14-sonli maktabda “Buyuklarni yod etib” nomli maʼnaviy-maʼrifiy tadbir boʻlib oʻtdi
Har bir xalqning maʼnaviy taraqqiyotida buyuk mutafakkir va adiblarning oʻrni beqiyos. Ularning ijodi, fikrlari va ilmiy qarashlari asrlar osha xalq tafakkuri, madaniyati va maʼnaviy taraqqiyotining shakllanishiga xizmat qiladi. Ayniqsa, oʻzbek adabiyotining ikki zabardast namoyandasi – Alisher Navoiy va Zahiriddin Muhammad Bobur ijodi milliy maʼnaviyatimiz xazinasining durdonalaridir. Ularning ijodi va tarixiy faoliyati bugungi kunda ham yosh avlod uchun ibrat va ilhom manbai boʻlib xizmat qilmoqda.
Har yili mazkur buyuk siymolarning tavallud ayyomiga bagʻishlab turli maʼnaviy-maʼrifiy tadbirlar oʻtkaziladi. Bunday tadbirlar yoshlarning milliy qadriyatlarga hurmatini oshirish, tarixiy shaxslarga boʻlgan qiziqishini kuchaytirish, ularda vatanparvarlik va iftixor tuygʻularini mustahkamlashga xizmat qiladi.
Amudaryo tumanidagi 14-sonli maktabda ana shunday adabiyot kechalaridan biri – “Buyuklarni yod etib” nomli maʼnaviy-maʼrifiy tadbir boʻlib oʻtdi. Ushbu tadbir maktabning ona tili va adabiyot hamda davlat tili fani oʻqituvchilari Dilfuza Gaipova, Sadoqat Davletova va Dilnora Safarboyevalar tashabbusi bilan tashkil etildi va yuqori saviyada oʻtkazildi.
Tadbirda yuqori sinf oʻquvchilari Alisher Navoiy va Zahiriddin Muhammad Bobur ijodidan namunalarni ifodali tarzda oʻqishdi. Ushbu sheʼriy chiqishlar orqali yoshlar buyuk adiblarning teran fikrlari va yuksak maʼnoga ega sheʼriyati bilan yanada yaqinroq tanishdilar. Bu buyuk siymolarning ijodi kishiga nafaqat adabiy zavq bagʻishlaydi, balki inson maʼnaviyatini yuksaltirish, komil shaxsni tarbiyalashda ham muhim oʻrin tutadi. Ular qoldirgan maʼnaviy meros Vatanga muhabbat, insoniylik, adolat va bilimga intilish kabi ezgu fazilatlarni targʻib qiladi.
Tadbirda soʻzga chiqqanlar buyuk allomalar, adabiyot va sanʼat namoyandalarining ijodini oʻrganish va targʻib etishga katta eʼtibor qaratilayotgan yurtimizda har yili Alisher Navoiy va Zahiriddin Muhammad Bobur tavalludi keng nishonlanishini, sanalar munosabati bilan xalqaro ilmiy anjumanlar va ijodiy kechalar tashkil etilishini alohida taʼkidladilar. Yurtimizda buyuk mutafakkirlar asarlari qayta nashr etilib, ularni chuqur oʻrganish va targʻib qilish maqsadida ilmiy-tadqiqotlar olib borilmoqda. Bundan tashqari, maktab va oliy taʼlim muassasalarida ushbu ijodkorlarning asarlarini oʻrganishga alohida eʼtibor qaratiladi.
Maʼnaviy-maʼrifiy kechada shuningdek, buyuk shoirlar hayoti va ijodiga bagʻishlangan sahna koʻrinishlari ham namoyish etildi. Ayniqsa, 6-sinf oʻquvchilari ijrosida sahnalashtirilgan “Non hidi” asari tomoshabinlarda katta taassurot qoldirdi.
Nafaqat adabiy, balki milliy anʼanalar va madaniyatni oʻzida mujassam etgan musiqiy chiqishlar ham tadbirdan oʻrin oldi. Oʻquvchilar oʻzbek va qozoq xalqlarining milliy qoʻshiq-kuylariga hamohang raqslar ijro etib, tadbirga oʻziga xos joʻshqinlik bagʻishlashdi.
“Buyuklarni yod etib” tadbiri yoshlarning milliy tarix va adabiyotga boʻlgan qiziqishini yanada oshirish, ajdodlar merosini chuqurroq anglashga chorlash, ularda maʼnaviy boyliklarga ehtirom uygʻotish borasida muhim ahamiyat kasb etadi.
Bunday tadbirlar nafaqat yosh avlodning badiiy saviyasini oshirish, balki ularni tarixiy shaxslarga hurmat ruhida tarbiyalash, oʻzligini anglash va milliy gʻurur tuygʻusini kuchaytirishda muhim rol oʻynaydi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
