Тезоқар сув ҳавзаларида, тақиқланган ҳудудларда асло чўмилманг!
Ҳар фаслнинг ўзига хос гашти бор. Айниқса, ёз — тўкин-сочинлиги, дала-ю боғларининг таровати билан янада файзли. Кун бўйи далада, боғ юмушларида юқори ҳарорат остида ишлаб толиққан инсон учун бир неча дақиқа сувда чўмилиб, салқинлаш оромбахш дамларни ато этади. Ёз мавсумида махсус пляжлар, бассейнлар, ҳатто турли сув ҳавзаларининг гавжум бўлиши ҳам инсонларнинг “бир шўнғиб, салқинлаш” орқали ҳузурланиш истагининг кучлилигидан. Лекин айрим ҳолатларда фуқароларнинг ўзига ва яқинларига нисбатан бефарқликлари туфайли ана шу истакларини амалга ошириш мақсадидаги хатти-ҳаракатлари жиддий кўнгилсизликларга сабаб бўлаётгани ачинарли. Таъқиқланган ҳудудларда чўмилиш, ёш болаларнинг тезоқар сув манбаларида “бир шўнғиб олиш” қабилидаги истакларига ота-оналарнинг лоқайдликлари, катта ёшдаги кишиларнинг спиртли ичимлик истеъмол қилиб, салқинлаш учун сув ҳавзасига тушишлари оқибатида, афсуски чўкиш билан боғлиқ ўлим ҳолатлари содир бўлаётгани сир эмас.
Ёз мавсумини беталафот ўтказиш, чўмилиш билан боғлиқ бахтсиз ҳодисаларнинг олдини олиш мақсадида Қорақалпоғистон Республикаси Вазирлар Кенгаши раиси, фуқаро муҳофазаси бошлиғининг жорий йил 28 апрель кунги тегишли буйруғига асосан Қорақалпоғистон Республикаси миқёсида, шу жумладан Амударё туманида ҳам Фавқулодда вазиятлар бўлими ходимлари томонидан аҳолининг барча қатламлари ўртасида тушунтириш-тарғибот тадбирлари олиб борилмоқда.
Aмударё тумани ҳудудидан бир қанча каналлар ва йирик Амударё дарёси оқиб ўтади. Ушбу каналлар ва дарёда чўмилиш билан боғлиқ бахтсиз ҳодисаларнинг олдини олиш мақсадида Амударё тумани Фавқулодда вазиятлар бўлими ҳамда тегишли соҳа вакиллари иштирокида чўмилиш тақиқланган ҳудудлар рўйхатига киритилган сув ҳавзалари атрофига тақиқловчи белгилар ўрнатилиб, бу жойларга яқин ҳудудларда истиқомат қилувчи фуқароларга чўмилмаслик кераклиги, айниқса, ёш болаларни қаровсиз қолдирмаслик, уларнинг ўзбошимчалик билан тақиқловчи белгилар ўрнатилган ҳудудларда чўмилишларининг олдини олиш зарурлиги юзасидан тушунтириш ишлари олиб борилмоқда.
Шундай бўлса-да, доимий равишда тарғибот ва тушунтириш ишлари олиб борилишига қарамасдан фуқароларимиз томонидан спиртли ичимлик истеъмол қилган ҳолда чўмилиш, фермер хўжаликларидаги экин майдонларини томчилатиб суғориш учун мўлжалланган сунъий ҳовузлар, яъни геомембраналарда чўмилиш ҳолатлари кузатилмоқда. Бунинг оқибатида сувда чўкиш билан боғлиқ бўлган аянчли ҳолатлар кузатилмоқда. Натижада вояга етмаган ёш болалар сувга чўкиши оқибатида ҳаётдан бевақт кўз юмиб, айрим оилаларда ота-оналар аччиқ фарзанд доғини тотишга мажбур бўлишмоқда.
Инсон азиз, айниқса, Аллоҳнинг улуғ неъмати — фарзанд янада азиз. Ҳаёт эса гўзал ва мароқли. Ҳаёт гўзалликларидан баҳра олиб, оиламиз, фарзандларимиз бахт-у камолини кўриб яшаш эса ўзимизга, умримизнинг ҳар бир лаҳзасида эҳтиёткор ва огоҳ яшашимизга боғлиқ. Шундай экан, ҳурматли ота-оналар, фарзандларингизнинг тезоқар сув ҳавзаларида, айниқса, “саёз-ку”, деган номақбул ўй билан дарёнинг саёз кўринган қисмида, фермер хўжаликлари ҳудудларидаги сунъий ҳовузларда,шунингдек, захкашларда чўмилишларига асло йўл қўйманг. Чунки бундай сув ҳавзалари болангиз учун ҳам, ўзингиз учун ҳам хавфли бўлиб, тезкор оқим ва чуқур сув босими туфайли чўкиш эҳтимоли юқори бўлади. Захкашлар суви эса анчайин ифлосланган ҳамда таркибида касаллик қўзғатувчи бактериялар бўлиши мумкин ва бу соғлик учун жиддий хавф туғдириши табиий.
Яна бир бор таъкидлаймиз, тақиқланган ҳудудларда чўмилманг ва оилангиз, фарзандларингиз ҳаётига хавф туғилишининг олдини олинг!
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
