarish jarayoniga jalb etiladi. 2025-2026 oʻquv yilida Amudaryo tumani 2-sonli politexnikumi boshlangʻich kasbiy taʼlim dasturlari boʻyicha 9-sinf bitiruvchilari uchun avtomobillarni taʼmirlash va ularga xizmat koʻrsatish, payvandlovchi, oqava suv va suv taʼminoti tizimlaridan foydalanish va montaj qilish ustasi, maishiy texnika jihozlariga xizmat koʻrsatish va taʼmirlash, oshpazlik, yakka tartibda kiyim tikuvchi hamda raqamli axborotlarni qayta ishlash ustasi yoʻnalishlarida taʼlim olish imkonini taqdim etadi.

Shuningdek, oʻrta va oʻrta maxsus kasbiy taʼlim dasturlari boʻyicha maktabgacha taʼlim tashkiloti uslubchisi, kutubxonashunoslik va bibliografiya, sport faoliyati hamda maktabgacha taʼlim tashkilotlarining maishiy masalalari menejeri kabi yoʻnalishlarda mutaxassislar tayyorlanadi.

Politexnikumda taʼlim oluvchilar oʻz mutaxassisliklari boʻyicha amaliy tajribaga ega boʻlishlari uchun ishlab chiqarish korxonalari va muassasalar bilan hamkorlik oʻrnatilgan. Bundan tashqari, bitiruvchilar oʻzlashtirgan modullari, toʻplagan kreditlari va oliy taʼlim tashkiloti tomonidan belgilangan ballar asosida oliy taʼlimning tegishli bosqichidan oʻqishni davom ettirish imkoniga ega boʻladilar.

Shu bilan birga, politexnikum turli ish beruvchi tashkilotlar bilan hamkorlik qilgani sababli, bitiruvchilar uchun mehnat bozorida ishga joylashish imkoniyatlari ancha kengdir. Kasbga ega boʻlgan yoshlar davlat va xususiy sektorda, startaplarda va hatto oʻz bizneslarini boshlashda katta ustunlikka ega boʻladilar.

Ishtirokchilar tadbir orqali kelajakdagi kasb tanlovi oldidan kerakli maʼlumotlarga ega boʻlish, oʻzlarini qiziqtirgan yoʻnalishlarni koʻzdan kechirish, ustozlar bilan bevosita muloqotda boʻlish imkoniga ega boʻldilar. Koʻrgazmali vositalar, oʻquvchilarning ishlari, interaktiv mashgʻulotlar orqali ularda kasbga boʻlgan qiziqish va ishonch mustahkamlandi.

Shuningdek, tadbir doirasida bitiruvchilarning ishga joylashuvi, korxona va tashkilotlar bilan hamkorlik aloqalari, amaliyot tizimi haqida ham maʼlumotlar berildi.

Bir soʻz bilan aytganda, bu kabi tadbirlar nafaqat oʻquvchilarning kasbga boʻlgan ishtiyoqini oshiradi, balki ularni hayotga tayyorlaydi, jamiyatda oʻz oʻrnini topishga undaydi.

Shohzod Qurbonboyev tayyorladi.