Pedagog kadrlar uchun amaliy-oʻquv seminari: unda oʻqituvchilarni majburiy attestatsiyadan oʻtkazish boʻyicha dolzarb masalalar muhokama etildi

Amudaryo tumani Maktabgacha va maktab taʼlimi boʻlimiga qarashli 38-sonli umumiy oʻrta taʼlim maktabida Oʻzbekiston Respublikasi Vazirlar Mahkamasining 2025-yil 28-fevral kungi "Oʻzbekiston Respublikasi Hukumatining ayrim qarorlariga pedagoglarni attestatsiyadan oʻtkazish, kasbiy sertifikatlash va ragʻbatlantirish tizimini takomillashtirishga qaratilgan oʻzgartirish va qoʻshimchalar kiritish toʻgʻrisida"gi qarori ijrosini taʼminlash va uni amaliyotga tatbiq etish maqsadida umumtaʼlim maktablari va maktabgacha taʼlim tashkilotlari rahbarlari uchun amaliy-oʻquv seminari tashkil qilindi.

Seminarda Qoraqalpogʻiston Respublikasi Maktabgacha va maktab taʼlimi vazirligining Pedagog kadrlar bilim va malakalarini baholash shuʼbasi metodisti Bahodir Habibullayev, Xorijiy tillarni oʻrganishni ommalashtirish shuʼbasi boshligʻi Bayram Hamidullayev, Amudaryo tumani Maktabgacha va maktab taʼlimi boʻlimi boshligʻi Yalgʻashboy Shamuratov, boʻlim metodisti Rayhon Yakubova, tumandagi 86 ta umumtaʼlim maktablari hamda 53 ta maktabgacha taʼlim tashkilotlari direktorlari ishtirok etishdi.

Amaliy-oʻquv seminarini Amudaryo tumani Maktabgacha va maktab taʼlimi boʻlimi boshligʻi Yalgʻashboy Shamuratov ochdi va ishtirokchilarni amaliy-oʻquv seminarda oʻrganiladigan mavzular bilan batafsil tanishtirdi. Shundan soʻng Qoraqalpogʻiston Respublikasi Maktabgacha va maktab taʼlimi vazirligining Pedagog kadrlar bilim va malakalarini baholash shuʼbasi metodisti Bahodir Habibullayev "Bugungi globallashuv jarayonida pedagog kadrlarning bilim va salohiyatini oshirishga qaratilgan tadbirlarning ahamiyati" mavzusida maʼruza qildi.

U oʻz maʼruzasida Oʻzbekiston Respublikasi Vazirlar Mahkamasining 2025-yil 28-fevraldagi "Oʻzbekiston Respublikasi Hukumatining ayrim qarorlariga pedagoglarni attestatsiyadan oʻtkazish, kasbiy sertifikatlash va ragʻbatlantirish tizimini takomillashtirishga qaratilgan oʻzgartirish va qoʻshimchalar kiritish toʻgʻrisida"gi 130-sonli qarori, Vazirlar Mahkamasining "Maktabgacha, umumiy oʻrta, oʻrta maxsus, professional va maktabdan tashqari taʼlim tashkilotlari pedagog kadrlarini attestatsiyadan oʻtkazish tartibini takomillashtirish chora-tadbirlari toʻgʻrisida"gi 2021-yil 17-sentyabrdagi 572-sonli qarori mazmun-mohiyati yuzasidan batafsil tushuncha va maʼlumotlar berdi.

Xususan, ushbu qaror nizomiga asosan 2025-yil 1-sentyabrga qadar navbatdagi majburiy attestatsiyaga jalb etilmagan, shuningdek, attestatsiyadan oʻtganlik muddati tugagan va amaldagi malaka toifasi saqlanib qolgan pedagoglar majburiy attestatsiyaga jalb etilmasligi hamda ularga amaldagi malaka toifasi boʻyicha haq toʻlanishi borasidagi belgilangan talablar bilan tanishtirdi.

Qayd qilinganidek, oliy malaka toifasiga ega boʻlganidan soʻng ushbu toifani 15-yil davomida saqlab kelgan va uzluksiz ish stajiga ega boʻlgan, shuningdek, pedagogik faoliyat boʻyicha 25-yil va undan koʻp ish stajiga ega, yoshga doir pensiyaga chiqishi uchun 5-yildan koʻp boʻlmagan vaqt qolgan, pedagogik faoliyat bilan shugʻullanayotgan, pensiya yoshiga toʻlgan pedagoglar majburiy attestatsiyaga jalb etilmaydi.

