“Amudaryotumangaz” korxonasi tomonidan isteʼmolchilarga suyultirilgan gaz uzluksiz yetkazib berilmoqda

Xalqni rozi qilish, uning oʻtayotgan har bir kuniga mazmun bagʻishlash, turmushi farovonligini oshirish bugungi kunda davlat idoralari, shu barobarida xizmat koʻrsatuvchi idoralar masʼullarining zimmalaridagi yuksak burch va majburiyatlariga aylandi. Ayniqsa, ijtimoiy infratuzilma va kommunal xizmatlarga doir muammolarni hal qilish borasidagi amaliy chora-tadbirlar tizimli ravishda tashkil qilinayotgani quvonarli. Bunga biz “Amudaryotumangaz” idorasining aholiga suyultirilgan gaz yetkazib berish boʻlimi faoliyati bilan tanishish asnosida yaqqol guvoh boʻldik.

Avvallari Amudaryo tumanining eng chekka hududlarida yashovchi aholining deyarli barchasi tuman markaziga – “Amudaryotumangaz” idorasiga kelib maishiy gaz ballonlariga suyultirilgan gaz toʻldirish uchun uzundan-uzoq navbatda turishar, hatto bir necha kunlab kutib ham qolishardi. Endilikda esa suyultirilgan gaz isteʼmolchilarini qiynab kelayotgan bu muammo bartaraf etilgan.

Ayni paytda tuman boʻyicha suyultirilgan gaz isteʼmolchilari 25 ming 450 nafar boʻlib, shundan 25 ming 410 nafari aholi isteʼmolchilari va 40 nafari maishiy soha isteʼmolchilari hisoblanadi. Tumandagi 38 ta ovul va mahallalar hududidagi isteʼmolchilar suyultirilgan gazga moslashtirilgan boʻlib, “Amudaryotumangaz” idorasi tomonidan 1 ta servis markazi va 7 ta shoxobcha orqali isteʼmolchilarga suyultirilgan gaz uzluksiz yetkazib berilmoqda. Aholi ham, maishiy soha isteʼmolchilari ham bu borada koʻrsatilayotgan xizmat sifatidan mamnun.

Xolimbeg servis markazi Ayoqchi mahallasi hududida joylashgan. Ushbu servis markazi orqali Xolimbeg va Qilichboy ovullari hamda Ayoqchi mahallasi hududidagi isteʼmolchilarga suyultirilgan gaz kechiktirilmay, oʻz vaqtida yetkazib berilmoqda.

Mangʻit shahrida joylashgan “Markaz” maishiy gaz ballon qabul qilish va tarqatish shoxobchasi orqali Choykoʻl, Bosuv, Toʻlqin, Oʻrta qalʼa, Arna boʻyi, Bogʻ, Amir Temur va Tosh yop ovul hamda mahallalari hududidagi isteʼmolchilarga uchun suyultirilgan gaz yetkazib beriladi.

Kuyuk koʻpir ovulida joylashgan gaz ballon qabul qilish va tarqatish shoxobchasi orqali esa mazkur ovuldan tashqari Oʻzbekiston mahallasi va Bobur ovuli hududidagi isteʼmolchilarga ham suyultirilgan gaz yetkazib berish ishlari namunali tashkil qilingan.

Shuningdek, Boʻz yop ovuli hududida joylashgan gaz ballon qabul qilish va tarqatish shoxobchasi mazkur ovuldagi isteʼmolchilarga xizmat koʻrsatsa, Qipchoq shoxobchasidan shu atrofdagi 5ta, Oq oltin shoxobchasidan mazkur hududdagi 2 ta, Qangli shoxobchasidan 2 ta va Boʻz solma shoxobchasidan 3 ta ovul va mahallalardagi isteʼmolchilarga suyultirilgan gaz yetkazib beriladi.

Tumanning Tosh qalʼa, Besh ovul, Yuqori qishloq, Xizr eli, Tor yop, Namuna, Qizilcholi va Jumur ovul mahallalari hamda Xitoy va Nazarxon ovullari hududlaridagi isteʼmolchilarga “Amudaryotumangaz” idorasi tomonidan biriktirilgan maxsus transport vositalari orqali rejaviy jadval asosida har 30-35 kunda joyiga borgan holda – aylanma usulda gaz ballon toʻldirish ishlari amalga oshiriladi.

2024-yil davomida aholi isteʼmolchilariga 4 ming 249 tonna, maishiy soha isteʼmolchilari uchun 42 tonna suyultirilgan gaz tarqatish rejalashtirilgan boʻlib, ushbu belgilangan fond boʻyicha aholi va maishiy soha isteʼmolchilariga suyultirilgan gaz oʻz vaqtida yetkazib berildi. Ayni paytda tumangaz filiali aylanmasida jami 31 ming 728 ta maishiy gaz ballonlari mavjud boʻlib, shundan 2 ming 491 tasi aholi hisobidagi shaxsiy, 29 ming 237 tasi esa tumangaz korxonasi hisobidagi maishiy gaz ballonlaridir. Suyultirilgan gaz ballonlaridan foydalanishda isteʼmolchilarga qiyinchilik tugʻdirmaslik maqsadida maishiy gaz ballonlarini oʻz vaqtida taʼmirlash, qiyoslovdan oʻtkazish, zichlikka sinash ishlari ”Amudaryotumangaz” idorasi tomonidan, samarali tarzda tashkil etilmoqda.

2025-yilning yanvar oyi uchun rejadagi 385,8 tonna oʻrniga 402,2 tonna suyultirilgan gaz yetkazib berildi. Fevral oyining ikki oʻn kunligi davomida esa aholi isteʼmolchilariga 250 tonnaga yaqin, maishiy soha isteʼmolchilariga esa 1 tonnaga yaqin suyultirilgan gaz yetkazib berildi.

Tuman gaz taʼminoti boʻlimiga 5 ta maxsus “ISUZU” rusumli avtotransport vositalari biriktirilgan boʻlib, ular orqali isteʼmolchilarga suyultirilgan gaz uzluksiz ravishda yetkazib berilmoqda. Maxsus avtotransportlar hamda gaz ballonlarni qabul qilish va tarqatish shoxobchalari davlat qiyoslovidan oʻtkazilgan va elektron tarozi bilan toʻliq taʼminlangan.

Qish oylarining sovuq va izgʻirinli kunlarida gaz ballonlari orqali “zangori olov” oʻz vaqtida, uzluksiz yetkazib berilayotganidan isteʼmolchilar mamnun.

ROBIYa YOʻLDOShEVA.