1-СОНЛИ МАКТАБДА ҚОРАҚАЛПОҚ ТИЛИГА ДАВЛАТ ТИЛИ МАҚОМИ БЕРИЛГАНИНИНГ 35 ЙИЛЛИГИ КЕНГ НИШОНЛАНДИ
Тил – миллат руҳи, миллий-маънавий қадрияти, буюк тарихий мероси ва интеллектуал мулки. Қорақалпоқ халқининг ўзлигини, улуғ бобомерос қадриятларини ўзида мужассам этган қорақалпоқ тили халқимиз учун азиз ва қадрлидир. Шу боис, мамлакатимизда 1 декабрь – қорақалпоқ тилиги давлат тили мақоми берилган кун ҳар йили катта тантаналар билан байрам қилинади. Ноябрь ойининг учинчи ўн кунлигидан бошлаб умумтаълим мактабларида, жамоат ташкилотларида, мактабгача таълим ташкилотларида она тилини улуғловчи байрамона тадбирлар ўтказилади.
Ана шундай тадбирлардан бири Амударё туманидаги 1-сонли умумтаълим мактабида ҳам бўлиб ўтди. “Мартабанг баланд бўлсин, она тилим!” номли эзгу шиори билан безатилган мактабнинг фаоллар залида қорақалпоқ тилига давлат тили мақоми берилганлигига 35 йил тўлиши муносабати билан Қорақалпоқ адабиёти ва фольклор намуналари, тилнинг тарихига оид илмий монографиялар, таниқли ёзувчи ва шоирларнинг асарларидан иборат кўргазма ташкил этилди.
Байрам тадбирини мактаб директорининг маънавий-маърифий ишлар бўйича ўринбосари Одилбек Сапарбоев очди ва барчани байрам билан табриклаб, қорақалпоқ тилининг ҳаётимизда тутган ўрни ва аҳамияти хусусида батафсил тўхталди. Айниқса, қорақалпоқ халқ оғзаки ижодининг ниҳоятда бойлиги ва унинг Марказий Осиё халқлари миллий-маънавий ривожланишида тутган ўрни тўғрисида қизиқарли маълумотлар берди.
Шундан сўнг, мактабнинг қорақалпоқ тили тўгараги аъзолари ҳамда 6-“А” синф ўқувчилари қорақалпоқ шоирларининг тил ҳақидаги шеърларидан намуналар айтиб беришди.
Тадбирнинг мусиқий қисмида мактабнинг 8-“А” синф қизлари қорақалпоқ халқ рақсларини ижро этишди. 6-“В” синфнинг ўғил болалари томонидан ижро қилинган, “Қорақалпоғим” қўшиғига махсус тайёрланган жўшқин рақс эса барчага кўтаринки кайфият бағишлади. Айниқса, 10-синф ўқувчилари томонидан намойиш қилинган саҳна кўриниши, унда фойдаланилган қорақалпоқ халқ мақоллари, миллатнинг анъана ва қадриятларини улуғловчи мазмунан бой сюжет танлангани тадбир иштирокчиларида катта таассурот қолдирди.
Тадбир давомида мактаб ўқувчиларининг “Қорақалпоқ тилига давлат тили мақоми бериш тўғрисида”ги Қорақалпоғистон Республикаси Қонунини нечоғлик билишлари бўйича билимлари ҳам синовдан ўтказилди. Иштирокчи ўқувчилар мазкур Қонуннинг мазмун-моҳияти ҳақида фикр юритишиб, ўз фикрларини тилни амалиётда қўллаш бўйича моддама-модда тавсифлаб бердилар.
“Қадринг баланд бўлсин, она тилим!” шиори остида ўтказилган байрамона тадбир ўқувчи-ёшларнинг қорақалпоқ тилига бўлган меҳр-муҳаббатини янада мустаҳкамлади.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
