“МЕНИНГ МАҲАЛЛАМ – МЕНИНГ СУДЬЯМ” ҒОЯСИ ОСТИДА САЙЁР ҚАБУЛ ЎТКАЗИЛДИ

Ҳуқуқбузарликлар профилактикаси, жиноятчиликка қарши курашиш, шунингдек фуқароларнинг ҳуқуқий масалалари юзасидан муаммоларини тизимли ҳал этиш ва аҳолининг ҳуқуқий онгини доимий ошириб бориш юзасидан барча ҳудудларда суд масъуллари томонидан “Менинг маҳаллам – менинг судьям” ғояси остида сайёр қабуллар ва учрашувлар ўтказилмоқда.

Шу йил 17 август куни Амударё туманида Қорақалпоғистон Республикаси суди масъуллари ҳам Маҳалла ва нуронийларни қўллаб-қувватлаш бўлими биносида худди шундай сайёр қабул, фуқаролар билан учрашув ташкил этишди. Унда Қорақалпоғистон Республикаси суди раиси Камол Тарихов, Республика Маъмурий суди судьяси Пўлат Дошмурадов, Республика суди раиснинг ўринбосари, Жиноят ишлари бўйича судлов ҳайъати раиси Абилай Адилов, Республика суди раисининг ўринбосари, Фуқаролик ишлари бўйича судлов ҳайъати раиси Абдимурат Керимбаев, Республика суди судьяси Ўткир Сабиров ва мутасадди ташкилот раҳбарлари қатнашишди.

Сўзга чиққан масъуллар дастлаб суд-ҳуқуқ соҳасида амалга оширилаётган ислоҳотлар хусусида батафсил маълумот беришди. Шунингдек, соҳадаги туб ўзгаришлар, энг аввало, мамлакатимизда суд ҳокимиятининг мустақиллигини таъминлаш, одил судлов самарадорлигини, шу орқали халқимизнинг судларга бўлган қатъий ишончини ошириш ва муносабатини ўзгартиришга қаратилганлигини, уларнинг амалиётга жорий этилиши бугунги кунда ўзининг ижобий натижаларини кўрсатаётганини таъкидлашди. Суд-ҳуқуқ тизимидаги барча ислоҳотлар судьялар мустақиллигини таъминлаш, суднинг нуфузини ошириш, тизимни демократлаштириш ва такомиллаштиришга, фуқароларнинг ҳуқуқ ва эркинликлари ишончли ҳимоя қилинишига хизмат қилишини эътироф этишди.

Шундан сўнг суд масъуллари сайёр тартибда қабул ўтказиб, туман фуқароларининг мурожаатларини қабул қилишди. Қабулда 31 нафар фуқаро турли мурожаатлар билан иштирок этди. Фуқаролардан 5 нафари мерос бўлиб қолган уй-жойига кадастр ҳужжат тайёрлаш юзасидан, 4 нафари фарзандига жарроҳлик амалиётини ўтказилишига ёрдам сўраб, 5 нафари ўзининг мутахассислиги бўйича ишга жойлашиш ва бошқа масалалар юзасидан амалий ёрдам сўраб, мурожаат қилишди. Барча мурожаатлар атрофлича ўрганилди ва фуқароларни қийнаб келаётган муаммоларни бартараф этиш чоралари кўрилди.

Қорақалпоғистон Республикаси суди раиси тумандаги “Аёллар дафтари” рўйхатига киритилган 7 нафар аёл-қизларга бугунги кунда давлатимиз томонидан берилаётган имтиёз ва енгилликлар хусусида маълумотлар, ҳуқуқий маслаҳатлар бериб ўтди. Шунингдек, уларга совға-саломлар ҳам топширилди.

Тадбир Тош ёп овулида давом эттирилди ҳамда Қорақалпоғистон Республикаси суди раиси, ўринбосарлари, Жиноят ишлари бўйича Амударё туман суди раиси Жасур Ўразбоев ва Фуқаролик ишлари бўйича Амударё туман суди раиси Хайрулла Атамурадовлар шу ҳудудда яшовчи фуқаролар билан учрашишди.

Учрашув давомида фуқароларнинг турли хил муаммолари эшитилиб, ижобий ҳал этиш чоралари кўрилди. Бундан ташқари, аҳолининг ҳуқуқий маданияти ва саводхонлигини ошириш мақсадида уларни қизиқтирган саволларга жавоблар берилиб, мамлакатимизда суд-ҳуқуқ соҳасида олиб борилаётган ислоҳотлар тўғрисида маълумотлар берилди.

Жасур Ўразбоев, Жиноят ишлари бўйича туман суди раиси.