2025-yilga moʻljallangan soliq siyosati boʻyicha muhim oʻzgarishlar tadbirkorlar va keng jamoatchilikka tushuntirildi

Xabaringiz bor, har yili yil yakunida kelgusi yil uchun soliq-byudjet siyosatining asosiy yoʻnalishlari va byudjet parametrlari tasdiqlanadi. Shu munosabat bilan Oʻzbekiston Respublikasi Savdo-sanoat palatasi Qoraqalpogʻiston Respublikasi boshqarmasida Soliq kodeksiga kiritilgan oʻzgarishlar hamda 2025-yilda soliq siyosatidagi yangiliklarni tadbirkorlar, ommaviy axborot vositalari vakillari va keng jamoatchilikka tushuntirish maqsadida seminar tashkil etildi. 

Tadbirda Qoraqalpogʻiston Respublikasi Soliq boshqarmasi boshligʻi Xalmurza Bekchanov, Savdo-sanoat palatasi boshligʻi Kazbek Artikov, soha mutaxassislari, tadbirkorlar hamda aholi vakillari ishtirok etishdi.

Seminarda “Soliq va byudjet siyosatining 2025-yilga moʻljallangan asosiy yoʻnalishlari qabul qilinganligi munosabati bilan Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonuni bilan soliq tizimiga kiritilgan muhim yangiliklar boʻyicha batafsil axborot berildi. 

Qayd qilinganidek, mazkur qonun hujjatlari bilan Soliq kodeksining 37ta moddasiga, shuningdek Byudjet kodeksiga tegishli oʻzgartirish va qoʻshimchalar kiritildi. Ushbu oʻzgarishlar aholi hamda tadbirkorlik subʼektlariga qoʻshimcha qulayliklar yaratish, iqtisodiy faollikni oshirish va soliqlarning samaradorligini taʼminlashga qaratilgan. 

Xususan, 2025-yil 1-yanvardan 2028-yil 1-yanvarga qadar ishga qabul qilingan kambagʻal oila aʼzolari uchun ijtimoiy soliq stavkasi 1 foiz miqdorida belgilandi. 2024-yil 1-sentyabrdan 2027-yil 1-sentyabrga qadar tadbirkorlar tomonidan kasbga oʻrgatish uchun ishga qabul qilingan maktab, kollej va texnikum oʻquvchilariga daromad soligʻi hamda ularning oylik ish haqiga hisoblangan ijtimoiy soliq 1 foiz miqdorida belgilandi. 2028-yil 1-yanvarga qadar magistral yoʻllar boʻyida koʻchma savdoni tashkil qilgan 30 yoshgacha boʻlgan yoshlar oʻz faoliyatining dastlabki 6 oyi davomida soliqlarni toʻlashdan ozod etildi.

Shuningdek, IT-park rezidentlariga qoʻshimcha qiymat soligʻidan tashqari barcha soliqlarni toʻlashdan ozod etish tarzidagi imtiyozlar 2040-yilgacha uzaytirilib, ushbu sektorni rivojlantirishga qoʻshimcha imkoniyat yaratildi.

Nodavlat maktabgacha va umumiy oʻrta taʼlim tashkilotlari 2030-yil 1-yanvarga qadar ijtimoiy soliqdan tashqari barcha turdagi soliqlardan ozod qilindi.

Bundan tashqari, qayta tiklanuvchi energiya manbalarini oʻrnatgan jismoniy shaxslar va tadbirkorlar uchun qator imtiyozlar, ragʻbatlantirish choralari belgilandi.

2028-yil 1-yanvarga qadar umumiy ovqatlanish korxonalariga foyda soligʻi stavkasi 50 foizga kamaytirildi.

Bundan tashqari, byudjet daromadlari barqarorligini taʼminlash maqsadida 2025-yil 1-yanvardan boshlab aylanmadan olinadigan soliqning qatʼiy belgilangan stavkasi tovar aylanmasi 500 mln soʻmgacha boʻlganda yiliga 30 mln soʻm, 500 mln soʻmdan yuqori boʻlganda 40 mln soʻm miqdorida belgilandi.

Noturar obʼektlar boʻyicha mol-mulk soligʻining asosiy stavkasini saqlab qolgan holda, soliq bazasini aniqlashda 1 kvadrat metr uchun oʻrnatilgan minimal qiymat, jismoniy shaxslarning turar obʼektlari boʻyicha mol-mulk soligʻi, qishloq xoʻjaligiga moʻljallanmagan yer soligʻi, jismoniy shaxslardan olinadigan yer soligʻi va yer qaʼridan foydalanganlik uchun soliqning qatʼiy miqdorda belgilangan stavkalari 10 foizga oshirildi.

Umuman olganda, soliq siyosati oʻzgarishlari natijasida tadbirkorlar va aholi ixtiyorida taxminan 3 trillion soʻm mablagʻ qolishi kutilmoqda.

Seminar davomida tadbirkorlar, ommaviy axborot vositalari vakillari va keng jamoatchilik mazkur oʻzgarishlar yuzasidan oʻz fikr-mulohazalarini bildirib, savollariga batafsil javob olishdi.

Shohzod Qurbonboyev