Мақсадимиз – Янги Ўзбекистоннинг барқарор тараққиётини таъминлашга ҳисса қўшиш

30 июнь – Ёшлар куни

Аҳолисининг 60 фоиздан ортиғини ёшлар ташкил этадиган жаннатмакон юртимиз келажагини маънан ва соғлом, баркамол авлод яратади. Шундай ўта масъулиятли, шу билан бирга бутун халқ, миллат тақдири билан боғлиқ улкан вазифани зиммасига олишга қодир баркамол ёшларни тарбиялаб, вояга етказиш учун мамлакатимизда зарур замонавий шарт-шароитларни яратишга алоҳида эътибор қаратилади.

Дунё ҳамжамияти томонидан “Ўзбекистон – имкониятлар мамлакати” деб тан олиниши ҳам бежизга эмас. Чунки бугунги кунда барча имкониятлардан самарали фойдаланиб, замонавий билим ва тафаккурга, соғлом дунёқарашга эга бўлаётган, дунё ёшлари билан илмда, спортда, маданият ва санъатда, қўйингки, ҳаётнинг барча жабҳаларида беллашишга қодир, “Ўзбекистоннинг тоза қон томирлари” – навқирон авлод катта ишонч билан ҳаётга дадил кириб келаётгани қалбларимизга қувонч бағишлайди.

Амударёлик ёшлар орасида ҳам билимдон, интилувчан ва ташаббускор ёшлар сафи тобора кенгайиб бораётир. Айниқса, ҳар бир ёшни ўз иқтидори ва қобилиятига мувофиқ йўналтириш, касбий маҳоратини ошириш, илм-у ҳунар эгаллашлари учун зарур шарт-шароитлар, имкониятлар яратишга қаратилган чора-тадбирлар муҳим аҳамият касб этмоқда.

Хусусан, Ёшлар агентлиги Амударё туман бўлими томонидан 2025 йил давомида ёшлар билан ишлашнинг янгича тизимини жорий этиш мақсадида маҳаллабай ўрганишлар орқали ёшларнинг бандлигини таъминлашга қаратилган чора-тадбирлар режаси ишлаб чиқилди. Унга кўра, ёшларни касб-ҳунарга ўқитиш, тадбиркорликка жалб этиш, улар ўртасида маданият, спорт, ахборот технологиялари ва китобхонликни ривожлантириш мақсадида январь-февраль ойларида 14-30 ёш оралиғидаги 53 227 нафар ёшлар хатловдан ўтказилиб, “Ёшлар баланси” шакллантирилди. Ёшларнинг ижтимоий аҳволи, қобилияти ва қизиқишларидан келиб чиққан ҳолда уларнинг салкам 40 минг нафари “яшил”, 15 408 нафари “сариқ,” 300 нафардан зиёдроғи “қизил” тоифага ажратилди. “Сариқ” тоифадаги 750 нафар ишсиз ёшлар тумандаги 24 нафар раҳбарга бириктирилди.

Шунингдек, жорий йил 6 ой якуни бўйича “Ёшлар дафтари”га туман ҳудудидан 210 нафар ёшлар киритилиб, шундан 175 нафарига касбга ўқитиш, саломатлик ва маънавий ривожланишга қаратилган амалий ёрдамлар кўрсатилди. Ўтган 2024 йил якунида дафтарда қолган 38 нафар ёшлар ҳамда 2025 йилнинг 6 ой якуни бўйича “Ёшлар дафтари”га киритилган эҳтиёжманд ёшларга “Ёшлар дафтари” жамғармаси томонидан 624 млн. 874 минг сўм миқдорида моддий ёрдамлар берилди.

Бундан ташқари, йил якунига қадар “Ёшлар дафтари”га қўшимча 428 нафар ёшлар киритилиб, ушбу ёшларнинг ижтимоий-иқтисодий муаммоларини ҳал этиш юзасидан манзилли режалар ишлаб чиқилди. “Бир миллион дастурчи” лойиҳаси доирасида ёшларни профессионал сертификатга ўқитиш бўйича амалга оширилган ишлар туфайли 8 нафар ёшлар халқаро даражадаги сертификатга эга бўлдилар. Камбағал оилаларнинг 160 нафар фарзандлари IT ва ахборот технологиялари йўналишида ўқитилди.

