AHOLI TURAR JOYLARI KUZ-QISh MAVSUMIGA TAYYoRMI? TUMAN FVB XODIMLARI HUDUDLARDAGI XONADONLAR HOLATINI OʻRGANMOQDA

Xalqimiz “falokat oyoq ostida”, “ yuz bergan mushkulotga egasi sababchi” qabilidagi iboralarni bekorga yaratmagan. Chunki koʻpchilik holatlarda yongʻinlar xonadon egalarining ehtiyotsizliklari, yosh bolalarning qarovsiz qoldirilishi, isitish tarmoqlari va elektr energiyasi asboblaridan notoʻgʻri foydalanish oqibatida sodir boʻlgani kuzatiladi. Shuningdek, yoʻl-transport hodisalari ham avto- va mototransport vositalaridan mavjud qoidalarga amal qilmasdan foydalanish tufayli yuz berayotgani hech kimga sir emas. Inson osoyishta yashash qoidalariga amal qilmas ekan, bu kabi falokatlarga barham berish qiyin boʻlib boraveradi.

Amudaryo tumani Favqulodda vaziyatlar boʻlimi xodimlari tumandagi tegishli soha vakillari bilan birgalikda koʻp qavatli uylar, ijtimoiy soha obʼektlari hamda xonadonlarni kuz-qish mavsumiga tayyorlash, mavsumni talofatsiz oʻtkazish orqali aholining osoyishtaligini taʼminlash maqsadida hududlarda oʻrganishlar olib borishmoqda. Ushbu dolzarb masalaga kim qanday yondashayotgani, xonadon egalari tomonidan isitish tizimlaridan foydalanish borasidagi ishlar qay darajada tashkil etilgani, umuman olganda, aholi turar joylarining mavsumga tayyorgarlik holatlari koʻzdan kechirilib, yoʻl qoʻyilgan kamchiliklar joyida bartaraf etilmoqda.

Ayni kunlarda nafaqat Qoraqalpogʻiston Respublikasi, xususan, Amudaryo tumanida ham bu boradagi ishlarga jiddiy kirishildi. Tuman hududidagi barcha korxonalar, ishlab chiqarish tashkilotlari qatorida aholi yashash xonadonlari va koʻp qavatli uylar ham Favqulodda vaziyatlar boʻlimi xodimlari va masʼul tashkilotlar mutaxassislari tomonidan belgilangan rejaga muvofiq qatʼiy nazorat asosida birma-bir oʻrganilmoqda. Buning sababi ayrim holatlarda isitish qozonxonalariga notoʻgʻri ulanishdan tashqari, qozonxonalarga elektr anjomlari oʻrnatish holatlarining ham kuzatilayotganidir. Shuningdek, oʻtgan qishki mavsumda fuqarolarimiz oʻrtasida is gazidan zaxarlanish bilan bogʻliq holatlarning oldini olish yuzasidan targʻibot ishlari kuchaytirilganiga qaramay, Respublikamiz hududida aholi xonadonlari va koʻp qavatli uylarning xonadonlarida dudburonlar tozalanmagani va isitish qozonlariga tabiiy gazni taʼqiqlangan rezina shlanglarda ulab olingani natijasida bunday noxush holatlar bir necha marta qayd qilingan edi.

Joriy mavsumda bu kabi koʻngilsiz holatlar qayta sodir boʻlmasligi uchun Amudaryo tumani favqulodda vaziyatlar boʻlimi xodimlari aholi gavjum maskanlarda targʻibot-tashviqot ishlarini olib borish orqali is gazidan saqlanish, dudburonlarni tez-tez tozalab turish, isitish qozonxonalarini tabiiy gaz tarmogʻiga ulashda rezina shlanglardan foydalanmaslik boʻyicha targʻibot-tashviqot ishlarini olib borishmoqda. Shuningdek, har bir xonadonga eslatma materiallari ham tarqatilmoqda.

Kunning keskin sovib ketishidan oldin dudburonlarni yana bir bor tozalash boʻyicha olib borilayotgan profilaktik tadbirlar bilan birgalikda ijtimoiy himoyaga muhtoj xonadonlar egalarining ham kuz-qish mavsumiga tayyorgarlik holati oʻrganilib, bunday oilalarga amaliy yordamlar koʻrsatilmoqda.

Yuqorida aytganimizday, hayotimizning osoyishta, xotirjamlikda oʻtishi, koʻp jihatdan oʻzimizga, ishning koʻzini bilib qilgan saʼy-harakatimizga bogʻliq. Modomiki, shunday ekan, xonadonlarimizdagi elektr anjomlaridan foydalanishda, isitish qozonxonalarini tabiiy gaz tarmogʻiga ulashda mavjud qoidalarga amal qilish nafaqat oʻzimiz, balki butun oila aʼzolarimiz tinchligi va salomatligi, osoyishta turmushimiz garovi ekanligini unutmaylik.

Robiya Yoʻldosheva