“Oʻzkomnazorat” inspektsiyasi boshligʻi Farruh Rustamov amudaryolik isteʼmolchilar ishtirokida sayyor qabul oʻtkazdi

Bugungi kunda xalq bilan uchrashib, joylarga chiqqan holda ularning dardiga quloq tutish, shu orqali aholining roziligiga erishish har bir rahbarning bosh vazifasiga aylandi. Barcha davlat idoralari faoliyatida aholining murojaatlariga alohida eʼtibor qaratilib, murojaatlarni koʻrib chiqish ishlarining sifati jihatidan mutlaqo yangi tizim yaratildi. Xalqning dardini eshitish, ularning muammolarini hal etish maqsadida joylarda tashkil etilayotgan sayyor qabullar esa xalq bilan davlat idoralari oʻrtasidagi byurokratik toʻsiqlarga barham berib, davlat organlariga boʻlgan ishonchning ortishiga zamin yaratmoqda.

Joriy yil 20-fevral kuni Amudaryo tumani Madaniyat markazi binosida axborotlashtirish va telekommunikatsiya texnologiyalari xizmatlaridan foydalanishda isteʼmolchilar huquqlarini himoya qilish, shuningdek, sohadagi muammolarni bartaraf etish maqsadida Oʻzbekiston Respublikasi Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspektsiyasi ­– “Oʻzkomnazorat” boshligʻi Farruh Rustamov tomonidan sayyor qabul oʻtkazildi. Unda axborot texnologiyalari va telekommunikatsiya vositalaridan foydalanuvchi fuqarolar vakillari hamda mazkur soha boʻyicha masʼul mutaxassislar, yoshlar ishtirok etishdi.

“Oʻzkomnazorat” inspektsiyasiga oʻz vakolati doirasida pochta aloqasi, axborot texnologiyalari va telekommunikatsiyalari xizmatlarining sifatli taqdim etilishi, davriy bosma nashrlar, fonogrammalar, audiovizual asarlar va kompyuter dasturlari tarqatilishida isteʼmolchilar huquqlarini himoya qilish vazifasi yuklatilgan. Sayyor qabul jarayonida inspektsiya boshligʻi Farruh Rustamov ishtirokchilarga keng polosali telekommunikatsiya xizmatlari turlari va ularga ulanish tartiblari, koʻrsatilayotgan xizmatlar sifati, tarmoqlarni modernizatsiya qilish boʻyicha olib borilayotgan ishlar, xizmatlar koʻlami va boshqa masalalar toʻgʻrisida tushuntirishlar berdi.

“Oʻzkomnazorat” inspektsiyasi oʻz faoliyatida aloqa va axborotlashtirish sohasida amalga oshirilishi rejalashtirilgan davlat dasturlari ijrosi, telekommunikatsiya, pochta aloqasi, teleradioeshittirish va mobil aloqa sohasida faoliyat yurituvchi operator va provayderlar tomonidan koʻrsatilayotgan xizmatlar sifatini ham nazorat qilib boradi.

Oxirgi yillarda inspektsiyaning Qoraqalpogʻiston Respublikasi hududiy boʻlimi tomonidan ham keng koʻlamli ishlar olib borilgan. Xususan, Respublika hududida aholiga simli internet xizmatini koʻrsatuvchi 2 ta, mobil aloqa yoʻnalishida xizmat koʻrsatuvchi 6 ta, teleradio yoʻnalishida xizmat koʻrsatuvchi 6 ta, pochta va kurerlik yoʻnalishida xizmat koʻrsatuvchi 9 ta hamda davriy bosma nashrlarini tarqatish yoʻnalishida xizmat koʻrsatuvchi 6 ta subʼektlar mavjud boʻlib, ushbu subʼektlar tomonidan koʻrsatilayotgan xizmatlar sifati yuzasidan nazorat tadbirlari amalga oshirilgan.

Oʻtgan 2024-yil davomida telekommunikatsiya isteʼmolchilaridan kelib tushgan 499 ta murojaatlar koʻrib chiqilib, shundan 435 ta murojaat, yaʼni 87 foizi ijobiy hal qilingan. Korxonalar maʼmuriyatlari aybi bilan yuzaga kelgan 12 ta murojaat boʻyicha 5 ta holatda maʼmuriy ish qoʻzgʻatilgan va 8 ta holatda kamchilikka yoʻl qoʻygan xodimlarga nisbatan intizomiy choralar koʻrilgan. Hududiy boʻlim tomonidan oʻz vaqtida amalga oshirilgan chora-tadbirlar natijasida murojaatlar soni oʻtgan yilga nisbatan 10.2 foizga kamaygan.

Sayyor qabul davomida yigʻilish ishtirokchilaridan telekommunikatsiya xizmatlaridan foydalanishda yuzaga kelayotgan muammolar hamda mazkur yoʻnalishda xizmatlar sifatini yaxshilash borasida murojaat va takliflar kelib tushdi.

Fuqarolarning barcha murojaatlariga masʼullar tomonidan batafsil javoblar, zarur tushuncha va maʼlumotlar taqdim etildi. Tadbir davomida “Oʻzkomnazorat” inspektsiyasi masʼullari tomonidan axborotlashtirish va telekommunikatsiyalar sohasidagi yangiliklar hamda “Jismoniy va yuridik shaxslarning murojaatlari toʻgʻrisida”gi Qonunning mazmun-mohiyati toʻgʻrisida ham tushuntirishlar berildi. Shuningdek, ishtirokchilarga soha boʻyicha muammolarga duch kelgan taqdirda “Oʻzkomnazorat” inspektsiyasining tun-u kun uzluksiz ishlaydigan “1144” Ishonch telefon raqami orqali murojaat yoʻllashi mumkinligi qayd etildi.

Ravshan Bahromov.