“Tursunboyeva Umida” fermer xoʻjaligi dalalarida paxta terimi yuqori surʼatlarda olib borilmoqda

Kuz – dehqonlar uchun “gʻalvir suvdan koʻtariladigan” rizq-nasiba fasli. Ayniqsa, paxtakor dehqonlar kuzgi mehnat onlariga alohida tayyorgarlik koʻrishadi. Chunki yil boʻyi qilgan fidoyi mehnatlarining samarasi – yetishtirilgan hosilni yogʻin-sochinli, izgʻirinli kunlarga qoldirmay yigʻishtirib olish maqsadida sentyabr oyining ilk kunlaridanoq yigʻim-terim ishlarini boshlab yuborishadi.

Amudaryo tumanining Daryo boʻyi mahallasi hududida joylashgan Komiljon Eshmurodov rahbarlik qilib kelayotgan “Tursunboyeva Umida” fermer xoʻjaligi ishchilari ham bu yilgi yigʻim-terim mavsumini koʻtarinki kayfiyatda boshladi. Chunki deyarli har yili kuzatiladigan tabiat injiqliklarini omilkorlik bilan yengib, suv nihoyatda taqchil boʻlgan joriy yildagiday murakkab sharoitda ham dalalarda paxtadan moʻl hosil yaratildi.

Erta bahorda xoʻjalikning 29 gektar yeriga “Sulton” navli chigit ekkan dehqonlar har qatra suvdan unumli foydalanganlari va gʻoʻza parvarishi jarayonidagi agrotexnik tadbirlarni oʻz vaqtida amalga oshirganlari natijasida dalalarda kontraktatsiya shartnomasini ortigʻi bilan bajarguday moʻl hosil toʻplashga erishdilar.

Xoʻjalik dalalarida 20 nafar pudratchi mehnat qilishadi. Yigʻim-terim mavsumi oldidan barcha pudratchilar paxta dalalari va dalalar chetlarini begona oʻtlardan tozalab qoʻyganlari bois, ayni kunlarda pudratchi va koʻngilli hasharchi terimchilar tomonidan terilayotgan hosil salmogʻi ham, sifati ham yuqori boʻlishiga erishilmoqda.

Terimchilardan Maʼmura Gulmirzayeva, Mirzabika Qurbonboyeva, Gulbahor Qurboniyozova, Klara Nurimbetova, Munavvar Kenjaboyevalar har kuni 120-130 kilogrammdan paxta terib, xoʻjalikning umumiy xirmoniga munosib hissalarini qoʻshishmoqda.

Terimchilarning hech bir muammosiz ishlashlarini taʼminlash maqsadida dala boshida kun boʻyi qaynoq suv va issiq ovqat tashkil etilgani yigʻim-terim ishlarining yanada samarali boʻlishini taʼminlamoqda. Shuningdek, tarozi boshida terimchilarga har kungi tergan paxtasi uchun ish haqi shu kunning oʻzida hisob-kitob qilinib borilayotganidan barcha mamnun.

Terilgan paxtani isrofgarchiliklarsiz, oʻz vaqtida terimchilardan tarozida tortib olish va qabul qilish maskanlariga yetkazishda mexanizator Rustam Yusupovning xizmati katta.

Fermer xoʻjaligi aʼzolari uchun joriy 2024-yil gʻallachilik yoʻnalishida ham barakali boʻldi. Gʻalladan yuqori hosil olib, xirmoni donga toʻlgan xoʻjalik pudratchi dehqonlari kelgusi yil hosili uchun ham hozirdan puxta taraddud koʻrib qoʻyishdi. Ayni kunlarda kelasi yil gʻalla hosili uchun ekilgan bugʻdoy maysalari bir tekis unib chiqib, kuzgi agrotexnik tadbirlar olib borilmoqda.

Robiya Yoʻldosheva.