АҲОЛИ ТУРАР ЖОЙЛАРИ КУЗ-ҚИШ МАВСУМИГА ТАЙЁРМИ? ТУМАН ФВБ ХОДИМЛАРИ ҲУДУДЛАРДАГИ ХОНАДОНЛАР ҲОЛАТИНИ ЎРГАНМОҚДА
Халқимиз “фалокат оёқ остида”, “ юз берган мушкулотга эгаси сабабчи” қабилидаги ибораларни бекорга яратмаган. Чунки кўпчилик ҳолатларда ёнғинлар хонадон эгаларининг эҳтиётсизликлари, ёш болаларнинг қаровсиз қолдирилиши, иситиш тармоқлари ва электр энергияси асбобларидан нотўғри фойдаланиш оқибатида содир бўлгани кузатилади. Шунингдек, йўл-транспорт ҳодисалари ҳам авто- ва мототранспорт воситаларидан мавжуд қоидаларга амал қилмасдан фойдаланиш туфайли юз бераётгани ҳеч кимга сир эмас. Инсон осойишта яшаш қоидаларига амал қилмас экан, бу каби фалокатларга барҳам бериш қийин бўлиб бораверади.
Амударё тумани Фавқулодда вазиятлар бўлими ходимлари тумандаги тегишли соҳа вакиллари билан биргаликда кўп қаватли уйлар, ижтимоий соҳа объектлари ҳамда хонадонларни куз-қиш мавсумига тайёрлаш, мавсумни талофатсиз ўтказиш орқали аҳолининг осойишталигини таъминлаш мақсадида ҳудудларда ўрганишлар олиб боришмоқда. Ушбу долзарб масалага ким қандай ёндашаётгани, хонадон эгалари томонидан иситиш тизимларидан фойдаланиш борасидаги ишлар қай даражада ташкил этилгани, умуман олганда, аҳоли турар жойларининг мавсумга тайёргарлик ҳолатлари кўздан кечирилиб, йўл қўйилган камчиликлар жойида бартараф этилмоқда.
Айни кунларда нафақат Қорақалпоғистон Республикаси, хусусан, Амударё туманида ҳам бу борадаги ишларга жиддий киришилди. Туман ҳудудидаги барча корхоналар, ишлаб чиқариш ташкилотлари қаторида аҳоли яшаш хонадонлари ва кўп қаватли уйлар ҳам Фавқулодда вазиятлар бўлими ходимлари ва масъул ташкилотлар мутахассислари томонидан белгиланган режага мувофиқ қатъий назорат асосида бирма-бир ўрганилмоқда. Бунинг сабаби айрим ҳолатларда иситиш қозонхоналарига нотўғри уланишдан ташқари, қозонхоналарга электр анжомлари ўрнатиш ҳолатларининг ҳам кузатилаётганидир. Шунингдек, ўтган қишки мавсумда фуқароларимиз ўртасида ис газидан захарланиш билан боғлиқ ҳолатларнинг олдини олиш юзасидан тарғибот ишлари кучайтирилганига қарамай, Республикамиз ҳудудида аҳоли хонадонлари ва кўп қаватли уйларнинг хонадонларида дудбуронлар тозаланмагани ва иситиш қозонларига табиий газни таъқиқланган резина шлангларда улаб олингани натижасида бундай нохуш ҳолатлар бир неча марта қайд қилинган эди.
Жорий мавсумда бу каби кўнгилсиз ҳолатлар қайта содир бўлмаслиги учун Амударё тумани фавқулодда вазиятлар бўлими ходимлари аҳоли гавжум масканларда тарғибот-ташвиқот ишларини олиб бориш орқали ис газидан сақланиш, дудбуронларни тез-тез тозалаб туриш, иситиш қозонхоналарини табиий газ тармоғига улашда резина шланглардан фойдаланмаслик бўйича тарғибот-ташвиқот ишларини олиб боришмоқда. Шунингдек, ҳар бир хонадонга эслатма материаллари ҳам тарқатилмоқда.
Куннинг кескин совиб кетишидан олдин дудбуронларни яна бир бор тозалаш бўйича олиб борилаётган профилактик тадбирлар билан биргаликда ижтимоий ҳимояга муҳтож хонадонлар эгаларининг ҳам куз-қиш мавсумига тайёргарлик ҳолати ўрганилиб, бундай оилаларга амалий ёрдамлар кўрсатилмоқда.
Юқорида айтганимиздай, ҳаётимизнинг осойишта, хотиржамликда ўтиши, кўп жиҳатдан ўзимизга, ишнинг кўзини билиб қилган саъй-ҳаракатимизга боғлиқ. Модомики, шундай экан, хонадонларимиздаги электр анжомларидан фойдаланишда, иситиш қозонхоналарини табиий газ тармоғига улашда мавжуд қоидаларга амал қилиш нафақат ўзимиз, балки бутун оила аъзоларимиз тинчлиги ва саломатлиги, осойишта турмушимиз гарови эканлигини унутмайлик.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
