БОҒДОРЧИЛИК ВА БАЛИҚЧИЛИК СОҲАЛАРИДА АМАЛГА ОШИРИЛАЁТГАН ИШЛАР ЮЗАСИДАН ПРЕСС-ТУР ТАШКИЛ ЭТИЛДИ

Қорақалпоғистон Республикаси Қишлоқ хўжалиги вазирлиги ҳамда Агросаноатни ривожлантириш агентлиги Қорақалпоғистон Республикаси бўлими ҳамкорлигида Амударё туманида оммавий ахборот воситалари учун пресс-тур ташкил этилди.

Тадбирда Амударё тумани ва Қорақалпоғистон Республикасидаги бир қатор ОАВ вакиллари иштирок этишди. Мазкур тадбир тумандаги мева ва узум етиштиришга ихтисослашган фермер хўжаликлари фаолияти, ердан унумли фойдаланиш тажрибаси ҳамда қишлоқ хўжалигини ривожлантиришга қаратилган амалий чора-тадбирларни жамоатчиликка етказишда муҳим аҳамият касб этди.

Пресс-тур доирасида оммавий ахборот воситалари вакиллари дастлаб Чойкўл овулидаги “Аму анорлари” МЧЖ томонидан барпо этилган 8 гектарлик анор боғида амалга оширилаётган ишлар билан танишдилар. Хусусан, Амударё туманида анорчилик йўналишини ривожлантириш, анорнинг маҳаллий иқлим шароитига мос навларини яратиш, мавжуд анор дарахтларининг Қорақалпоғистон Республикасининг ўзгарувчан об-ҳавосига мослашишини таъминлаш, мавсумий ишларни ташкиллаштириш борасидаги боғбонларнинг тажрибалари ҳам ўрганилди.

Пресс-тур иштирокчилари айни пайтда олиб борилаётган агротехник тадбирлар натижасида мўл ҳосил тўплаётган ҳар бир туп анор дарахтидан кузда қанча мева йиғиштириб олиниши бўйича боғбонларнинг режалари, мамлакатимизда озиқ-овқат хавфсизлигини таъминлашга муносиб ҳисса қўшишга қаратилган эзгу ниятлари билан қизиқдилар. Мазкур боғда етиштирилаётган анор мевалари туман аҳолисининг эҳтиёжини тўла қондиришдан ташқари, ҳосилнинг бир қисмини ёндош ички бозорларга йўналтириш имкониятининг мавжудлиги иштирокчиларда катта таассурот қолдирди.

Шундан сўнг, пресс-тур иштирокчилари “Манғит омад савдо” МЧЖга қарашли 12 гектар майдонда ташкил этилган узумзор боғда ҳам бўлдилар. Соҳибкор боғбонлар томонидан узумзорда парвариш қилинаётган серҳосил узум навлари, меваларни зараркунанда ҳашаротлардан асраш мақсадида олиб борилаётган кимёвий ишлов беришнинг аҳамияти, шунингдек, узум токларини хомток қилишнинг ҳосилдорликни оширишдаги фойдали жиҳатлари, мазкур хўжалик мутахассисларининг назарий ва амалий тажрибалари ҳамда агротехник ёндашувлари ҳақида маълумотлар берилди.

Пресс-турнинг кейинги манзили “Аму тўлқин балиғи” МЧЖ бўлиб, бу ерда иштирокчилар 10 гектарлик олма ва 6 гектарлик ўрик боғлари фаолияти билан яқиндан танишиш имконига эга бўлдилар. Шунингдек, иштирокчиларга “Аму тўлқин балиғи” МЧЖ мутахассисларининг туманда балиқчиликни ривожлантириш, аҳолининг балиқчилик маҳсулотларига бўлган эҳтиёжини тўлиқ қондиришга қаратилган режа ва ташаббуслари, бу борада амалга оширилаётган лойиҳалар, уларнинг натижадорлиги ҳақидаги маълумотлар ҳам тақдим этилди. Бундан ташқари, мазкур МЧЖ тасарруфидаги 10 гектарлик олма ва 6 гектар майдондаги ўрикзор боғлар, мазкур боғларда етиштирилаётган меваларни ҳўл ва қуритилган ҳолда қишга сақлаш, аҳоли эҳтиёжидан ортиғини ички бозорга йўналтириш ҳамда МЧЖнинг экспорт салоҳияти хусусида рақамлар асосида батафсил маълумотлар берилди.

Маълумот ўрнида таъкидлаш жоизки, ҳозирги кунда Амударё туманида боғдорчилик ва узумчилик йўналишида 61 та қишлоқ хўжалиги корхонаси фаолият юритмоқда. Уларнинг умумий ер майдони 1046 гектарни ташкил этиб, шундан 641 гектари — ҳосилдор, 405 гектари эса янгидан барпо этилган боғлардир.

Жорий йилнинг баҳор мавсумида фермер ва қишлоқ хўжалиги корхоналари томонидан 76 гектар майдонда интенсив боғлар ташкил этилди. Айниқса, туманда боғдорчилик йўналишига қизиқувчи фаол ёшлар сони ортиб бормоқда.

Шунингдек, Ёшлар агентлиги туман бўлими ҳамда туман Агросаноатни ривожлантириш агентлиги мутахассислари ҳамкорлигида ташкил этилаётган бу каби чора-тадбирлар туфайли боғларда ишсиз ёшларни бандликка жалб этиш бўйича тизимли ишлар амалга оширилмоқда. Пресс-тур иштирокчилари тадбир давомида нафақат туманда боғдорчиликни ривожлантириш, балки боғдорчилик маҳсулотларини қишги мавсумга сақлаш, қайта ишлаш, балиқчилик соҳасини замон талаблари даражасида ривожлантириш борасидаги инновацион ғоя ва ташаббуслар, анорчиликни даромадли соҳага айлантириш борасидаги режа ва тажрибалар билан ҳам батафсил танишиш имконига эга бўлдилар.

РОБИЯ ЙЎЛДОШЕВА.