31 nafar bitiruvchilarga oltin va kumush medallari topshirildi hamda ingliz tili boʻyicha 122 nafar B2 sertifikati egalari taqdirlandi

Joriy yilning 20-iyun sanasida Amudaryo tumani Madaniyat boʻlimi binosida umumtaʼlim maktablarini oltin va kumush medallarga tamomlagan hamda ingliz tilini bilish darajasi boʻyicha B2 sertifikatiga ega boʻlgan bitiruvchi yoshlarni taqdirlash marosimi boʻlib oʻtdi.

Taqdirlash marosimida tuman hokimining iqtisodiy taraqqiyot va kambagʻallikni qisqartish masalalari boʻyicha 1-oʻrinbosari Kamiljan Aytboyev, tuman hokimining yoshlar siyosati va ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, tuman Maʼnaviyat va maʼrifat markazi rahbari Islom Matkarimov, Maktabgacha va maktab taʼlimi boʻlimi boshligʻi Yalgʻash Shomuratovlar, hokimlik va prokuratura masʼul xodimlari, yoshlar hamda ularning ota-onalari ishtirok etdilar.

Tuman hokimining birinchi oʻrinbosari Kamiljan Aytboyev tuman hokimining bitiruvchi yoshlarga yoʻllagan tabrigini oʻqib eshittirdi. Hokim oʻrinbosari oʻz soʻzida bugungi kunda yoshlarning sifatli taʼlim-tarbiya olishlari, oʻz iqtidor va qobiliyatlarini yuzaga chiqarishlari, yetuk bilim va salohiyatga ega, barkamol avlod boʻlib voyaga yetishlari uchun yaratilayotgan shart-sharoitlar hamda imkoniyatlar xususida toʻxtalib oʻtdi. Soʻzi yakunida yoshlarni yutuqlari bilan samimiy tabrikladi hamda ularga katta hayot yoʻlida, kelgusidagi oʻqish va ishlarida omad va zafarlar tiladi.

Hokim oʻrinbosarlari hamda masʼul rahbarlar oltin va kumush medallar bilan joriy yilgi oʻquv yilini muvaffaqiyatli tamomlagan, ingliz tili boʻyicha B2 sertifikatiga ega boʻlgan bitiruvchi yoshlarga medallarni, tashakkurnoma hamda esdalik sovgʻalarni tantanali ravishda topshirdilar. Qayd etish joizki, joriy yilda tuman boʻyicha 2963 nafar yoshlar umumtaʼlim maktablarini tamomlagan boʻlib, ularning 27 nafari oltin, 4 nafari kumush medallar sohiblari boʻldilar.

Maʼlumot oʻrnida, oltin medal umumiy oʻrta taʼlim muassasalarining 9-sinfini bitirganlik toʻgʻrisidagi aʼlo darajali shahodatnomasi mavjud boʻlgan, umumiy oʻrta taʼlim muassasalarining 10- va 11-sinflarida barcha fanlar boʻyicha yakuniy nazoratlar, choraklik va yillik baholari aʼlo boʻlgan yoki akademik litseylarning barcha kurslarida barcha fanlar boʻyicha yakuniy nazoratlar, yarim yillik va yillik baholari aʼlo boʻlgan, namunali xulq-atvorli va jamoat ishlarida faollik koʻrsatgan bitiruvchilarga beriladi.

Kumush medal umumiy oʻrta taʼlim muassasalarining 9-sinfini bitirganlik toʻgʻrisidagi aʼlo darajali shahodatnomasi mavjud boʻlgan, umumiy oʻrta taʼlim muassasalarining 10- va 11-sinflarida yoki akademik litseylarning barcha kurslarida barcha fanlar boʻyicha yillik baholari aʼlo boʻlgan, namunali xulq-atvorli va jamoat ishlarida faollik koʻrsatgan bitiruvchilarga beriladi.

Taʼkidlash joizki, mamlakatimizda yoshlarning OTMlarda taʼlim olishlari uchun yaratilayotgan imkoniyat va qulayliklar natijasida tumanimiz yoshlarining oliy taʼlim olishga boʻlgan qiziqishlari yildan yilga ortib bormoqda. Ilmga chanqoq yoshlarimizning nafaqat respublikmizdagi, balki chet davlatlardagi OTMlarda oʻqishga kirish koʻrsatkichlari tobora ortib bormoqda. Soʻrovnomalar natijalariga koʻra joriy yilgi oʻquv yilida tumanimizdagi umumtaʼlim maktablarini tamomlagan 2963 nafar yoshlardan 2856 nafari, yani 96,3 foizi OTMlarga hujjat topshirishgan.

Mamlakatimizda yoshlarning chet tilini mukammal oʻrganishlariga katta eʼtibor qaratilib, taʼlim sohasidagi eng ustuvor masalalardan biri sifatida qaralmoqda. Amudaryolik yoshlar chet tili bilimlarini chuqur egallash boʻyicha respublikada eng peshqadamlar safida bormoqda.

Charos Arslonova, tuman hokimligining Axborot xizmati rahbari.