Test sinovlari jarayonidagi yangiliklar nimalardan iborat? Mutaxassis javob berdi

Soʻngi yillarda taʼlim tizimiga alohida eʼtibor qaratilib, yoshlarni oliy taʼlim bilan qamrab olish koʻrsatkichi oshdi. Shuningdek, oliy taʼlim muassasalariga kirish test sinovlari boʻyicha bir qator yangilik va oʻzgartirishlar kiritilmoqda. Taʼlim sohasidagi yangilanishlar hamda oʻqishga qabul qilishda qoʻllaniladigan imtiyozlar haqida xabardor boʻlish esa har bir abituriyent uchun muhim.

Shu maqsadda Bilim va malakalarni baholash agentligining Qoraqalpogʻiston Respublikasi boʻlimi tomonidan joylarda “Huquqiy axborotni tarqatish va undan foydalanishni taʼminlash toʻgʻrisida”gi Oʻzbekiston Respublikasi Qonunining 7-moddasi asosida oʻz soha faoliyatiga doir normativ-huquqiy hujjatlar mazmun-mohiyati va ahamiyatini tushuntirish yuzasidan manzilli targʻibot tadbirlari oʻtkazilmoqda. Chekka hududlar ham qamrab olinayotgan uchrashuvlarda oliy taʼlim muassasalariga oʻqishga qabul qilishda qoʻllaniladigan imtiyozlar tizimi, kirish test sinovlaridagi yangilik va oʻzgarishlar aholi orasida keng targʻib qilinmoqda.

Yaqinda Amudaryo tumanidagi Ixtisoslashtirilgan maktabda ham Bilim va malakalarni baholash agentligining Qoraqalpogʻiston Respublikasi boʻlimi tomonidan ana shunday uchrashuv tashkil etildi.

Uchrashuvda soʻnggi yillarda mamlakatimizda taʼlim-tarbiya sifati va samaradorligini oshirish boʻyicha olib borilayotgan keng koʻlamli ishlar haqida agentlikining Qoraqalpogʻiston Respublikasi boʻlimi boshligʻi Muzaffar Abdullayev batafsil maʼlumot berib oʻtdi. Shuningdek, uchrashuv ochiq muloqot tarzida davom etib, test sinovlari jarayonidagi yangiliklar, kiritilayotgan oʻzgarishlar, imtiyozlarning qoʻllanilishi, sertifikatlashtirish tizimi haqida batafsil  maʼlumotlar berildi.

Uchrashuvda davlatimiz rahbarining “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida”gi Farmoni hamda “Taʼlim-tarbiya tizimini yanada takomillashtirishga oid qoʻshimcha chora-tadbirlar toʻgʻrisida”gi, “Umumtaʼlim fanlarini bilish darajasini baholashning milliy test tizimini joriy qilish toʻgʻrisida”gi Qarorlarining mazmun-mohiyati ochib berildi.

Mazkur qonun hujjatlari bilan oliy taʼlim muassasalariga oʻqishga kirish uchun imtihon topshirayotgan abituriyentlarga bir qator imtiyozlar belgilangan. Jumladan, chet tili fanlaridan milliy yoki xalqaro sertifikatga, shuningdek, oʻquvchi umumtaʼlim fanlaridan bilish darajasini baholash boʻyicha milliy sertifikatga ega boʻlganda,  kirish test sinovlarida tanlagan taʼlim yoʻnalishida mazkur fan mavjud boʻlsa, egallagan darajasiga mos maksimal yoki proportsional balga ega boʻladi. Test natijalari xalqaro metodika – Rash modeli asosida hisoblanib, talabgorlarga toʻplagan bali asosida sertifikat taqdim etiladi.

Bunda A+; A; B+; B; C+ va C darajali sertifikatlar beriladi. Sertifikatga ega abituriyentlarga OTMlarning bakalavriatiga kirish test sinovlarida A+, A darajali sertifikat uchun — tegishli mutaxassislik fanidan maksimal ball, B+, B, S+, S darajali sertifikat uchun — tegishli mutaxassislik fanidan proportsional ball, A+, A, B+, B, S+, S darajali sertifikat uchun esa tegishli majburiy fandan maksimal ball berilishi belgilangan. Shuningdek, akademik litseylarga kirish test sinovlarida sertifikatga ega oʻquvchilarga ham tegishli fandan maksimal ball beriladi.

Uchrashuv davomida abituriyentlar uchun shu va boshqa foydali maʼlumotlar berib oʻtildi. Ishtirokchilar ham jarayon mobaynida oʻzlarini qiziqtirgan savollarga toʻliq javoblar oldilar.

Aziza Madrahimova