Qoraqalpogʻiston Respublikasi Soliq boshqarmasi boshligʻi tadbirkorlar bilan uchrashdi

Kichik va oʻrta biznes har qanday mamlakatning iqtisodiy taraqqiyotida muhim oʻrin tutadi. Bugungi kunda mamlakatimiz iqtisodiyoti hajmining yarmidan koʻpi, sanoat va eksportning uchdan bir qismi aynan kichik va oʻrta biznes vakillari hissasiga toʻgʻri kelmoqda.

Bu borada faoliyat yuritayotgan tadbirkorlar safini yanada kengaytirish, ishbilarmonlarning oʻz salohiyatini toʻliq ishga solishlari uchun zarur sharoitlar yaratish maqsadida respublikamiz boʻylab kichik va oʻrta biznes vakillari ishtirokida ochiq muloqotlar oʻtkazilmoqda.

Qoraqalpogʻiston Respublikasi soliq boshqarmasi boshligʻi Xalmurza Bekchanovning taxiyatoshlik tadbirkorlar bilan uchrashuvida ham xususiy sektor vakillariga berilayotgan imkoniyatlar, mavjud muammolar haqida fikr almashildi.

Ishtirokchilarga Oʻzbekiston Respublikasi Prezidentining “Kichik va oʻrta biznesning iqtisodiyotdagi oʻrnini oshirish chora-tadbirlari toʻgʻrisida”gi farmoniga muvofiq berilayotgan imkoniyatlar haqida batafsil maʼlumotlar berildi.

Aytish joizki, Qoraqalpogʻiston Respublikasida 2024-yil yakuni bilan kichik tadbirkorlik subʼektlari soni 34 ming 215 ta, oʻrta tadbirkorlik subʼektlari soni 359 ta, yirik tadbirkorlik subʼektlari soni esa 30 tani tashkil etadi.

Shuningdek, kichik va oʻrta biznes vakillari tomonidan 2024-yilda 1 trln. 298 mlrd. soʻm soliqlar toʻlanib, byudjetga jami tushumdagi ulushi 43 foizni tashkil etgan. Shu bilan bir qatorda Oʻzbekiston Respublikasi Soliq Kodeksi, Oʻzbekiston Respublikasi Prezidenti qaror va farmonlariga hamda boshqa soliq qonunchiligiga asosan 2023-yil davomida 13 ming 714 ta kichik va oʻrta biznes vakillariga 447,8 mlrd. soʻm soliq imtiyozlari qoʻllanilgan boʻlsa, 2024-yil davomida 16 ming 597 ta kichik va oʻrta biznes vakillariga 622,3 mlrd.soʻm soliq imtiyozlari qoʻllanilib, bu koʻrsatkich 39 foizga yoki 174,5 mlrd. soʻmga oshgan. Ushbu mablagʻlar tadbirkorlik faoliyatining yanada kengayib, yangi ish oʻrinlari yaratilishiga asos boʻlgan.

Qoraqalpogʻiston Respublikasi boʻyicha 2024-yilda jami byudjet tushumlari 3 trillion 29 mlrd 217,8 mln soʻmni tashkil etib shundan, 1 trln. 298 mlrd 616,7 mln soʻmi, yoki jami byudjet tushumining 42,9 foiz kichik biznes subʼektlari hissasiga toʻgʻri keladi.

Shuningdek uchrashuvda tadbirkorlarning soliq imtiyozlaridan foydalanish, soliq hisobotlari, maʼmuriy huquqbuzarlik, kredit va soliq stavkalari bilan bogʻliq muammo va takliflari ham tinglanib, ularni ijobiy hal etish choralari koʻrildi.

Soliq organlari masʼullari va tadbirkorlar oʻrtasidagi bu kabi uchrashuvlar oʻzaro hamkorlikni mustahkamlashda muhim oʻrin tutadi. Bunday muloqotlar orqali tadbirkorlar soliq qonunchiligidagi yangiliklar, imtiyozlar va hisob-kitob tartiblari haqida batafsil maʼlumot oladilar. Bu esa ularning faoliyatini qonuniy asosda yuritishlariga koʻmaklashadi.

Shu bilan birga, bunday uchrashuvlar davomida tadbirkorlar oʻzlarini qiynayotgan masalalarni ochiqchasiga bayon qilish imkoniga ega boʻladilar. Soliq organlari esa bu muammolarni oʻrganib, ularni bartaraf etish boʻyicha aniq choralar koʻradilar. Bu nafaqat tadbirkorlik muhitini yaxshilaydi, balki ishbilarmonlar va soliq organlari oʻrtasida ishonch muhitini ham mustahkamlaydi.