Ёшларнинг муаммо ва таклифларини атрофлича ўрганиш мақсадида 2025 йил январь-май ойларида ёшлар билан 5 марта онлайн, 5 маротаба юзма-юз учрашувлар ўтказилди. Учрашувлар давомида ёшлар томонидан 30 та муаммо ва таклифлар келиб тушди ва уларнинг барчаси ижобий ҳал қилинди.

Президентимизнинг “Ёш­лар тадбиркорлигини ривожлантириш ва бандлигини таъминлашга доир қўшимча чора-тадбирлар тўғрисида”ги 62-сонли Қарори асосида 7 йил муддатга, 2 йиллик имтиёзли давр билан жисмоний шахсларга гаровсиз 100 млн сўмгача, якка тадбиркор сифатида фаолият юритувчи ёшларга, шунингдек, таъсисчилари ёш фуқаролар бўлган юридик шахс ташкил этган ҳолда фаолият юритувчи кичик тадбиркорларнинг камида 20 та иш ўрни яратишни назарда тутувчи лойиҳаларига имтиёзли давр билан 7 йилгача муддатга 5 млрд сўмгача маблағлар ажратилиши белгиланган. Мазкур Қарор асосида тадбиркорлик фаолиятини бошлаш истагида бўлган 50 нафардан ортиқ ёшлардан айни пайтда 12 нафарига имтиёзли кредитлар ажратилиб, ўз бизнесларини йўлга қўйдилар.

Ёшларни ҳарбий ватанпарварлик руҳида тарбиялаш мақсадида ташкил этилаётган турли спорт мусобақалари, китобхонлик кечалари, миллий-маънавий қадриятларни асраб-авайлашга қаратилган, миллатлараро тотувлик тарғиботига бағишланган шеърият кечалари, “Уч авлод учрашуви” тадбирларига туманнинг деярли барча ҳудудларидаги ёшлар қамраб олинмоқда. Хусусан, жорий йилнинг ўтган даври давомида ташкиллаштирилган ҳарбий ватанпарварлик мавзусидаги “Ёш чегарачилар”, “Ёш қутқарувчилар” ва “Ёш гвардиячилар” мусобақаларига салкам 800 нафар ёшлар жалб этилди.

Бундан ташқари, туманимиз ҳудудида жойлашган ҳарбий қисмларда 3 марта "Очиқ эшиклар куни" ташкил қилиниб, ушбу тадбирларга 250 нафардан ортиқ ёшлар қамраб олинди. Шунингдек, ёшлар ўртасида жиноятчиликнинг олдини олиш мақсадида 24 марта тунги рейд тадбирлари ўтказилиб, вояга етмаган ёшларнинг ота-оналар ва васийлар қарамоғисиз тунги пайтларда кўнгилочар кафе ва ресторанларга чиқиш­ларининг олди олинди.

Ёшлар ҳаётига оид муаммолар ечимини топишда ташаббускор ёшларнинг ўзлари ҳам иштирок этаётгани эътиборга муносиб. Ўзларининг умумманфаати учун фойдали таклиф ва ғоялари билан энг чекка қишлоқларда ҳам спорт-соғломлаштириш иншоотларини барпо этиш, ёшларнинг бўш вақтларини мазмунли ўтказишга кўмаклашиш истагидаги тадбиркор ва волонтёр ёшлар сафи ошиб бораётганидан аёнки, ёшлар келажагига дахлдорлик ҳисси билан яшаш амударёликлар учун ҳаёт мазмунига айланган. Чунки ҳар бир оиланинг фаровон ва бахтиёр турмуш тарзи, она Ватан фаровонлиги бугунги ёш авлод таълим-тарбиясига қаратилган эътибор ва рағбатга боғлиқ. Фарзандлари соғлом ва баркамол юрт эса замон билан ҳамнафас, барқарор тараққий этаверади. Мақсадимиз – Янги Ўзбекистоннинг барқарор тараққиётини таъминлашга муносиб ҳисса қўшиш.

Фурсатдан фойдаланиб, мамлакатимиз ва амударёлик ёшларни 30 июнь – Ёшлар куни билан чин дилдан табриклайман. Эзгу орзулар, буюк имкониятлар мамлакати – Янги Ўзбекистонни бунёд этиш, мустақиллигимизни мустаҳкамлаш йўлидаги улуғвор ишларида муваффақиятлар тилайман.

Беҳзод Ўринбоев, Ёшлар ишлари агентлиги Амударё туман бўлими раҳбари.