Bundan tashqari, pedagogik faoliyat boʻyicha 25-yil va undan koʻp ish stajiga ega boʻlgan pedagoglarga, yoshga doir pensiyaga chiqishi uchun 5-yildan koʻp boʻlmagan vaqt qolgan pedagoglarga, oliy malaka toifasiga ega boʻlganidan soʻng ushbu toifani 15-yil davomida saqlab kelgan va uzluksiz ish stajiga ega boʻlgan pedagoglarga nizom talablariga koʻra toʻgʻridan-toʻgʻri malaka toifalari berilishi koʻzda tutilgan.

Bunda pedagoglar oʻz xohishiga koʻra navbatdan tashqari attestatsiyadan oʻtib, malaka toifasi oshirilgan taqdirda, ularga yangi tasdiqlangan malaka toifasi boʻyicha sertifikatning amal qilish muddati davomida haq toʻlanadi.

Shuningdek, Bahodir Habibullayev 2025-2026 oʻquv yilidan boshlab taʼlim tashkilotlarida faoliyat yuritayotgan musiqa madaniyati va jismoniy tarbiya fani oʻqituvchilari hamda oliy maʼlumotga ega boʻlmagan pedagoglar belgilangan tartibda attestatsiyadan oʻtkazilishini taʼminlash boʻyicha yuqoridagi nizom talablaridan kelib chiqadigan vazifalar haqida ham amaliy-oʻquv seminar ishtirokchilariga zarur tavsiyalar berdi.

Amaliy-oʻquv seminari davomida Qoraqalpogʻiston Respublikasi Maktabgacha va maktab taʼlimi vazirligining Xorijiy tillarni oʻrganishni ommalashtirish shuʼbasi boshligʻi Bayram Hamidullayev Oʻzbekiston Respublikasi Vazirlar Mahkamasining 2021-yil 19-maydagi "Xorijiy tillarni oʻrganishni ommalashtirishni samarali tashkil etish chora-tadbirlari toʻgʻrisida"gi 312-sonli qarori hamda Oʻzbekiston Respublikasi Oliy taʼlim, fan va innovatsiyalar vazirligi, Oʻzbekiston Respublikasi Maktabgacha va maktab taʼlimi vazirligining 2024-yil 29-maydagi qarori mazmun-mohiyati va undan kelib chiqadigan vazifalar toʻgʻrisida maʼruza qildi.

Shundan soʻng seminar ishtirokchilari 2025-2026 oʻquv yili boshlanguniga qadar umumiy oʻrta, oʻrta maxsus va professional taʼlim muassasalarida faoliyat yuritayotgan barcha xorijiy tillar oʻqituvchilari kamida B2 darajadagi milliy yoki unga tenglashtirilgan mos darajadagi xalqaro sertifikatga ega boʻlishi lozimligi xususidagi belgilangan talablar bilan tanishtirildi. Umumiy oʻrta, oʻrta maxsus, professional va oliy taʼlim tizimida faoliyat yuritayotgan pedagog xodimlarga ustama belgilashda qoʻllaniladigan xorijiy tillarni bilish darajasini belgilovchi milliy va xalqaro tan olingan sertifikatlar roʻyxati taqdim etilib, bu borada keng tarzda tushunchalar berildi.

Har ikkala maʼruza amaliy-oʻquv seminar ishtirokchilari tomonidan qizgʻin muhokama etildi va munozara-bahslarga boy boʻldi. Tadbir davomida ishtirokchilar oʻzlarini qiziqtirgan masalalar boʻyicha savollar bilan murojaat qildilar. Ishtirokchilarning barcha savollariga soha masʼullari toʻliq javob berdilar.

Yangi oʻquv yili boshlanishi arafasida boʻlib oʻtgan mazkur amaliy-oʻquv seminari pedagog kadrlarining oʻsib kelayotgan yosh avlod taʼlim-tarbiyasini zamon talablari darajasida olib borishlari uchun birinchi galda oʻz bilim va malakalarini yanada takomilga yetkazishlari bugungi kunning eng dolzarb masalasi ekanligining amaldagi ifodasi boʻldi.

Robiya Yoʻldosheva tayyorladi.