Огоҳ бўлинг: телефон!

Азимжон синфда энг аъло­чи ва одобли бола эди. Устозлари уни ҳамиша бошқа ўқувчиларга намуна қилиб кўрсатишар, ҳатто унинг келажаги порлоқ бўлишини “башорат” ҳам қилишарди.

Бир куни у синфга қўлида энг сўнгги русумдаги телефонни кўтариб келди-ю, шу кундан эътиборан ўзгариб қолди. Ҳеч кимга қўшилмайдиган, синфдош­лари бирон нарса сўрашса, эътибор қилмайдиган бўлди. Ҳатто дарс вақтида ҳам китобининг бир саҳифасини очиб, яширинча телефонда аллақандай ўйинлар ўйнаш билан машғул бўлиб ўтирадиган одат чиқарди. Оқибатда бориб-бориб ўртамиёна ўз­лаштирадиган ўқувчилар қаторига тушиб қолди.

У бир куни мактабга кўзойнак тақиб келди. Шифокорлар: “кўз нуринг пасайиб кетибди, кўзойнак тақмасанг бўлмайди, синф­даги ўрнингни олдинги партага кўчир”, дейишибди.

Устози Азимжонга те­ле­фондан узоқлашишни, ҳозир энг муҳими илм олиш эканини таъкид­лади.

– Вақт-бевақт телефон орқали ижтимоий тармоқлардаги бемаъни видеолар ва фойдасиз ўйинлар билан машғул бўлгандан кўра китоб ўқиб, дарсларни пухта ўзлаштириш ҳамма нарсадан муҳим ва фойдали, – деди устоз.

Тўғри-да, ҳаётимизнинг асосий қисми мактабда, устозлар даврасида ўтади. Ҳатто оиламиз даврасида ҳам биз учун бунчалик кўп тарбиявий соатлар ажратилмайди. Устозларимиз эса фидойи, билим олишимиз учун шароитлар мукаммал. 

Бизнинг эса ана шу шароитлардан унумли фойдаланиб, чуқур билим олишдан бошқа масъулиятли ишимиз йўқ.

Азимжон эса телефондаги ўйинлар билан машғул бўлгани боис, дарсларни ўзлаштиришда синфдош­ларидан орқада қолиб кетганини жуда кеч тушунди ва устозига қўшимча дарс­ларга қатнашиш орқали хатосини тўғрилашга сўз берди. Аммо унинг йўқотилган вақти ва анча пасайиб кетган кўз нурини қайта тиклашнинг иложи бормикан?

Қундузой Тўлибоева 71-мактаб ўқувчиси.

***

Телефонга қарамликнинг 5 та ЭНГ ЁМОН ОҚИБАТИ

1. Кўз нурининг паса­йиши – Телефон экранига узоқ вақт тикилиш кўз чарчаши, кўриш қобилияти пасайиши ва ҳатто кўзойнак тақиш заруратини келтириб чиқаради.

2. Билим олишга таъсири – Телефондан узоқ вақт фойдаланиш ўқувчи диққатини чалғитиб, дарс­ларни пухта ўзлаштиришга тўсқинлик қилади, оқибатда ўқув натижалари пасайиб кетади.

3. Руҳий ва жисмоний соғ­лиққа таъсири – Телефонга қарамлик стресс, хавотир ва уйқусизликка сабаб бўлиши мумкин. Шунингдек, ҳаракатсизликка олиб келиб, ортиқча вазн ёки саломатлик билан боғлиқ бошқа муаммоларга сабаб бўлади.

4. Ижтимоий муносабатларнинг заифлашиши – Телефонга қаттиқ боғланиб қолган одам атрофидагилар билан мулоқот қилишдан узоқлашади, оила аъзолари ва дўстлари билан мустаҳкам алоқалар ўрнатишда қ­и­йинчиликка дуч келади.

5. Вақтнинг беҳуда сарфланиши – Ижтимоий тармоқлар ва ўйинларга ортиқча вақт сарфлаш самарали фаолиятлардан чалғитади, шахсий ривожланиш ва фойдали кўникмаларни эгаллашга халақит беради.

Шу сабабли телефондан меъёрида ва мақсадли фойдаланиш муҳим!