“Турсунбоева Умида” фермер хўжалиги далаларида пахта терими юқори суръатларда олиб борилмоқда

Куз – деҳқонлар учун “ғалвир сувдан кўтариладиган” ризқ-насиба фасли. Айниқса, пахтакор деҳқонлар кузги меҳнат онларига алоҳида тайёргарлик кўришади. Чунки йил бўйи қилган фидойи меҳнатларининг самараси – етиштирилган ҳосилни ёғин-сочинли, изғиринли кунларга қолдирмай йиғиштириб олиш мақсадида сентябрь ойининг илк кунлариданоқ йиғим-терим ишларини бошлаб юборишади.

Амударё туманининг Дарё бўйи маҳалласи ҳудудида жойлашган Комилжон Эшмуродов раҳбарлик қилиб келаётган “Турсунбоева Умида” фермер хўжалиги ишчилари ҳам бу йилги йиғим-терим мавсумини кўтаринки кайфиятда бошлади. Чунки деярли ҳар йили кузатиладиган табиат инжиқликларини омилкорлик билан енгиб, сув ниҳоятда тақчил бўлган жорий йилдагидай мураккаб шароитда ҳам далаларда пахтадан мўл ҳосил яратилди.

Эрта баҳорда хўжаликнинг 29 гектар ерига “Султон” навли чигит эккан деҳқонлар ҳар қатра сувдан унумли фойдаланганлари ва ғўза парвариши жараёнидаги агротехник тадбирларни ўз вақтида амалга оширганлари натижасида далаларда контрактация шартномасини ортиғи билан бажаргудай мўл ҳосил тўплашга эришдилар.

Хўжалик далаларида 20 нафар пудратчи меҳнат қилишади. Йиғим-терим мавсуми олдидан барча пудратчилар пахта далалари ва далалар четларини бегона ўтлардан тозалаб қўйганлари боис, айни кунларда пудратчи ва кўнгилли ҳашарчи теримчилар томонидан терилаётган ҳосил салмоғи ҳам, сифати ҳам юқори бўлишига эришилмоқда.

Теримчилардан Маъмура Гулмирзаева, Мирзабика Қурбонбоева, Гулбаҳор Қурбониёзова, Клара Нуримбетова, Мунаввар Кенжабоевалар ҳар куни 120-130 килограммдан пахта териб, хўжаликнинг умумий хирмонига муносиб ҳиссаларини қўшишмоқда.

Теримчиларнинг ҳеч бир муаммосиз ишлашларини таъминлаш мақсадида дала бошида кун бўйи қайноқ сув ва иссиқ овқат ташкил этилгани йиғим-терим ишларининг янада самарали бўлишини таъминламоқда. Шунингдек, тарози бошида теримчиларга ҳар кунги терган пахтаси учун иш ҳақи шу куннинг ўзида ҳисоб-китоб қилиниб борилаётганидан барча мамнун.

Терилган пахтани исрофгарчиликларсиз, ўз вақтида теримчилардан тарозида тортиб олиш ва қабул қилиш масканларига етказишда механизатор Рустам Юсуповнинг хизмати катта.

Фермер хўжалиги аъзолари учун жорий 2024 йил ғаллачилик йўналишида ҳам баракали бўлди. Ғалладан юқори ҳосил олиб, хирмони донга тўлган хўжалик пудратчи деҳқонлари келгуси йил ҳосили учун ҳам ҳозирдан пухта тараддуд кўриб қўйишди. Айни кунларда келаси йил ғалла ҳосили учун экилган буғдой майсалари бир текис униб чиқиб, кузги агротехник тадбирлар олиб борилмоқда.

Робия Йўлдошева.