UMUMTAʼLIM MAKTABLARIDA INDIVIDUAL TAʼLIM OLAYoTGAN OʻQUVChILAR UChUN YaNGI YIL BAYRAM TADBIRI TAShKIL ETILDI

Mamlakatimizda bayramlar shunchaki ho-yu-havaslarni amalga oshirish yoxud kimnidir unutib, shodiyonalar oʻtkazish emas, balki oʻzaro mehr-oqibat, millatlararo totuvlik, doʻstlik va tinchlik, tenglik ayyomi sifatida, barcha yosh toifalaridagi insonlar ishtirokida, koʻtarinki ruhda nishonlanadi. Ayniqsa, Yangi yil bayrami tantanalarida bu yaqqol namoyon boʻladi. Umumtaʼlim maktablarida individual taʼlim olayotgan imkoniyati cheklangan oʻquvchilarning ijtimoiylashuviga, jamiyatga faol aralashuviga koʻmaklashishga qaratilgan saʼy-harakatlar esa har bir fuqaroning zimmasidagi masʼuliyatli burchiga aylangan. Aynan ana shunday oʻquvchi-yoshlar bilan tantanali bayram tadbirlarida ishtirok etish qalblardagi mehr-oqibat tuygʻularini yanada mustahkamlashi tabiiy.

Yangi yil bayrami arafasida Amudaryo tumanidagi 40-sonli umumtaʼlim maktabining faollar zalida oʻtkazilgan bayramona tadbir ham oʻzining yorqin taassurotlarga boyligi bilan ishtirokchilarga zavq-shavq bagʻishladi.

Amudaryo tumani hokimligi, “Inson” ijtimoiy xizmatlar markazi tuman boʻlimi, Oʻzbekiston “Nogironlar” jamiyatining Amudaryo tuman boʻlinmasi hamkorligida tashkillashtirilgan mazkur tadbirning koʻtarinki ruhda oʻtishida maktab direktori, Qoraqalpogʻiston Respublikasi Joʻqorgʻi Kengesi deputati Sanobar Xoʻjamurotova bosh-qosh boʻldi.

Tadbirda masʼullardan tashqari, tumanning turli hududlaridagi umumtaʼlim maktablarida individual taʼlim olayotgan 30 nafar imkoniyati cheklangan oʻquvchilar, 40-sonli maktabning boshlangʻich sinflar oʻquvchilari hamda bayram tadbiri homiysi, tadbirkor Dildora Hayitboyevalar ishtirok etishdi.

Amudaryo tumani hokimligi, Oʻzbekiston “Nogironlar” jamiyatining Amudaryo tuman boʻlinmasi, “Inson” ijtimoiy xizmatlar markazi tuman boʻlimi masʼullarining bayramona samimiy tilaklari bilan boshlangan tadbirda maktab direktori Sanobar Xoʻjamurotova mamlakatimizda taʼlim-tarbiya sohasiga qaratilayotgan alohida eʼtibor va ragʻbat, shuningdek, imkoniyati cheklangan oʻquvchi-yoshlarning zamon talablari darajasida bilim olishlari, ularning iqtidorlarini yuzaga chiqarish va rivojlantirish borasida yaratilgan shart-sharoitlar xususida soʻz yuritib, mamlakatimizda barcha toifadagi insonlar davlat gʻamxoʻrligi bilan qamrab olinganini mamnuniyat bilan taʼkidladi.

Tadbir davomida maktabning boshlangʻich sinflar oʻquvchilari tomonidan tayyorlangan Yangi yil bayram kontsert dasturi namoyish etildi.

Kontsert dasturi avvalida davraga Qorbobo va Qorqiz bilan kirib kelgan bolajonlar oʻzbek xalq ertaklari qahramonlari siymolarida namoyon boʻlishib, doʻstlik, tinchlik, mehr-oqibat va ona Vatanni madh etuvchi sheʼrlar aytishib, qoʻshiq va raqslar ijro qildilar. Deputat va maktab direktori Sanobar Xoʻjamurotova bayram dasturxoni yozib, tadbirkor Dildora Hayitboyeva 30 nafar, 40-sonli maktab jamoasi esa 60 nafar oʻquvchilarga oʻzlarining bayram sovgʻalarini taqdim etdilar hamda bolajonlarga cheksiz quvonch va shodliklar ulashdilar.

Amudaryo tumanining turli hududlaridagi umumtaʼlim maktablarida individual taʼlim olayotgan imkoniyati cheklangan oʻquvchilar uchun tashkillashtirilgan Yangi yil bayram tadbirida bolajonlar quvonch-u shodliklar, mehr va muhabbat ogʻushida, Qorbobo va Qorqiz hamrohligida yayrab dam oldilar. Oʻtkazilgan tadbir sababli ular oʻzlarining har qanday sogʻlom insonlardan kam emasliklarini chin dildan his etdilar.

Robiya Yoʻldosheva.