63-сонли умумтаълим мактабида саводхонлик байрами бўлиб ўтди

Ҳар йили Янги йил байрами яқинлашган паллаларда юртимиз мактабларидаги 1-синф ўқувчилари “Алифбе” китоби билан хайрлашиб, “Ўқиш” китоби билан танишишни бошлайдилар. Барча ҳарфлар билан танишиб, ёд олган жажжи ўқувчилар аста-секинлик билан ҳарфлардан сўзлар тузишни, кейинчалик эса сўзлардан гаплар тузишни ўрганишади. Бунда уларга албатта устозлари яқиндан ёрдам беришади, билмаганларини ўргатиб, илм олишда йўл-йўриқ кўрсатадилар. Шунингдек, устозлари жажжи болажонларга “Ватан”, “она”, “мактаб” каби тушунчаларнинг мазмуни уқтиришади. Бир-биридан қизиқарли мавзуларда дарслар ўтиб, ўқувчиларнинг шахсий фикри ва дунёқараши билан қизиқишади. Саводхонлик байрами эса, ўқувчи ҳаётида янги бир саҳифа очадиган ва илм-у, маърифат тантана қиладиган қадрдон байрамдир.

Амударё тумани мактабгача ва мактаб таълими бўлимига қарашли 63-сонли умумтаълим мактабида ҳам ана шундай байрам тадбири бўлиб ўтди. Тадбирда мактабнинг 1-синф ўқувчилари ва уларнинг ота-оналари, синф раҳбари Нилуфар Искандарова, мактаб директори Акбар Ражапов, мактаб директорининг маънавий-маърифий ишлар бўйича ўринбосари Равшанбек Шомуротов, халқ депутатлари туман Кенгаши депутати Баҳром Шерманов, Жумуртов шаҳарча фуқаролар йиғини раиси Дамир Хўжамуродов ҳамда устозлар, мактаб ўқувчилари иштирок этдилар.

Тадбирни мактаб директори Акбар Ражапов кириш сўзи билан очиб берди ва 1-синф ўқувчиларини Алифбедаги ҳарфларни аъло даражада ўрганиб чиқишгани билан табриклаб, илм дунёси томон қўяётган илк қадамлари қутлуғ бўлишини тилади.

Шундан кейин, 1-синф синф раҳбари Нилуфар Искандарова бошчилигида ташкиллаштирилган байрам кечасининг бадиий қисмига навбат берилди. Жажжи ўқувчилар Алифбедан ўрин олган ҳарфларга атаб шеърлар айтишди. Турли хил мавзуларда бир-биридан ажойиб қўшиқлар куйлашиб, рақсга тушдилар.

Ҳа, саводхонлик байрами ҳар бир кичкинтойнинг ҳаётидаги энг ҳаяжонли ва унутилмас кун. Чунки улар ушбу кунда боғчада ўтказилган тадбирлардаги иштирокидан фарқли ўлароқ, илк маротаба ўз истеъдодларини, қобилиятларини саҳнада намоён қиладилар. Боғчада ёдлашга топшириқ қилиб берилган шеърларни ота-оналари ва ака-опалари кўмагида ёдлашган бўлса, эндиликда мактабдаги топшириқларни ўзлари эркин турда бажаришга ҳаракат қиладилар. Демак, мактаб билим беришдан ташқари, инсонни мустақил бўлишга ва ўз устида ўзи ишлашга ҳам ўргатади.

Маълумот ўрнида, “Алифбе” сўзи араб алифбосининг дастлабки икки ҳарфи – “алиф” ва “бе”ларнинг бирикишидан ҳосил бўлган. Бирор-бир тилнинг ҳарфлар системаси маълум бир тартибда жойлаштирилган ёзув белгилари ёки бўғин белгилар мажмуи Алифбо дейилади. Илк алифбо милоддан аввалги 2000 йил охирларида шаклланган деган тахминлар мавжуд. Фанда бундан илгари Миср иероглифлари саноқ тизими мавжуд бўлган, деган фаазлар ҳам бор.

Туркий халқларнинг Ўрхун-Энасой ва Уйғур ёзувлари бўлган. Уларни акс эттирган ҳарфлар жадвали товуш белгилари ҳақидаги бошқа манбалардаги маълумотлар ҳамда ана шу ёзув воситасида битиб қолдирилган қадимий ёдгорликлар асосида тузилган.

Тадбир сўнгида байрам кечасига Қорбобо ва Қорқиз ташриф буюришди. Азиз болажонларни ва устозларни Янги йил билан табриклаб, ўқувчиларнинг байрамга тайёрлаб келган шеърларини тинглашди. Шундан сўнг, Қорбобо болажонларни яна бир бора янги йил ва саводхонлик байрами билан табриклаб, ўзи билан бирга олиб келган совғаларини улашди.

Ҳа, орамизда саховатпеша ва қўли очиқ инсонлар кўп. Ана шундай инсонлардан бири, сўзимиз аввалида тилга олганимиз – халқ депутатлари Амударё туман Кенгаши депутати Баҳром Шермановдир. У болажонларни қўшалоқ байрамлар билан табриклаб, ўқувчиларни хурсанд қилиш мақсадида ўз ҳисобидан тайёрлаб келган совғаларни улашиб, уларнинг келгусидаги ўқиш ва ишларига зафарлар тилади. Байрам баҳона ўқувчиларнинг кўнгилларига олам-олам қувонч улашди.

Азиза Мадраҳимова