Tuman Pensiya jamgʻarmasida hisobda turuvchi 24 ming 204 nafar pensionerlarga har oyda jami 26,1 mlrd soʻmlik pensiya pullari oʻz vaqtida toʻlanmoqda

Mamlakatimizda halol va fidoyi mehnat qilgan insonlarning hamisha qadri baland. Hatto maʼlum sabablarga koʻra, vaqtida ishlay olmagan, oilasidagi mehnatga layoqatsiz farzandi, ota-onasi yoki umr yoʻldoshining parvarishi bilan mashgʻul boʻlgan, shuningdek, pensiya yoshiga yetganida talab qilinadigan ish stajiga ega boʻlmagan shaxslar ham qariganlarida pensiya olish, pensionerlar uchun yaratilgan sharoitlar, gʻamxoʻrliklardan bahramand boʻlish huquqiga egadirlar. Ularning bu huquqlari Bosh Qomusimizda va “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunida mustahkamlab qoʻyilgan.

Bugungi kunda mamlakatimizda 4 mln 539 ming nafar pensionerlar keksalik gashtini surishmoqda. Ulardan 215 ming 679 nafari Qoraqalpogʻiston Respublikasida istiqomat qiladilar. Pensionerlarning pensiyalarini oʻz vaqtida, hech qanday qiyinchiliklarsiz olishlarini taʼminlashga qaratilgan chora-tadbirlar ijrosi esa davlatimiz tomonidan doimiy nazoratda.

Fuqarolarning pensiya taʼminoti borasidagi yangiliklar va oʻzgarishlarni amaliyotga joriy etish, pensionerlarni qiziqtirgan savollarga aniq va puxta javob berish, sohaga tatbiq etilayotgan yangilik va oʻzgarishlardan xalqimizni vaqtida xabardor qilib borish maqsadida OAV orqali malakali mutaxassislar tomonidan muntazam ravishda tushuntirish-targʻibot ishlari amalga oshirilib kelinmoqda.

Bu borada Amudaryo tumani Pensiya jamgʻarmasi boʻlimi fuqarolarga xizmat koʻrsatish shoʻʼbasi mutaxassislarining “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuni va ushbu Qonunga turli sanalarda kiritilgan oʻzgartish va qoʻshimchalar, shuningdek, sohaga oid Prezident Qarorlarining mazmun-mohiyati yuzasidan pensionerlar hamda pensiya yoshiga yetgan fuqarolar ishtirokida oʻtkazayotgan davra suhbatlari, uchrashuvlari muhim ahamiyat kasb etmoqda.

Ayni paytda Amudaryo tumani Pensiya jamgʻarmasida hisobda turuvchi 24 ming 204 nafar pensionerlarning har oyda jami 26,1 mlrd soʻmlik pensiya pullarini hech qanday toʻsiqlarsiz, oʻz vaqtida olishlari uchun zarur imkoniyatlar yaratilgan. Shundan 17 ming 935 nafar fuqaroga 18,5 mlrd soʻm plastik kartalar orqali, 6 ming 269 nafar fuqaroga 7,6 mlrd soʻm naqd pul koʻrinishida beminnat yetkazib berilmoqda.

Joriy yilning 9-iyul sanasida Byudjetdan tashqari Pensiya jamgʻarmasi Amudaryo tuman boʻlimida tizimdagi yangiliklar va oʻzgarishlarni amaliyotga tatbiq etish hamda bu haqda pensiya oluvchilarga zarur tushunchalar berish maqsadida boʻlimning yetakchi mutaxassislari ishtirokida majlis oʻtkazilib, unda 2021-2022 hamda 2023-yillar davomida sohaga tatbiq etilgan yangiliklar va “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga kiritilgan oʻzgartish va qoʻshimchalarning pensiya oluvchilar hayotida tutgan oʻrni, ularning moddiy-ijtimoiy farovonligini taʼminlashdagi ahamiyati alohida eʼtirof etildi.

Majlisda Byudjetdan tashqari Pensiya jamgʻarmasi Amudaryo tuman boʻlimi boshligʻi Ulugʻbek Toirov soʻnggi yillarda amaliyotga joriy etilgan sohaga oid bir qator Qonun hujjatlari, xususan, 2021-yil 4-maydagi “Fuqarolarga davlat pensiyalarini tayinlash jarayonini soddalashtirish hamda pensiyani yetkazish tizimini yanada takomillashtirish chora-tadbirlari toʻgʻrisida”gi Prezident Qarori va “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga pensiya tayinlash tartibini takomillashtirishga qaratilgan oʻzgartish va qoʻshimchalar kiritish haqida”gi Oʻzbekiston Respublikasi Qonuni talablaridan kelib chiqib amalga oshirilgan keng qamrovli ishlar xususida batafsil toʻxtaldi. Shu bilan birga 2023-yil 1-noyabrdagi “Aholiga pensiya tayinlash boʻyicha davlat xizmatlari sifatini yanada oshirishga qaratilgan qoʻshimcha chora-tadbirlar toʻgʻrisida”gi Prezident Qarorining mazmun-mohiyati haqida soʻz yuritib, ushbu Qaror bilan davlat pensiyalarini tayinlashda byurokratik toʻsiqlarga barham berilgani, bu esa fuqarolarga qulaylik yaratganini alohida taʼkidladi.

Shuningdek, majlisda Pensiya jamgʻarmasi tuman boʻlimi boshligʻining oʻrinbosari, fuqarolarga xizmat koʻrsatish shoʻʼbasi mudiri Azamat Kenjayev, boʻlimning bosh mutaxassisi Nafisa Bobojonovalar ham soʻzga chiqishib, “Aholiga pensiya tayinlash boʻyicha koʻrsatiladigan davlat xizmatlari sifatini yanada oshirishga qaratilgan qoʻshimcha chora-tadbirlar toʻgʻrisida”gi Prezident Qarori bilan 2025-yil 1-martdan boshlab fuqarolarga yoshga doir pensiyalarni “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 7-moddasida belgilangan yoshga toʻlishi munosabati bilan alohida murojaat talab etmagan holda proaktiv shaklda tayinlash tartibi joriy qilingani va bu tartib-qoidaning afzallik tomonlari haqida keng toʻxtalib, ayni paytda pensiya yoshiga yetgan fuqarolar bu imkoniyatlardan samarali foydalanishayotganlarini mamnuniyat bilan taʼkidladilar.

Muhimi, fuqarolarga pensiya tayinlash, farzand tugʻilganda beriladigan bir martalik nafaqa, dafn marosimi uchun nafaqa tayinlash, pensiya va nafaqa oluvchilar roʻyxatida mavjudligi haqida maʼlumotnoma, pensiya va nafaqa miqdori toʻgʻrisidagi maʼlumotnomalarni berish endilikda juda osonlashgani, byurokratik toʻsiqlarga barham berilib, bu kabi maʼlumotlar Davlat xizmatlari markazi yoki Yagona interaktiv davlat xizmatlari portali orqali olish belgilangani tizimdagi qogʻozbozlikka barham berdi va soha mutaxassislari uchun qulay sharoitlar yaratdi. Buni majlisda boʻlim mutaxassislari oʻz ish faoliyatlaridagi samaradorlik, sifat koʻrsatkichlari bilan alohida eʼtirof etdilar.

Robiya Yoʻldosheva