САВОДХОНЛИК БАЙРАМИДА ҚОРБОБО ВА ҚОРҚИЗ МЕҲМОН БЎЛДИ
Ҳар йили Янги йил байрами арафасида умумтаълим мактабларининг 1-синф ўқувчилари учун бири-биридан ёрқин таассуротларга бой байрамлар бошланади. Аввало, улар ўқув йилининг биринчи ярим йиллигида эгаллаган билимларини намойиш этиб, “Алифбе” байрамини шод-у хуррамлик билан нишонлайдилар. Ўқишни ўрганган болажонларнинг бу қувончлари Янги йил шодиёналарига уланиб кетади.
Ана шундай қўшалоқ байрам завқини сурган 36-сонли умумтаълим мактабининг 1 “А” синф ўқувчилари иштирокида ўтказилган саводхонлик байрами ҳам ҳаяжонли таассуротларга бой бўлди. Болажонлар бу кунга пухта тараддуд кўрдилар. Байрамона безатилган синфхонада ўқувчилар томонидан тайёрланган пластилин ўйинчоқлар, гулқоғозлардан ясалган турфа гуллар, табиат манзаралари акс эттирилган суратлар, ўқувчиларнинг энг чиройли ҳуснихат дафтарлари, эртак қаҳрамонлари тасвирланган плакатлар кўргазмаси ташкил этилди.
Саводхонлик байрамига бағишланган тадбирни мактаб директорининг маънавий-маърифий ишлар бўйича ўринбосари Сарвар Қутлимуродов очди ва ўқишни ўрганган болажонларни самимий табриклади.
Шундан сўнг ўқувчилар “Алифбе” китоби бошчилигида ўзбек тилидаги барча ҳарф ва товушлар қиёфасида намоён бўлишиб, ҳар бир ҳарфга монанд шеърлар айтишди. Қизиқарли савол-жавоблар орқали ўзлари эришган ютуқларни амалда кўрсатиб беришди, қўшиқ ва рақслар ижро этишди.
Саводхонлик байрамига Она тили ва Ўқиш китоби билан Қорбобо ҳамда Қорқиз ташриф буюришди. “Алифбе”ни яхши ўзлаштирган зукко, билимдон болаларга Қорбобо ва Қорқиз совғалар улашиб, “Саводхонлик гувоҳномаси”ни тақдим қилишди. Болалар шод-у хуррамлик билан Ўқиш ва Она тили китобларини қабул қилишиб, яхши ўқишга, Ватанга муносиб фарзанд бўлишга сўз бердилар. Қорбобо ва Қорқиз билан биргаликда қувноқ рақслар, она Ватан, бинафша, дўстлик, тинчлик, Ватан посбони мавзуларида шеърлар, қўшиқлар ижро этишди.
Тадбир якунида болалар ўзларига илм йўлини кўрсатган қадрдон “Алифбе” китоби билан хайрлашиб, Она тили ва Ўқиш китоби билан эртаклар оламига саёҳат қилдилар.
Саводхонлик байрами нафақат ўқишни ўрганган болажонлар, балки уларнинг ота-оналари ва устозларига ҳам олам-олам завқ бағишлади.
Насиба БОБОЖОНОВА, шу мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
