AHILLIK VA HAMJIHATLIK SAMARASI

Haqiqiy dehqon uchun yilning toʻrt fasli ham ish faslidir. Yil boʻyi fidoyi mehnat qilib, yetishtirilgan hosilni yigʻib-terib olgan dehqon izgʻirinli qish kunlari boshlanmasidan avval hosildan boʻshagan yerlarni shudgorlash, shoʻr yuvishga tayyorlash, hududidagi ariq-zovurlarni turli xas-xashaklardan tozalash, dala yoʻllari boʻylarini va ekinzorlar chetlarini obodonlashtirib, kuzgi koʻchat ekish mavsumini koʻngildagiday oʻtkazish taraddudiga tushadi.

Amudaryo tumanining Bogʻ mahallasi hududidagi “Qadamboy Poʻlat” fermer xoʻjaligi raisi Mansur Tojimov ham “mavsumni yaxshi yakunladik, bu yogʻi qish, endi bemalol dam olsak boʻladi” qabilida ish yurituvchi baʼzi fermerlardan farqli oʻlaroq dam olishga aslo shoshilmaydi. Yakunlanayotgan qishloq xoʻjalik yilida paxta va gʻalladan moʻl hosil yetishtirgan fermer xoʻjaligi pudratchi-dehqonlari kelgusi yil hosili uchun yerlarni tayyorlash ishlarini allaqachon boshlab yuborishgan. Axir fermerning ham, pudratchi-dehqonlarning ham asosiy daromad manbai shu yerdan boʻlganidan keyin, kelgusi qishloq xoʻjaligi yiliga qancha erta va puxta tayyorgarlik koʻrilsa, daromad ham shuncha yaxshi boʻlishi barchaga ayon.

Xoʻjalik aʼzolarining ahillikda, hamjihatlik bilan qilgan fidoyi va halol mehnatlari evaziga joriy yilgi dehqonchilik mavsumini muvaffaqiyatli yakunlashdi. Erta bahorda 36 gektar yerga ekilgan chigitning bir tekis unib chiqqani va oʻz vaqtida qilingan agrotexnik tadbirlar natijasini berdi. Xoʻjalik paxtakorlari tumanda birinchilardan boʻlib kontraktatsiya shartnomasi shartlarini ado etdilar. Qabul maskanlariga shartnomadagi 68 tonna oʻrniga 78 tonna paxta topshirildi. Yetishtirilgan hosilning asosiy qismi yuqori navlarga sotilgani tufayli xoʻjalik dehqonlarining moddiy manfaatdorligi oshdi. Faqat paxtaning oʻzidan 200 million soʻm sof daromad olindi.

Bundan tashqari, joriy yilda xoʻjalikning 14 gektar maydonidagi kuzgi bugʻdoy hosili ham moʻl boʻldi. Jami 105 tonnalik bugʻdoy xirmoni buyod etilib, hosilning 45 tonnasi kontraktatsiya shartnomasiga koʻra klasterga korxonasiga topshirilib, qolgan 60 tonnasi xoʻjalik ixtiyorida qoldi. Bu esa pudratchi-dehqonlar hamda mexanizatorlarning oilalari dasturxonlari toʻkin boʻlishini taʼminladi.

Ayni paytda esa xoʻjalik pudratchilari kelgusi yil hosili uchun ekilgan 14 gektar maydondagi kuzgi bugʻdoyzorlarda kech kuzgi agrotexnik tadbirlarni amalga oshirishmoqdalar. Ishchilar “Alekseyevich” navli urugʻ ekilgan va bir tekis unib chiqqan dalalarni mahalliy oʻgʻit bilan toʻyintirish, dala chetlarini obodonlashtirish va ariqlar boʻylariga mevali hamda manzarali daraxt koʻchatlarini oʻtqazish ishlarini sifatli tarzda amalga oshirishmoqdalar.

– Xoʻjaligimiz yerlari 26 nafar pudratchiga boʻlib berilgan, – deydi “Qadamboy Poʻlat” fermer xoʻjaligi rahbari Mansur Tojimov. – Pudratchilarimizning barchasi dehqonchilik ilmini yaxshi bilishadi. Ayniqsa, bahorgi va yozgi gʻoʻza parvarishi davridagi ishlarni oʻz vaqtida bajarishganlari tufayli har yili kuzgi hosil yigʻish mavsumini koʻngildagiday yakunlaymiz.

Haqiqatdan ham fermer xoʻjaligi aʼzolari barcha yumushlarni yakdil, hamjihat va hamkorlikda bajarishga odatlanishgan. Oddiy pudratchidan tortib, mexanizatorlar va xoʻjalik rahbarigacha hammaning oʻz bajaradigan vazifasi bor. Ayni kunlarda esa xoʻjalik yerlari gʻoʻzapoyalardan tozalanib, kuzgi shudgorlash ishlaridan keyin shoʻr yuvish jarayoniga puxta hozirlik koʻrib qoʻyildi.

Robiya Yoʻldosheva