АҲИЛЛИК ВА ҲАМЖИҲАТЛИК САМАРАСИ
Ҳақиқий деҳқон учун йилнинг тўрт фасли ҳам иш фаслидир. Йил бўйи фидойи меҳнат қилиб, етиштирилган ҳосилни йиғиб-териб олган деҳқон изғиринли қиш кунлари бошланмасидан аввал ҳосилдан бўшаган ерларни шудгорлаш, шўр ювишга тайёрлаш, ҳудудидаги ариқ-зовурларни турли хас-хашаклардан тозалаш, дала йўллари бўйларини ва экинзорлар четларини ободонлаштириб, кузги кўчат экиш мавсумини кўнгилдагидай ўтказиш тараддудига тушади.
Амударё туманининг Боғ маҳалласи ҳудудидаги “Қадамбой Пўлат” фермер хўжалиги раиси Мансур Тожимов ҳам “мавсумни яхши якунладик, бу ёғи қиш, энди бемалол дам олсак бўлади” қабилида иш юритувчи баъзи фермерлардан фарқли ўлароқ дам олишга асло шошилмайди. Якунланаётган қишлоқ хўжалик йилида пахта ва ғалладан мўл ҳосил етиштирган фермер хўжалиги пудратчи-деҳқонлари келгуси йил ҳосили учун ерларни тайёрлаш ишларини аллақачон бошлаб юборишган. Ахир фермернинг ҳам, пудратчи-деҳқонларнинг ҳам асосий даромад манбаи шу ердан бўлганидан кейин, келгуси қишлоқ хўжалиги йилига қанча эрта ва пухта тайёргарлик кўрилса, даромад ҳам шунча яхши бўлиши барчага аён.
Хўжалик аъзоларининг аҳилликда, ҳамжиҳатлик билан қилган фидойи ва ҳалол меҳнатлари эвазига жорий йилги деҳқончилик мавсумини муваффақиятли якунлашди. Эрта баҳорда 36 гектар ерга экилган чигитнинг бир текис униб чиққани ва ўз вақтида қилинган агротехник тадбирлар натижасини берди. Хўжалик пахтакорлари туманда биринчилардан бўлиб контрактация шартномаси шартларини адо этдилар. Қабул масканларига шартномадаги 68 тонна ўрнига 78 тонна пахта топширилди. Етиштирилган ҳосилнинг асосий қисми юқори навларга сотилгани туфайли хўжалик деҳқонларининг моддий манфаатдорлиги ошди. Фақат пахтанинг ўзидан 200 миллион сўм соф даромад олинди.
Бундан ташқари, жорий йилда хўжаликнинг 14 гектар майдонидаги кузги буғдой ҳосили ҳам мўл бўлди. Жами 105 тонналик буғдой хирмони буёд этилиб, ҳосилнинг 45 тоннаси контрактация шартномасига кўра кластерга корхонасига топширилиб, қолган 60 тоннаси хўжалик ихтиёрида қолди. Бу эса пудратчи-деҳқонлар ҳамда механизаторларнинг оилалари дастурхонлари тўкин бўлишини таъминлади.
Айни пайтда эса хўжалик пудратчилари келгуси йил ҳосили учун экилган 14 гектар майдондаги кузги буғдойзорларда кеч кузги агротехник тадбирларни амалга оширишмоқдалар. Ишчилар “Алексеевич” навли уруғ экилган ва бир текис униб чиққан далаларни маҳаллий ўғит билан тўйинтириш, дала четларини ободонлаштириш ва ариқлар бўйларига мевали ҳамда манзарали дарахт кўчатларини ўтқазиш ишларини сифатли тарзда амалга оширишмоқдалар.
– Хўжалигимиз ерлари 26 нафар пудратчига бўлиб берилган, – дейди “Қадамбой Пўлат” фермер хўжалиги раҳбари Мансур Тожимов. – Пудратчиларимизнинг барчаси деҳқончилик илмини яхши билишади. Айниқса, баҳорги ва ёзги ғўза парвариши давридаги ишларни ўз вақтида бажаришганлари туфайли ҳар йили кузги ҳосил йиғиш мавсумини кўнгилдагидай якунлаймиз.
Ҳақиқатдан ҳам фермер хўжалиги аъзолари барча юмушларни якдил, ҳамжиҳат ва ҳамкорликда бажаришга одатланишган. Оддий пудратчидан тортиб, механизаторлар ва хўжалик раҳбаригача ҳамманинг ўз бажарадиган вазифаси бор. Айни кунларда эса хўжалик ерлари ғўзапоялардан тозаланиб, кузги шудгорлаш ишларидан кейин шўр ювиш жараёнига пухта ҳозирлик кўриб қўйилди.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
