Gʻalladan boʻshagan dalalarga takroriy ekin ekish boʻyicha seminar boʻlib oʻtdi

Amudaryo tumanidagi Qangli ovulida gʻalladan boʻshagan ekin maydonlariga takroriy ekinlarni ekish yuzasidan seminar boʻlib oʻtdi. Seminarda tuman hokimi Sobir Xoʻjametov, sektorlar rahbarlari, hokim oʻrinbosarlari, qishloq xoʻjaligi boʻlimi masʼullari, fermerlar ishtirok etdilar.

Seminarda tuman hokimi Sobir Xoʻjametov soʻzga chiqib, bu yilgi gʻalla hosilining moʻl boʻlganini, gʻalladan boʻshagan dalalarga takroriy ekinlarni oʻz vaqtida ekish, agrotexnik tadbirlarni sifatli amalga oshirish orqali ekin maydonlardan samarali foydalanish hamda qishloq xoʻjaligi mahsulotlaridan yaxshi hosil olish borasida olib borilishi lozim boʻlgan ishlar xususida toʻxtaldi. Seminarda qishloq xoʻjaligi sohasi masʼullari tumanda joriy yilgi ertaki ekinlardan va gʻalladan boʻshaydigan ekin maydonlarni ishsiz fuqarolarga ajratib berish borasida qilinayotgan ishlar toʻgʻrisida maʼlumot berdi.

Maʼlumotlarda keltirilishicha, 4 ta sektor hududida jami 183ta fermer xoʻjaliklarining umumiy maydoni 632 gektar boʻlgan ekin maydonlari takroriy ekinlar uchun ajratilishi rejalashtirilgan. Ushbu ekin maydonlari tuman boʻyicha jami 1154 nafar ishsiz fuqarolarga qishloq xoʻjaligi mahsulotlarini ekib foydalanishlari hamda daromad olishlari uchun ajratib berilmoqda.

Shundan, 1-sektor hududidan 62ta fermer xoʻjaligining gʻalladan boʻshagan 195,4 ga ekin yer maydonlari 355 nafar ishsiz fuqarolarga ajratilmoqda. 2-sektor hududidagi 29ta fermer xoʻjaliklarining 102,1 ga ekin yer maydonlari esa 427 nafar ishsiz fuqarolarga boʻlib berilmoqda. Bundan tashqari, 3-sektor hududida 65ta fermer xoʻjaliklarining salkam 100 ga yer maydoni 245 nafar, 4-sektor hudududagi 27ta fermer xoʻjaliklarining 30,3 ga ekin yer maydonlari 127 nafar ishsiz fuqarolarga takroriy ekinlar ekib, daromad olishlari uchun ajratilmoqda.

Taʼkidlash kerakki, bugungi kunda respublika boʻyicha ertaki ekinlardan va gʻalladan boʻshagan maydonlarga takroriy ekinlarni ekish ishlari jadal surʼatlarda olib borilmoqda. Mamlakatimizda ushbu-chora tadbirlar asosan iyun-iyul oylarida amalga oshiriladi. Takroriy ekinlarni ekishning afzalligi shundan iboratki, mavjud yer resurslaridan samarali foydalanib, yil davomida xalqimiz dasturxoniga qishloq xoʻjaligi mahsulotlarini uzluksiz yetkazib berish imkoniyati yaratiladi.

Takroriy ekinlarni ekish mavsumi yoz fasliga, respublikamizda havo haroratining maksimal darajada oshgan kezlariga toʻgʻri kelmoqda. Bu esa, urugʻlarning unib chiqishi uchun tegishli namlik zahirasini toʻplash zaruriyatini paydo qiladi. Shuning uchun takroriy ekin sifatida dukkakli don, moyli va yem-xashak ekinlari urugʻlarini ekishga eʼtibor qaratilmoqda.

Aytish joizki, gʻalladan boʻshagan yer maydonlariga takroriy ekin ekish tuproqdagi ozuqa moddalar miqdorining oʻsimliklar tomonidan oʻzlashtirilishiga va uning unumdorligi saqlanishiga, ekilayotgan va undan keyin ekiladigan ekinlarning hosildorligi oshishiga zamin yaratadi.

Charos Arslonova, tuman hokimligining Axborot xizmati rahbari.