1-SONLI MAKTABDA QORAQALPOQ TILIGA DAVLAT TILI MAQOMI BERILGANINING 35 YILLIGI KENG NIShONLANDI
Til – millat ruhi, milliy-maʼnaviy qadriyati, buyuk tarixiy merosi va intellektual mulki. Qoraqalpoq xalqining oʻzligini, ulugʻ bobomeros qadriyatlarini oʻzida mujassam etgan qoraqalpoq tili xalqimiz uchun aziz va qadrlidir. Shu bois, mamlakatimizda 1-dekabr – qoraqalpoq tiligi davlat tili maqomi berilgan kun har yili katta tantanalar bilan bayram qilinadi. Noyabr oyining uchinchi oʻn kunligidan boshlab umumtaʼlim maktablarida, jamoat tashkilotlarida, maktabgacha taʼlim tashkilotlarida ona tilini ulugʻlovchi bayramona tadbirlar oʻtkaziladi.
Ana shunday tadbirlardan biri Amudaryo tumanidagi 1-sonli umumtaʼlim maktabida ham boʻlib oʻtdi. “Martabang baland boʻlsin, ona tilim!” nomli ezgu shiori bilan bezatilgan maktabning faollar zalida qoraqalpoq tiliga davlat tili maqomi berilganligiga 35-yil toʻlishi munosabati bilan Qoraqalpoq adabiyoti va folklor namunalari, tilning tarixiga oid ilmiy monografiyalar, taniqli yozuvchi va shoirlarning asarlaridan iborat koʻrgazma tashkil etildi.
Bayram tadbirini maktab direktorining maʼnaviy-maʼrifiy ishlar boʻyicha oʻrinbosari Odilbek Saparboyev ochdi va barchani bayram bilan tabriklab, qoraqalpoq tilining hayotimizda tutgan oʻrni va ahamiyati xususida batafsil toʻxtaldi. Ayniqsa, qoraqalpoq xalq ogʻzaki ijodining nihoyatda boyligi va uning Markaziy Osiyo xalqlari milliy-maʼnaviy rivojlanishida tutgan oʻrni toʻgʻrisida qiziqarli maʼlumotlar berdi.
Shundan soʻng, maktabning qoraqalpoq tili toʻgaragi aʼzolari hamda 6-“A” sinf oʻquvchilari qoraqalpoq shoirlarining til haqidagi sheʼrlaridan namunalar aytib berishdi.
Tadbirning musiqiy qismida maktabning 8-“A” sinf qizlari qoraqalpoq xalq raqslarini ijro etishdi. 6-“V” sinfning oʻgʻil bolalari tomonidan ijro qilingan, “Qoraqalpogʻim” qoʻshigʻiga maxsus tayyorlangan joʻshqin raqs esa barchaga koʻtarinki kayfiyat bagʻishladi. Ayniqsa, 10-sinf oʻquvchilari tomonidan namoyish qilingan sahna koʻrinishi, unda foydalanilgan qoraqalpoq xalq maqollari, millatning anʼana va qadriyatlarini ulugʻlovchi mazmunan boy syujet tanlangani tadbir ishtirokchilarida katta taassurot qoldirdi.
Tadbir davomida maktab oʻquvchilarining “Qoraqalpoq tiliga davlat tili maqomi berish toʻgʻrisida”gi Qoraqalpogʻiston Respublikasi Qonunini nechogʻlik bilishlari boʻyicha bilimlari ham sinovdan oʻtkazildi. Ishtirokchi oʻquvchilar mazkur Qonunning mazmun-mohiyati haqida fikr yuritishib, oʻz fikrlarini tilni amaliyotda qoʻllash boʻyicha moddama-modda tavsiflab berdilar.
“Qadring baland boʻlsin, ona tilim!” shiori ostida oʻtkazilgan bayramona tadbir oʻquvchi-yoshlarning qoraqalpoq tiliga boʻlgan mehr-muhabbatini yanada mustahkamladi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
