2025 йилга мўлжалланган солиқ сиёсати бўйича муҳим ўзгаришлар тадбиркорлар ва кенг жамоатчиликка тушунтирилди
Хабарингиз бор, ҳар йили йил якунида келгуси йил учун солиқ-бюджет сиёсатининг асосий йўналишлари ва бюджет параметрлари тасдиқланади. Шу муносабат билан Ўзбекистон Республикаси Савдо-саноат палатаси Қорақалпоғистон Республикаси бошқармасида Солиқ кодексига киритилган ўзгаришлар ҳамда 2025 йилда солиқ сиёсатидаги янгиликларни тадбиркорлар, оммавий ахборот воситалари вакиллари ва кенг жамоатчиликка тушунтириш мақсадида семинар ташкил этилди.
Тадбирда Қорақалпоғистон Республикаси Солиқ бошқармаси бошлиғи Халмурза Бекчанов, Савдо-саноат палатаси бошлиғи Казбек Артиков, соҳа мутахассислари, тадбиркорлар ҳамда аҳоли вакиллари иштирок этишди.
Семинарда “Солиқ ва бюджет сиёсатининг 2025 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги Қонуни билан солиқ тизимига киритилган муҳим янгиликлар бўйича батафсил ахборот берилди.
Қайд қилинганидек, мазкур қонун ҳужжатлари билан Солиқ кодексининг 37та моддасига, шунингдек Бюджет кодексига тегишли ўзгартириш ва қўшимчалар киритилди. Ушбу ўзгаришлар аҳоли ҳамда тадбиркорлик субъектларига қўшимча қулайликлар яратиш, иқтисодий фаолликни ошириш ва солиқларнинг самарадорлигини таъминлашга қаратилган.
Хусусан, 2025 йил 1 январдан 2028 йил 1 январга қадар ишга қабул қилинган камбағал оила аъзолари учун ижтимоий солиқ ставкаси 1 фоиз миқдорида белгиланди. 2024 йил 1 сентябрдан 2027 йил 1 сентябрга қадар тадбиркорлар томонидан касбга ўргатиш учун ишга қабул қилинган мактаб, коллеж ва техникум ўқувчиларига даромад солиғи ҳамда уларнинг ойлик иш ҳақига ҳисобланган ижтимоий солиқ 1 фоиз миқдорида белгиланди. 2028 йил 1 январга қадар магистрал йўллар бўйида кўчма савдони ташкил қилган 30 ёшгача бўлган ёшлар ўз фаолиятининг дастлабки 6 ойи давомида солиқларни тўлашдан озод этилди.
Шунингдек, IT-парк резидентларига қўшимча қиймат солиғидан ташқари барча солиқларни тўлашдан озод этиш тарзидаги имтиёзлар 2040 йилгача узайтирилиб, ушбу секторни ривожлантиришга қўшимча имконият яратилди.
Нодавлат мактабгача ва умумий ўрта таълим ташкилотлари 2030 йил 1 январга қадар ижтимоий солиқдан ташқари барча турдаги солиқлардан озод қилинди.
Бундан ташқари, қайта тикланувчи энергия манбаларини ўрнатган жисмоний шахслар ва тадбиркорлар учун қатор имтиёзлар, рағбатлантириш чоралари белгиланди.
2028 йил 1 январга қадар умумий овқатланиш корхоналарига фойда солиғи ставкаси 50 фоизга камайтирилди.
Бундан ташқари, бюджет даромадлари барқарорлигини таъминлаш мақсадида 2025 йил 1 январдан бошлаб айланмадан олинадиган солиқнинг қатъий белгиланган ставкаси товар айланмаси 500 млн сўмгача бўлганда йилига 30 млн сўм, 500 млн сўмдан юқори бўлганда 40 млн сўм миқдорида белгиланди.
Нотурар объектлар бўйича мол-мулк солиғининг асосий ставкасини сақлаб қолган ҳолда, солиқ базасини аниқлашда 1 квадрат метр учун ўрнатилган минимал қиймат, жисмоний шахсларнинг турар объектлари бўйича мол-мулк солиғи, қишлоқ хўжалигига мўлжалланмаган ер солиғи, жисмоний шахслардан олинадиган ер солиғи ва ер қаъридан фойдаланганлик учун солиқнинг қатъий миқдорда белгиланган ставкалари 10 фоизга оширилди.
Умуман олганда, солиқ сиёсати ўзгаришлари натижасида тадбиркорлар ва аҳоли ихтиёрида тахминан 3 триллион сўм маблағ қолиши кутилмоқда.
Семинар давомида тадбиркорлар, оммавий ахборот воситалари вакиллари ва кенг жамоатчилик мазкур ўзгаришлар юзасидан ўз фикр-мулоҳазаларини билдириб, саволларига батафсил жавоб олишди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
