Tezoqar suv havzalarida, taqiqlangan hududlarda aslo choʻmilmang!

Har faslning oʻziga xos gashti bor. Ayniqsa, yoz — toʻkin-sochinligi, dala-yu bogʻlarining tarovati bilan yanada fayzli. Kun boʻyi dalada, bogʻ yumushlarida yuqori harorat ostida ishlab toliqqan inson uchun bir necha daqiqa suvda choʻmilib, salqinlash orombaxsh damlarni ato etadi. Yoz mavsumida  maxsus plyajlar, basseynlar, hatto turli suv havzalarining gavjum boʻlishi ham insonlarning “bir shoʻngʻib, salqinlash” orqali  huzurlanish istagining kuchliligidan. Lekin ayrim holatlarda fuqarolarning oʻziga va yaqinlariga nisbatan befarqliklari tufayli ana shu istaklarini amalga oshirish maqsadidagi xatti-harakatlari jiddiy koʻngilsizliklarga sabab boʻlayotgani achinarli. Taʼqiqlangan hududlarda choʻmilish, yosh bolalarning tezoqar suv manbalarida “bir shoʻngʻib olish” qabilidagi istaklariga ota-onalarning loqaydliklari, katta yoshdagi kishilarning spirtli ichimlik isteʼmol qilib, salqinlash uchun suv havzasiga tushishlari oqibatida, afsuski choʻkish bilan bogʻliq oʻlim holatlari sodir boʻlayotgani sir emas.

Yoz mavsumini betalafot oʻtkazish, choʻmilish bilan bogʻliq baxtsiz hodisalarning oldini olish maqsadida Qoraqalpogʻiston Respublikasi  Vazirlar  Kengashi raisi, fuqaro muhofazasi boshligʻining joriy yil 28-aprel kungi tegishli buyrugʻiga asosan Qoraqalpogʻiston Respublikasi miqyosida, shu jumladan Amudaryo tumanida  ham  Favqulodda vaziyatlar boʻlimi xodimlari tomonidan aholining barcha qatlamlari oʻrtasida tushuntirish-targʻibot tadbirlari olib borilmoqda.

Amudaryo tumani hududidan bir qancha kanallar va yirik Amudaryo daryosi oqib oʻtadi. Ushbu kanallar va daryoda choʻmilish bilan bogʻliq baxtsiz hodisalarning oldini olish maqsadida Amudaryo tumani Favqulodda vaziyatlar boʻlimi hamda tegishli soha vakillari ishtirokida choʻmilish taqiqlangan hududlar roʻyxatiga kiritilgan suv havzalari atrofiga  taqiqlovchi belgilar oʻrnatilib, bu joylarga yaqin hududlarda istiqomat qiluvchi fuqarolarga choʻmilmaslik kerakligi, ayniqsa, yosh bolalarni qarovsiz qoldirmaslik, ularning oʻzboshimchalik bilan taqiqlovchi belgilar oʻrnatilgan hududlarda choʻmilishlarining oldini olish zarurligi yuzasidan tushuntirish ishlari olib borilmoqda.

Shunday boʻlsa-da, doimiy ravishda targʻibot va tushuntirish ishlari olib borilishiga qaramasdan fuqarolarimiz tomonidan spirtli ichimlik isteʼmol qilgan holda choʻmilish, fermer xoʻjaliklaridagi ekin maydonlarini tomchilatib sugʻorish uchun moʻljallangan sunʼiy hovuzlar, yaʼni geomembranalarda choʻmilish holatlari kuzatilmoqda. Buning oqibatida suvda choʻkish bilan bogʻliq boʻlgan ayanchli holatlar kuzatilmoqda. Natijada voyaga yetmagan yosh bolalar  suvga choʻkishi oqibatida  hayotdan bevaqt koʻz yumib, ayrim oilalarda ota-onalar achchiq farzand dogʻini totishga majbur boʻlishmoqda.

Inson aziz, ayniqsa, Allohning ulugʻ neʼmati — farzand yanada aziz. Hayot esa goʻzal va  maroqli. Hayot goʻzalliklaridan bahra olib, oilamiz, farzandlarimiz baxt-u kamolini koʻrib yashash esa  oʻzimizga,  umrimizning har bir  lahzasida ehtiyotkor  va ogoh yashashimizga bogʻliq. Shunday ekan, hurmatli ota-onalar, farzandlaringizning  tezoqar suv havzalarida, ayniqsa, “sayoz-ku”, degan nomaqbul oʻy bilan daryoning sayoz koʻringan qismida, fermer xoʻjaliklari hududlaridagi sunʼiy hovuzlarda,shuningdek, zaxkashlarda choʻmilishlariga aslo yoʻl qoʻymang. Chunki bunday suv havzalari bolangiz uchun ham, oʻzingiz uchun ham xavfli boʻlib, tezkor oqim va chuqur suv bosimi  tufayli choʻkish ehtimoli yuqori boʻladi. Zaxkashlar suvi esa anchayin ifloslangan  hamda tarkibida kasallik qoʻzgʻatuvchi bakteriyalar boʻlishi mumkin  va bu sogʻlik uchun jiddiy xavf tugʻdirishi tabiiy.

Yana bir bor taʼkidlaymiz, taqiqlangan hududlarda choʻmilmang va oilangiz, farzandlaringiz hayotiga  xavf tugʻilishining oldini oling!               

Robiya Yoʻldosheva.