“Амударётумангаз” корхонаси томонидан истеъмолчиларга суюлтирилган газ узлуксиз етказиб берилмоқда

Халқни рози қилиш, унинг ўтаётган ҳар бир кунига мазмун бағишлаш, турмуши фаровонлигини ошириш бугунги кунда давлат идоралари, шу баробарида хизмат кўрсатувчи идоралар масъулларининг зиммаларидаги юксак бурч ва мажбуриятларига айланди. Айниқса, ижтимоий инфратузилма ва коммунал хизматларга доир муаммоларни ҳал қилиш борасидаги амалий чора-тадбирлар тизимли равишда ташкил қилинаётгани қувонарли. Бунга биз “Амударётумангаз” идорасининг аҳолига суюлтирилган газ етказиб бериш бўлими фаолияти билан танишиш асносида яққол гувоҳ бўлдик.

Авваллари Амударё туманининг энг чекка ҳудудларида яшовчи аҳолининг деярли барчаси туман марказига – “Амударётумангаз” идорасига келиб маиший газ баллонларига суюлтирилган газ тўлдириш учун узундан-узоқ навбатда туришар, ҳатто бир неча кунлаб кутиб ҳам қолишарди. Эндиликда эса суюлтирилган газ истеъмолчиларини қийнаб келаётган бу муаммо бартараф этилган.

Айни пайтда туман бўйича суюлтирилган газ истеъмолчилари 25 минг 450 нафар бўлиб, шундан 25 минг 410 нафари аҳоли истеъмолчилари ва 40 нафари маиший соҳа истеъмолчилари ҳисобланади. Тумандаги 38 та овул ва маҳаллалар ҳудудидаги истеъмолчилар суюлтирилган газга мослаштирилган бўлиб, “Амударётумангаз” идораси томонидан 1 та сервис маркази ва 7 та шохобча орқали истеъмолчиларга суюлтирилган газ узлуксиз етказиб берилмоқда. Аҳоли ҳам, маиший соҳа истеъмолчилари ҳам бу борада кўрсатилаётган хизмат сифатидан мамнун.

Холимбег сервис маркази Аёқчи маҳалласи ҳудудида жойлашган. Ушбу сервис маркази орқали Холимбег ва Қиличбой овуллари ҳамда Аёқчи маҳалласи ҳудудидаги истеъмолчиларга суюлтирилган газ кечиктирилмай, ўз вақтида етказиб берилмоқда.

Манғит шаҳрида жойлашган “Марказ” маиший газ баллон қабул қилиш ва тарқатиш шохобчаси орқали Чойкўл, Босув, Тўлқин, Ўрта қалъа, Арна бўйи, Боғ, Амир Темур ва Тош ёп овул ҳамда маҳаллалари ҳудудидаги истеъмолчиларга учун суюлтирилган газ етказиб берилади.

Куюк кўпир овулида жойлашган газ баллон қабул қилиш ва тарқатиш шохобчаси орқали эса мазкур овулдан ташқари Ўзбекистон маҳалласи ва Бобур овули ҳудудидаги истеъмолчиларга ҳам суюлтирилган газ етказиб бериш ишлари намунали ташкил қилинган.

Шунингдек, Бўз ёп овули ҳудудида жойлашган газ баллон қабул қилиш ва тарқатиш шохобчаси мазкур овулдаги истеъмолчиларга хизмат кўрсатса, Қипчоқ шохобчасидан шу атрофдаги 5та, Оқ олтин шохобчасидан мазкур ҳудуддаги 2 та, Қангли шохобчасидан 2 та ва Бўз солма шохобчасидан 3 та овул ва маҳаллалардаги истеъмолчиларга суюлтирилган газ етказиб берилади.

Туманнинг Тош қалъа, Беш овул, Юқори қишлоқ, Хизр эли, Тор ёп, Намуна, Қизилчоли ва Жумур овул маҳаллалари ҳамда Хитой ва Назархон овуллари ҳудудларидаги истеъмолчиларга “Амударётумангаз” идораси томонидан бириктирилган махсус транспорт воситалари орқали режавий жадвал асосида ҳар 30-35 кунда жойига борган ҳолда – айланма усулда газ баллон тўлдириш ишлари амалга оширилади.

2024 йил давомида аҳоли истеъмолчиларига 4 минг 249 тонна, маиший соҳа истеъмолчилари учун 42 тонна суюлтирилган газ тарқатиш режалаштирилган бўлиб, ушбу белгиланган фонд бўйича аҳоли ва маиший соҳа истеъмолчиларига суюлтирилган газ ўз вақтида етказиб берилди. Айни пайтда тумангаз филиали айланмасида жами 31 минг 728 та маиший газ баллонлари мавжуд бўлиб, шундан 2 минг 491 таси аҳоли ҳисобидаги шахсий, 29 минг 237 таси эса тумангаз корхонаси ҳисобидаги маиший газ баллонларидир. Суюлтирилган газ баллонларидан фойдаланишда истеъмолчиларга қийинчилик туғдирмаслик мақсадида маиший газ баллонларини ўз вақтида таъмирлаш, қиёсловдан ўтказиш, зичликка синаш ишлари ”Амударётумангаз” идораси томонидан, самарали тарзда ташкил этилмоқда.

2025 йилнинг январь ойи учун режадаги 385,8 тонна ўрнига 402,2 тонна суюлтирилган газ етказиб берилди. Февраль ойининг икки ўн кунлиги давомида эса аҳоли истеъмолчиларига 250 тоннага яқин, маиший соҳа истеъмолчиларига эса 1 тоннага яқин суюлтирилган газ етказиб берилди.

Туман газ таъминоти бўлимига 5 та махсус “ИСУЗУ” русумли автотранспорт воситалари бириктирилган бўлиб, улар орқали истеъмолчиларга суюлтирилган газ узлуксиз равишда етказиб берилмоқда. Махсус автотранспортлар ҳамда газ баллонларни қабул қилиш ва тарқатиш шохобчалари давлат қиёсловидан ўтказилган ва электрон тарози билан тўлиқ таъминланган.

Қиш ойларининг совуқ ва изғиринли кунларида газ баллонлари орқали “зангори олов” ўз вақтида, узлуксиз етказиб берилаётганидан истеъмолчилар мамнун.

РОБИЯ ЙЎЛДОШЕВА.