Oliy Majlis Qonunchilik palatasi deputati amudaryolik tibbiyot xodimlari bilan uchrashdi

Maʼlumki, keyingi yillarda sogʻliqni saqlash tizimini yaxshilash, aholiga koʻrsatilayotgan birlamchi tibbiy sanitariya, shoshilinch va tez tibbiy yordam, ixtisoslashtirilgan xizmatlar sifatini oshirish, dori-darmon va tibbiy buyumlar bilan taʼminlash, xususiy tibbiyot tizimini qoʻllab-quvvatlash boʻyicha bir qator islohotlar amalga oshirildi.

Oʻzbekiston Respublikasi mustaqilligining 33 yilligiga bagʻishlab “Biz bir boʻlsak – yagona xalqmiz, birlashsak – Vatanmiz” shiori ostida “Mustaqillik yillarida aholi salomatligini saqlash va sohani rivojlantirishga oid islohotlar” mavzusida tuman Tibbiyot birlashmasida oʻtkazilgan davra suhbatida sohada erishilgan bir qator yutuqlar eʼtirof etildi.

Tadbirda Oʻzbekiston Respublikasi Oliy Majlisi Qonunchilik palatasi deputati Zumrad Bekatova, Oʻzbekiston “Milliy tiklanish” demokratik partiyasi Qoraqalpogʻiston Respublikasi Kengashi masʼullari hamda tuman Tibbiyot birlashmasi xodimlari ishtirok etishdi.

Taʼkidlanganidek, keyingi yillarda sogʻliqni saqlash sohasida amalga oshirilayotgan islohotlar natijasida aholiga tibbiy yordam koʻrsatishning sifati, samaradorligi va qulayligini oshirish taʼminlanyapti.

Xususan, soʻnggi 5-yilda sogʻliqni saqlash sohasiga byudjetdan ajratilgan mablagʻlar 7,3 trillion soʻmdan 29,7 trillion soʻmga oshirildi. 2024-yil davomida ushbu mablagʻ yana koʻpaytirilib, 33,4 trillon soʻm ajratish koʻzda tutilgan. Oʻtgan 5 yillik davrda shifoxonalar va tez tibbiy yordam punktlarini dori-darmon, tibbiy buyumlar bilan taʼminlashga ajratilayotgan mablagʻlar 12 barobar koʻpaytirildi.

Tadbirda qayd etilganidek, sohani kadrlar bilan taʼminlash, ularning uzluksiz malaka oshirib borishini, ilmiy faoliyat bilan shugʻullanishini ragʻbatlantirish boʻyicha barcha choralar koʻrilmoqda. Ehtiyoj yuqori boʻlgan tor doiradagi mutaxassislar uchun ordinatura va magistraturada kvotalar koʻpaytirildi, internatura qayta joriy etildi. Tibbiyot muassasalari tibbiy, farmatsevtika va boshqa xodimlarining lavozim maoshlari malaka toifasidan kelib chiqib, 10-15 foizga oshirildi.

Bundan tashqari, 2021-yildan boshlab olis va chekka hududlarda joylashgan oilaviy shifokorlik punkti va oilaviy poliklinikalar uchun “Qishloq shifokori” dasturi joriy qilindi. Unga asosan, boshqa hududda yashaydigan shifokor 3-yil ishlab berish sharti bilan ishga qabul qilinganda bir martalik 30 mln soʻm hamda xizmat uyi bilan taʼminlash va oyligiga 2 mln soʻm ustama berish yoʻlga qoʻyildi.

Shuningdek, viloyatlardan, Toshkent shahridan, xorijdan Qoraqalpogʻiston Respublikasining Taxtakoʻpir, Chimboy, Qoraoʻzak, Boʻzatov, Shoʻmanay, Qoʻngʻirot tumanlariga borib ishlovchi shifokorlar uchun oylik maoshiga dastlabki 3-yil davomida 100 foiz, Moʻynoq tumanida esa 200 foiz miqdorida qoʻshimcha har oylik ustama toʻlovlari Davlat byudjeti mablagʻlari hisobidan toʻlab berish amaliyoti joriy etildi.

Respublika tasarrufidagi ixtisoslashtirilgan tibbiyot markazlari soni 13tadan 24taga yetkazilib, uning hududlarda 70dan ziyod filiallari, 300dan ziyod boʻlimlari tashkil etildi va aholi uchun oʻzi yashab turgan hududda ham yuqori texnologik tibbiy yordamni olish imkoniyati kengaytirildi.

Tadbir davomida maʼruzachilar tomonidan aholi salomatligini yaxshilash, zamonaviy sogʻliqni saqlash tizimini tashkil etishning qonuniy asoslarini yaratish boʻyicha qabul qilingan huquqiy hujjatlar, amaliy tibbiyotda erishilgan yutuqlar haqida maʼlumotlar berildi.

Qizgʻin munozara va muhokamaga boy boʻlgan davra suhbati yakunida Amudaryo tumanida aholi sogʻligini saqlash bilan bogʻliq maqsadlarni amalga oshirishga qaratilgan zarur taklif va tavsiyalar bildirildi.

Shohzod Qurbonboyev